M K Stalin | పెళ్లి చేసుకుని వెంటనే పిల్లల్ని కనండి.. యువ జంటలకు సీఎం స్టాలిన్‌ పిలుపు

పెళ్లి చేసుకుని వెంటనే పిల్లల్ని కనాలని యువతకు తమిళనాడు సీఎం ఎంకే స్టాలిన్‌ పిలుపునిచ్చారు. ఎక్కువ మంది ఎంపీలు కావాలంటే ఎక్కువ జనాభా ఉండడమే ప్రధాన అర్హతగా కనిపిస్తోందని ఆయన వ్యాఖ్యానించారు.

• జనాభా ప్రాతిపదికన నియోజకవర్గాల పునర్విభజన నేపథ్యంలో సూచన

M K Stalin | నాగపట్టణం(తమిళనాడు), మార్చి 3: పెళ్లి చేసుకుని వెంటనే పిల్లల్ని కనాలని యువతకు తమిళనాడు సీఎం ఎంకే స్టాలిన్‌ పిలుపునిచ్చారు. ఎక్కువ మంది ఎంపీలు కావాలంటే ఎక్కువ జనాభా ఉండడమే ప్రధాన అర్హతగా కనిపిస్తోందని ఆయన వ్యాఖ్యానించారు. సోమవారం నాడిక్కడ ఓ వివాహ కార్యక్రమానికి హాజరైన స్టాలిన్‌ ఈ సందర్భంగా ప్రసంగిస్తూ పాత రోజుల్లో పెళ్లయిన వెంటనే పిల్లల్ని కనవద్దని యువ జంటలకు సలహా ఇచ్చేవారని, అయితే ఇప్పుడు అదే సలహా ఇవ్వలేమని, ఇప్పుడు ఆ అవసరం కూడా లేదని ఆయన చెప్పారు. జనాభా ప్రాతిపదికన నియోజకవర్గాల పునర్విభజన జరుగుతున్నందున ఎక్కువ జనాభా ఉంటే ఎక్కువ ఎంపీ సీట్లు వస్తాయని స్టాలిన్‌ అన్నారు.

జనాభా నియంత్రణపై తమిళనాడు దృష్టి పెట్టి విజయం సాధించిందని, ఇప్పుడు రాష్ర్టానికి ఈ దుస్థితి రావడానికి అదే కారణమని ఆయన వ్యాఖ్యానించారు. నియోజకవర్గాల పునర్విభజన సమస్య తమిళనాడు హక్కులు, ప్రయోజనాల పరిరక్షణకు సంబంధించిందని, దీన్ని కేవలం రాజకీయ సమస్యగా మాత్రమే పరిగణించలేమని స్టాలిన్‌ అభిప్రాయపడ్డారు. ఈ నేపథ్యంలో మార్చి 5న చెన్నైలో అఖిలపక్ష సమావేశాన్ని నిర్వహిస్తున్నామని ఆయన తెలిపారు. గుర్తింపు పొందిన 40 పార్టీలలో అధిక పార్టీలు సమావేశానికి రావడానికి అంగీకారం తెలియజేశాయని చెప్పారు.