Visit:
no vote-no work | ఓటేస్తేనే మీకు పనులు చేసి పెడతా అని బీజేపీకి చెందిన ఓ ఎమ్మెల్యే ముస్లింలను బెదిరించాడు. ఈ వీడియో సామాజిక మాధ్యమాల్లో వైరల్‌గా మారింది. ఈ వీడియోలో సదరు ఎమ్మెల్యే గొంతు మాత్రమే వినిపిస్తున్నది. ఓటేయడం లేదు కాబట్టే మీకు పనులు చేయడం లేదని ఇంత పచ్చిగా చెప్తుండటం పట్ల ప్రతిపక్షాలు తీవ్ర ఆగ్రహం వ్యక్తం చేస్తున్నాయి. ఈ ఎమ్మెల్యే ఇలా మాట్లాడినా సదరు పార్టీ నేతలు ఒక్కరు కూడా ఖండించకపోవడం విశేషం. మహారాష్ట్రలోని బీజేపీ ఎమ్మెల్యే నితేష్‌ రాణే కూడా గతంలో ఇలాంటి వ్యాఖ్యలు చేశారు.
ఓటేయకపోతే మీ పనులు చేయనంటూ బెదిరిస్తున్న ఎమ్మెల్యే కర్ణాటకలోని హాసన్‌ నియోజకవర్గం నుంచి ప్రాతినిధ్యం వహిస్తున్న ప్రీతమ్‌ గౌడ. తన నియోజకవర్గానికి చెందిన ముస్లిం ఓటర్లను ఉద్దేశించి ఆయన కన్నడలో మాట్లాడటం ఈ వీడియోలో వినిపిస్తున్నది. తనకు ఓటు వేసేంత వరకు మీమీ వ్యక్తిగత పనులు జరగవని ఖరాకండితంగా చెప్పారు. ఈ వీడియో ఎప్పుడనేది స్పష్టంగా తెలియరాలేదు. మరో ఆరు నెలల్లో కర్ణాటక అసెంబ్లీ ఎన్నికలు జరగనున్నాయి.
An alleged video of #BJP #Hassan MLA Preetam Gowda is going viral wherein he threatens #Muslim constituents of Shrinagar to vote for him or else he won't carry out any of their personal work.He goes on to say, he treats #Muslims with love and affection.But, they have ditched him pic.twitter.com/GU7chHHYpA
— Imran Khan (@KeypadGuerilla) December 11, 2022
ఈ వీడియోలో ఎమ్మెల్యే వ్యాఖ్యలు ఇలా ఉన్నాయి. ‘మూడు ఎన్నికల్లో మోసం చేశారు. ఆరు నెలల్లో మళ్లీ ఎన్నికలు వస్తున్నాయి. మళ్లీ చేస్తే చేయండి. కానీ నేను మీ కోసం ఉండను. ఇంటికొస్తే కాఫీ తాగి పంపిస్తా. అంతేగానీ ఏ పనీ చేసిపెట్టను. నాకు ఓటేయకుండా మీకు సాయపడటం వల్ల ఎలాంటి ప్రయోజనం లేదని భావిస్తున్నాను. ఇప్పటివరకు మిమ్మల్ని సోదరులుగా చూశాను. ఓటేస్తే భవిష్యత్‌లో కూడా అలాగే చూస్తా. నేను చేస్తున్న పనులకు ప్రతిగా జీతం కాకుండా ఓటు అడుగుతున్నాను. మీరు కూడా పనిచేసి జీతం ఇవ్వకపోతే బాధపడరా. నేను పనిచేసి పెట్టినా నాకు ఓటేయకపోతే అప్‌సెట్‌ అవ్వాల్సి వస్తుంది’ అని ఎమ్మెల్యే ప్రీతమ్‌ గౌడ ముస్లింలతో చెప్పారు.
