Women Prisoners Karwa Chauth | జైలులో మహిళా ఖైదీల కర్వా చౌత్‌.. ఫోన్లలో భర్త ఫొటోలు చూసి ఉపవాస దీక్ష విరమణ

Women Prisoners Karwa Chauth | జైలు శిక్ష అనుభవిస్తున్న కొందరు మహిళా ఖైదీలు తమ భర్తల దీర్ఘాయువు కోసం కర్వా చౌత్‌ పూజలు ఆచరించారు. జైలు సిబ్బంది మొబైల్‌ ఫోన్లలో తమ భర్తల ఫొటోలు చూసిన కొందరు మహిళలు తమ ఉపవాస దీక్షను విరమించారు.

లక్నో: జైలు శిక్ష అనుభవిస్తున్న కొందరు మహిళా ఖైదీలు తమ భర్తల దీర్ఘాయువు కోసం కర్వా చౌత్‌ పూజలు ఆచరించారు. జైలు సిబ్బంది మొబైల్‌ ఫోన్లలో తమ భర్తల ఫొటోలు చూసిన కొందరు మహిళలు తమ ఉపవాస దీక్షను విరమించారు. ఉత్తరప్రదేశ్‌లోని లలిత్‌పూర్ జిల్లా జైలులో ఈ సంఘటన జరిగింది. (Women Prisoners Karwa Chauth) పలు కేసుల్లో జైలు శిక్ష అనుభవిస్తున్న ఐదుగురు మహిళా ఖైదీలు తమ భర్తల దీర్ఘాయువు కోసం సాంప్రదాయ కర్వా చౌత్‌ను పాటించారు. ఇద్దరు మహిళా ఖైదీలు అదే జైలులో శిక్ష అనుభవిస్తున్న తమ భర్తలతో కలిసి ఈ ఆచారం నిర్వహించేందుకు జైలు అధికారులు అనుమతించారు. మరో ముగ్గురు మహిళా ఖైదీలు కర్వా చౌత్‌ పూజల తర్వాత మహిళా జైలు సిబ్బంది మొబైల్‌ ఫోన్లలో తమ భర్తల ఫొటోలు చూసి ఉపవాసాన్ని విరమించారు.

కాగా, ఆసక్తి ఉన్న మహిళా ఖైదీలు సాంప్రదాయ కర్వా చౌత్‌ ఆచరించేందుకు జైలు సూపరింటెండెంట్ ప్రశాంత్ ఉపాధ్యాయ్ ప్రత్యేక ఏర్పాట్లు చేశారు. అలాగే ఖైదీల సంక్షేమ నిధులతో మెహందీ, గాజులు, సాంప్రదాయ దుస్తులు, పూజా సామాగ్రి, పండ్లు, స్వీట్లు, ఇతర వస్తువులను సమకూర్చారు.

మరోవైపు మహిళా జైలు సిబ్బంది పర్యవేక్షణలో ఆ ఐదుగురు మహిళా ఖైదీలు ఒకరికొకరు మెహందీ పెట్టుకున్నారు. సాంప్రదాయ పూజలు చేయడంతో పాటు కర్వా చౌత్ కథను విన్నారు. ఈ ఆచారం పాటించేందుకు వీలుగా జైలు ప్రాంగణంలో ఒక ప్రత్యేక స్థలాన్ని అధికారులు ఏర్పాటు చేశారు. చివరగా మహిళా ఖైదీలు జల్లెడ ద్వారా చంద్రుడిని చూసి, తమ భర్తల క్షేమం కోసం ప్రార్థించారు. ఆ తర్వాత ఉపవాస దీక్షను విరమించారు. జైలు అధికారులు వారికి పండ్లు, అల్పాహారం కూడా ఏర్పాటు చేశారు.