Condom | కండోమ్‌తో జాగ్రత్త.. వంధ్యత్వం, క్యాన్సర్‌ రావొచ్చు..!

Condom | కండోమ్స్‌, లూబ్రికెంట్స్‌ కారణంగా భవిష్యత్తులో వంధ్యత్వం, క్యాన్సర్‌ సమస్యలు ఎదురయ్యే ప్రమాదమున్నదని వినియోగదారుల భద్రత వేదిక మామావేషన్‌ సంస్థ ఓ అధ్యయనంలో వెల్లడించింది.

• టాప్‌ బ్రాండ్స్‌ ఉత్పత్తుల్లో విష రసాయనాలు
• లూబ్రికెంట్స్‌లోనూ పీఎఫ్‌ఏఎస్‌ కెమికల్స్ 

(స్పెషల్‌ టాస్క్‌ బ్యూరో) హైదరాబాద్‌, జూలై 30 (నమస్తే తెలంగాణ): కండోమ్స్‌, లూబ్రికెంట్స్‌ కారణంగా భవిష్యత్తులో వంధ్యత్వం, క్యాన్సర్‌ సమస్యలు ఎదురయ్యే ప్రమాదమున్నదని వినియోగదారుల భద్రత వేదిక మామావేషన్‌ సంస్థ ఓ అధ్యయనంలో వెల్లడించింది. పర్యావరణంతో కలిసిపోనటువంటి శాశ్వత రసాయనాలుగా పేర్కొనే పీఎఫ్‌ఏఎస్‌ కెమికల్స్‌ను కండోమ్స్‌ తయారీలో వాడుతున్నారని తెలిపింది. ట్రోజన్‌ ఆల్ట్రా థిన్‌ కండోమ్స్‌, కే-వై జెల్లీ క్లాసిక్‌ లూబ్రికెంట్‌ వంటి ప్రఖ్యాత బ్రాండ్‌ ఉత్పత్తులు సహా పలు కంపెనీల ఉత్పత్తుల్లో పీఎఫ్‌ఏఎస్‌ కెమికల్స్‌ను ఎక్కువ మోతాదులో వాడుతున్నట్టు గుర్తించామని వివరించింది.

ఏమిటీ పీఎఫ్‌ఏఎస్‌ కెమికల్స్‌?

పర్‌-అండ్‌ పాలీఫ్లూలోఆల్కైల్‌ సబ్‌స్టాన్సెస్‌ను పీఎఫ్‌ఏఎస్‌ కెమికల్స్‌గా పిలుస్తారు. 15 వేలకు పైగా సింథటిక్‌ కెమికల్స్‌తో దీన్ని తయారు చేస్తారు. ఎన్నేండ్లయినప్పటికీ ఇవి నీరు, అగ్గి, నూనె, గ్రీజు ఇలా పర్యావరణంలోని ఏ పదార్థంతోనూ కలిసిపోవు. అందుకే వీటిని ఫరెవర్‌ కెమికల్స్‌ (శాశ్వత రసాయనాలు)గా పిలుస్తారు. కార్పెంటింగ్‌, పెయింట్లు, ఫైర్‌ ఫైటింగ్‌ ఫోమ్స్‌లో వీటిని ఎక్కువగా వాడుతారు.

ఏ సమస్యలు రావొచ్చు?

పీఎఫ్‌ఏఎస్‌ కెమికల్స్‌ కలిసిన కండోమ్స్‌, లూబ్రికెంట్స్‌ను వాడితే వంధ్యత్వం, క్యాన్సర్‌తో పాటు కాలేయం దెబ్బతినడం, థైరాయిడ్‌ సమస్యలు, సంతాన లోపాలు, రోగనిరోధక శక్తి తగ్గిపోవడం వంటి సమస్యలు ఎదురవ్వొచ్చని పరిశోధకులు హెచ్చరిస్తున్నారు.