భారత్‌-ఈయూ ట్రేడ్‌ డీల్‌.. 18 ఏండ్ల తర్వాత కుదిరిన స్వేచ్ఛా వాణిజ్య ఒప్పందం

భారత్‌-యురోపియన్‌ యూనియన్‌ (యూరప్‌లోని 27 సభ్య దేశాలు) మధ్య స్వేచ్ఛా వాణిజ్య ఒప్పందం (ఎఫ్‌టీఏ) ఎట్టకేలకు కుదిరింది. ఈయూ దేశాలకు ఎగుమతి అయ్యే భారత ఉత్పత్తులపై సుంకాలను జీరోకు తీసుకురావడమే లక్ష్యంగా ఈ డీల్‌ రూపొందింది. తాజా డీల్‌తో 99.5 శాతం భారత ఎగుమతులపై సుంకాలు ఎత్తేసినట్టు సమాచారం.

• 99.5 శాతం భారత ఎగుమతులపై సుంకాలు సున్నా
• భారీగా తగ్గనున్న లగ్జరీ కార్లు, ఆల్కహాల్‌, ఔషధ ధరలు
• రైతులు, చిన్న పరిశ్రమలు, ఉద్యోగార్థులకు ఎంతో మేలు
• ‘మదర్‌ ఆఫ్‌ ఆల్‌ డీల్స్‌’గా అభివర్ణించిన ఉర్సులా వాన్‌డెర్‌

(స్పెషల్‌ టాస్క్‌ బ్యూరో) హైదరాబాద్‌, జనవరి 27 (నమస్తే తెలంగాణ) : భారత్‌-యురోపియన్‌ యూనియన్‌ (యూరప్‌లోని 27 సభ్య దేశాలు) మధ్య స్వేచ్ఛా వాణిజ్య ఒప్పందం (ఎఫ్‌టీఏ) ఎట్టకేలకు కుదిరింది. ఈయూ దేశాలకు ఎగుమతి అయ్యే భారత ఉత్పత్తులపై సుంకాలను జీరోకు తీసుకురావడమే లక్ష్యంగా ఈ డీల్‌ రూపొందింది. తాజా డీల్‌తో 99.5 శాతం భారత ఎగుమతులపై సుంకాలు ఎత్తేసినట్టు సమాచారం. మొత్తంగా 9,425 వస్తువులు, సేవలపై జీరో టారిఫ్‌లను విధించినట్టు తెలుస్తున్నది. అంతేకాదు, ఈ డీల్‌తో ఈయూ దేశాల నుంచి దిగుమతి అయ్యే ఖరీదైన కార్లు, ఆల్కహాల్‌, ఫార్మా ఉత్పత్తుల ధరలు కూడా దిగిరానున్నాయి.

ఈ ఒప్పందం ఇరు దేశాల మధ్య వాణిజ్యాన్ని పెంపొందించడమే గాకుండా.. ప్రజాస్వామ్యం, చట్టబద్ధ పాలన, సామరస్యాన్ని మరింత ముందుకు తీసుకెళ్తుందని ప్రధాని మోదీ అన్నారు. రైతులు, చిన్న పరిశ్రమలు, ఈయూ దేశాలకు వెళ్లే ఉద్యోగార్థులకు ఈ ఒప్పందం ఎంతో ప్రయోజనకారిగా ఉంటుందని ఆకాంక్షించారు. ప్రపంచ జీడీపీలో దాదాపు నాలుగో వంతుకు సమాన విలువ కలిగిన ఈ ఒప్పందాన్ని ‘మదర్‌ ఆఫ్‌ ఆల్‌ డీల్స్‌’గా ఐరోపా కమిషన్‌ అధ్యక్షురాలు ఉర్సులా వాన్‌డెర్‌ లెయన్‌ అభివర్ణించారు. తాజా ఒప్పందంతో భారత్‌, ఈయూ దేశాలకు పరస్పర ప్రయోజనం చేకూరుతుందని యూరోపియన్‌ కౌన్సిల్‌ అధ్యక్షుడు ఆంటోనియో కోస్టా ఆశాభావం వ్యక్తం చేశారు.

