డాటా లీకేజీలో భారత్‌ ఆరో స్థానం

• ప్రపంచ సగటుతో పోలిస్తే 15 శాతం ఎక్కువ
• సమాచార భద్రతపై కంపెనీలకు సెర్ట్‌ సూచనలు

న్యూఢిల్లీ, జూన్‌ 13: 2004 నుంచి ప్రతీ వంద మంది భారతీయుల్లో 18 మంది డాటా తస్కరణకు గురయ్యింది. డాటా లీకేజీలో భారత్‌ ప్రపంచంలోనే ఆరో స్థానంలో ఉన్నది. ఈ మేరకు భారతీయుల డాటా భద్రతపై సర్ఫ్‌షార్క్‌ హెచ్చరికలను ఉటంకిస్తూ ఇండియన్‌ కంప్యూటర్‌ ఎమర్జెన్సీ రెస్పాన్స్‌ టీమ్‌ (సెర్ట్‌-ఇన్‌) కీలక వ్యాఖ్యలు చేసింది. పౌరుల సమాచారాన్ని సేకరించే కంపెనీలు ఆ డాటాను భారత పరిధిలోనే నిల్వ చేయాలని పేర్కొంది. పౌరుల సమాచార భద్రత పట్ల తగిన చర్యలు తీసుకోవాలని ఆయా సంస్థలకు సూచించింది.

భారత్‌లో డాటా ఉల్లంఘనలు ఇలా..

• ఈ ఏడాది తొలి త్రైమాసికంతో పోలిస్తే.. జూన్‌ 1 నాటికి డాటా ఉల్లంఘన రేటు 740 శాతం పెరిగింది. ఒక్కో నిమిషానికి ఐదు నుంచి 42 ఖాతాలు సైబర్‌ దాడులకు గురవుతున్నాయి.
• 2004 నుంచి ఇప్పటివరకూ ప్రపంచవ్యాప్తంగా 1,490 కోట్ల ఖాతాల సమాచారం లీక్‌ అయింది. ఇందులో 25.49 కోట్ల ఖాతాలు భారత్‌కు చెందినవే.
• లీక్‌ అయిన సమాచార జాబితాలో పాస్‌వర్డులు, పేర్లు, టెలిఫోన్‌ నంబర్లు వంటివి ఉన్నాయి.
• డాటా లీకేజీలో ప్రపంచ సగటు 23 శాతంగా ఉండగా, భారత్‌లో 38 శాతంగా ఉన్నది. ఇది ఆందోళనకరం.