న్యూఢిల్లీ : యువతలో గుండె పోటు (Heart Attack) మరణాలు ఇటీవల పెరుగుతున్నాయి. హార్ట్ ఎటాక్తో ఎందరో యువకులు కుప్పకూలిన వీడియోలు సోషల్మీడియాలో వెలుగుచూస్తున్నాయి. తాజాగా యూపీలోని ఘజియాబాద్లో 21 ఏండ్ల యువకుడు జిమ్లో ట్రెడ్మిల్పై రన్నింగ్ చేస్తూ కుప్పకూలాడు.
గుండెపోటు కారణంగానే యువకుడు మరణించినట్టు భావిస్తున్నారు. బాధితుడు నోయిడాలోని ఇంజనీరింగ్ కాలేజ్లో ఫస్ట్ ఇయర్ స్టూడెంట్ కాగా, అతడు తల్లితండ్రులకు ఒక్కడే కొడుకు కావడం గమనార్హం. ఖోదా తానా పోలీస్ స్టేషన్ పరిధిలోని సరస్వతి విహార్లో యువకుడు నివసిస్తున్నాడు.
గుండెపోటుతో కుప్పకూలే ముందు బ్లూ టీషర్ట్ ధరించిన యువకుడు ట్రెడ్మిల్పై రన్నింగ్ చేస్తూ కొద్దిసేపు విరామం తీసుకోవడం వీడియోలో కనిపించింది. ట్రెడ్మిల్పై పడిపోయిన యువకుడిని అక్కడున్న వారు ఆస్పత్రికి తరలించారు.
జీవనశైలి మార్పులతో హృద్రోగాలకు చెక్
ఆధునికజీవనశైలిలో మార్పులు, జంక్ ఫుడ్ అధికంగా తీసుకోవడం, నిద్రలేమి, మద్యపానం, ధూమపానం వంటి కారణాలతో పాటు కుటుంబ చరిత్ర కూడా యువతలో గుండెపోటుకు దారితీస్తున్నాయని కార్డియాలజిస్టులు చెబుతున్నారు. ఆరోగ్యకరమైన జీవనశైలి, ఆల్కహాల్, స్మోకింగ్కు దూరంగా ఉండటం, వ్యాయామంతో పాటు రోజుకు కనీసం ఏడు గంటల పాటు నిద్ర వంటి జాగ్రత్తలతో యువతలో హృద్రోగాలను నివారించవచ్చని కార్డియాలజిస్టులు చెబుతున్నారు. పండ్లు, తాజా కూరగాయలు, ఆకుకూరలతో పాటు నట్స్, తృణధాన్యాలను ఆహారంలో తరచూ తీసుకోవాలని సూచిస్తున్నారు.