డీల్‌కు తప్పని సవాళ్లు

భారత్‌-ఈయూ మధ్య స్వేచ్ఛా వాణిజ్య ఒప్పందానికి 2007లోనే చర్చలు మొదలైనా ఆటోమొబైల్స్‌, ఆల్కహాల్‌, ఫార్మా ఉత్పత్తుల దిగుమతి సుంకాలపై ఏకాభిప్రాయం కుదరకపోవడంతో ఆ చర్చలు 2013లో నిలిచిపోయాయి. 2022లో మళ్లీ ప్రారంభమైన ఈ చర్చలు.. ట్రంప్‌ సుంకాల హెచ్చరికల నేపథ్యంలో వేగంగా ముందుకు కదిలాయి. చివరకు తాజాగా ఈ డీల్‌ కుదిరింది. అధికారికంగా ఈ ఒప్పందం కుదిరినప్పటికీ, ట్రేడ్‌ డీల్‌కు సంబంధించిన న్యాయపరమైన అంశాలను పరిష్కరించుకొనేందుకు ఆరు నెలల సమయం పట్టొచ్చని ఆర్థిక విశ్లేషకులు చెబుతున్నారు. ఐరోపా రెగ్యులేటరీ నిబంధనలే దీనికి కారణంగా విశ్లేషిస్తున్నారు.

డీల్‌తో తగ్గే వస్తువుల ధరలు

• మెర్సిడీస్‌, బీఎమ్‌డబ్ల్యూ, ఆడి వంటి లగ్జరీ కార్లు
• ఫ్రాన్స్‌, ఇటలీ, స్పెయిన్‌ నుంచి దిగుమతి చేసుకొనే ఆల్కహాల్‌
• క్యాన్సర్‌ తదితర వ్యాధులను నయం చేసే ఔషధాలు
• మొబైల్స్‌, ఎయిర్‌క్రాఫ్ట్‌ విడిభాగాలు, ఐరన్‌, స్టీల్‌, రసాయన ఉత్పత్తులు

ఒప్పందంతో జరిగేది ఇది

• తాజా డీల్‌తో 99.5 శాతం భారత ఉత్పత్తులపై టారిఫ్‌లు జీరో.
• జౌళి, కెమికల్‌, లెదర్‌, ఆభరణాలు తదితర రంగాల్లో భారతీయులకు మరిన్ని ఉపాధి అవకాశాలు.
• వ్యవసాయోత్పత్తులకు గిరాకీ లభించి రైతులకు మేలు జరుగనున్నది.
• ఈయూ దేశాల్లోని ఐటీ, ఐటీఈఎస్‌, ప్రొఫెషనల్‌, ఎడ్యుకేషన్‌ సర్వీసుల వంటి 144 విభాగాల్లో భారతీయులకు ప్రాధాన్యం. దీంతో ఉద్యోగార్థులకు ఎంతో మేలు చేకూరనున్నది.
• చదువు పూర్తయ్యాక భారతీయ విద్యార్థులు కనీసం తొమ్మిది నెలల పాటు ఈయూలో ఉండేందుకు అవకాశం కల్పించే పోస్ట్‌ స్టడీ వీసా-ఫ్రేమ్‌వర్క్‌కు అనుమతి.

భారత్‌-ఈయూ వాణిజ్యం ఎంతంటే??

• భారత్‌-ఈయూ దేశాల మధ్య వాణిజ్యం విలువ- ప్రపంచ జీడీపీలో 25 శాతం, ప్రపంచ వాణిజ్యంలో మూడింట ఒకవంతు.
• 2024-25లో ఈయూతో భారత్‌ వాణిజ్యం విలువ 136 బిలియన్‌ డాలర్లు.