వేగంగా..సులభంగా ఐఆర్‌సీటీసీ కొత్త ఆన్‌లైన్‌ టికెట్‌ బుకింగ్‌ వెబ్‌సైట్‌

ఆన్‌లైన్‌ టికెట్‌ బుకింగ్‌ కోసం భారతీయ రైల్వే ఒక నూతన వెబ్‌సైట్‌ను ప్రారంభించడానికి సిద్ధమవుతున్నది. ఈ కొత్త ప్లాట్‌ఫామ్‌కు చెందిన బీటా వెర్షన్‌పై ఐఆర్‌సీటీసీ పనిచేస్తున్నట్లు తెలుస్తున్నది.

• 15 నుంచి అందుబాటులోకి

న్యూఢిల్లీ, జూలై 11: ఆన్‌లైన్‌ టికెట్‌ బుకింగ్‌ కోసం భారతీయ రైల్వే ఒక నూతన వెబ్‌సైట్‌ను ప్రారంభించడానికి సిద్ధమవుతున్నది. ఈ కొత్త ప్లాట్‌ఫామ్‌కు చెందిన బీటా వెర్షన్‌పై ఐఆర్‌సీటీసీ పనిచేస్తున్నట్లు తెలుస్తున్నది. అప్‌గ్రేడ్‌ చేసిన ఈ వెబ్‌సైట్‌ నెమ్మదిగా జరుగుతున్న అప్‌లోడింగ్‌, సంక్లిష్టమైన క్యాప్చాలు, తరచుగా వచ్చే పాప్‌-అప్‌లు వంటి ప్రయాణికుల దీర్ఘకాలిక సమస్యలను పరిష్కరించడమే లక్ష్యంగా పెట్టుకున్నది.

కొత్త వెబ్‌సైట్‌ విశేషాలు

• టికెట్‌ బుకింగ్‌ను మరింత వేగవంతం, సులభతరం చేయడానికి కొత్త ఐఆర్‌సీటీసీ ప్లాట్‌ఫారమ్‌లో మార్పులు.
• ప్రకటనలు లేని తక్కువ గ్రాఫిక్స్‌తో సరళమైన ఇంటర్‌ఫేస్‌ ఉంటుంది.
• కొత్త క్యాప్చా చిన్నగా, సులభతరంగా ఉంటుంది. లాగిన్‌ అవ్వడానికి, చెల్లింపులకు సమయాన్ని తగ్గిస్తుంది.
• ప్రయాణికులు ఇకపై స్లీపర్‌, 3ఏసీ, 2ఏసీ వంటి అన్ని తరగతుల్లోనూ సీట్ల లభ్యతను ఒక్కొక్కటిగా కాకుండా ఒకే స్క్రీన్‌పై చూసుకోవచ్చు.
• టికెట్‌ బుకింగ్‌ కోసం తక్కువ దశలు ఉండటం వల్ల బుకింగ్‌ సమయం తగ్గుతుంది.
• క్రమం తప్పకుండా ప్రయాణించే ప్రయాణికులు ఇకపై భవిష్యత్‌ బుకింగ్‌ల కోసం తమ వ్యక్తిగత వివరాలను ఒక్కసారి మాత్రమే నింపితే సరిపోతుంది. వీటిని వెబ్‌సైట్‌లో భద్రపరుస్తారు.