ద్వారాలు మూస్తున్న పాశ్చాత్య దేశాలు.. విదేశీ విద్య ఇక ఎండమావేనా?

విదేశాల్లో చదువుకొని అక్కడే స్థిరపడటం.. సుఖమయ జీవనాన్ని ఆస్వాదించడం.. కొన్ని దశాబ్దాలుగా ఎంతోమంది భారతీయులు కల ఇది.. కానీ ఇకపై అది సాధ్యపడే అవకాశాలు సన్నగిల్లుతున్నాయి. అమెరికా నుంచి ఆస్ట్రేలియా వరకు ఆయా ప్రభుత్వాలు విదేశీయుల రాకను నిరోధిస్తూ ఎత్తయిన గోడలు నిర్మిస్తున్నాయి. వీసా ఫీజులు పెంచుతున్నాయి, వేతనం నిబంధనలు విధిస్తున్నాయి, విద్యార్థి వీసాల స్లాట్‌లు తగ్గించివేస్తున్నాయి. గత రెండేండ్ల కాలంలో అమెరికా, బ్రిటన్‌, కెనడా, స్వీడన్‌, ఆస్ట్రేలియా వంటి దేశాలు వలసల నివారణకు నిబంధనలు కఠినతరం చేశాయి.

• ఉద్యోగ నిబంధనలూ కఠినతరం

న్యూఢిల్లీ: విదేశాల్లో చదువుకొని (Foreign Education) అక్కడే స్థిరపడటం.. సుఖమయ జీవనాన్ని ఆస్వాదించడం.. కొన్ని దశాబ్దాలుగా ఎంతోమంది భారతీయులు కల ఇది.. కానీ ఇకపై అది సాధ్యపడే అవకాశాలు సన్నగిల్లుతున్నాయి. అమెరికా నుంచి ఆస్ట్రేలియా వరకు ఆయా ప్రభుత్వాలు విదేశీయుల రాకను నిరోధిస్తూ ఎత్తయిన గోడలు నిర్మిస్తున్నాయి. వీసా ఫీజులు పెంచుతున్నాయి, వేతనం నిబంధనలు విధిస్తున్నాయి, విద్యార్థి వీసాల స్లాట్‌లు తగ్గించివేస్తున్నాయి. గత రెండేండ్ల కాలంలో అమెరికా, బ్రిటన్‌, కెనడా, స్వీడన్‌, ఆస్ట్రేలియా వంటి దేశాలు వలసల నివారణకు నిబంధనలు కఠినతరం చేశాయి.

• అమెరికా: హెచ్‌-1బీ వీసా ఫీజును లక్ష డాలర్లకు పెంచేసింది. పౌరసత్వ హోదా విషయంలో పలు మార్పులను ప్రకటించింది. గ్రీన్‌ కార్డు బ్యాక్‌లాగ్‌లకు కఠిన నిబంధనలు అమలు చేస్తున్నది. విదేశీ విద్యార్థులు, ఉద్యోగుల సోషల్‌ మీడియా పోస్ట్‌లను తనిఖీ చేస్తూ.. వాటి ఆధారంగా వారిని దేశం నుంచి వెళ్లగొడుతున్నది. విద్యానంతర నిబంధనలను మరింత కఠినం చేసింది.
• బ్రిటన్‌: బ్రిటన్‌లో వర్క్‌ వీసా పొందాలంటే ఏడాది కనీసం 41,700 పౌండ్లు సంపాదించాలి. ఉద్యోగ నైపుణ్యత స్థాయిని కూడా పెంచింది. విదేశీయులు లెవల్‌ 6 (పట్టభద్రులు ఆపై ఉన్నత విద్యావంతులు) వారు మాత్రమే బ్రిటన్‌లో ఉపాధి పొందేందుకు అర్హులుగా నిర్ణయించింది.
• స్వీడన్‌: వర్క్‌ పర్మిట్ల కోసం దరఖాస్తు చేసుకొనే విదేశీయులు నెలకు కనీసం 29,680 ఎస్‌ఈకే (ఆ దేశ కరెన్సీ) సంపాదించాలని నిబంధన విధించింది. గతంలో ఇక్కడ చదువుకున్న విదేశీయులు కనీసం మధ్య తరహా ఉద్యోగాలు చేస్తూ అక్కడే స్థిరపడేందుకు ప్రయత్నించేవారు. కానీ పెంచిన వేతన నిబంధనల నేపథ్యంలో మధ్యతరగతి ఉద్యోగులు అంత మొత్తం సంపాదించడం అసాధ్యంగా మారింది.
• కెనడా, ఆస్ట్రేలియా: విద్యార్థులు, ఉద్యోగుల వలసలకు ఇచ్చే అనుమతిని కెనడా ఈ ఏడాది 10-16 శాతం తగ్గించింది. విదేశీయుల వలసలను నివారించాలన్న విస్తృత వ్యూహంలో భాగంగానే ఈ నిర్ణయం తీసుకుంది. ఆస్ట్రేలియా కూడా విదేశీ విద్యార్థులకిచ్చే వీసాలను 34 శాతం తగ్గించింది. కాలేజీల్లో విదేశీయులకు ఫీజులు పెంచి, వీసాల మంజూరుకు నిబంధనలు కఠినతరం చేసింది.

80 వేల వీసాలను రద్దు చేసిన ట్రంప్‌ సర్కార్‌

వాషింగ్టన్‌: అమెరికా అధ్యక్షుడిగా ట్రంప్‌ రెండోసారి అధికారం చేపట్టిన తర్వాత ఇప్పటివరకు దాదాపు 80,000 వర్క్‌, స్టూడెంట్‌ వీసాలను రద్దు చేశారు. యూఎస్‌ స్టేట్‌ డిపార్ట్‌మెంట్‌ సీనియర్‌ అధికారిని ఉటంకిస్తూ న్యూస్‌ మ్యాగజైన్‌ ‘వాషింగ్టన్‌ ఎగ్జామినర్‌’ ఈ విషయం వెల్లడించింది. రద్దయిన వాటిల్లో స్టూడెంట్‌ వీసాలు 8 వేలకు పైగా ఉన్నాయని తెలిపింది. గతంతో పోల్చితే నాన్‌-ఇమిగ్రెంట్‌ వీసాల రద్దు రెట్టింపు అయ్యిందని, పాలస్తీనీయన్లకు సంఘీభావం తెలిపినా, ఇజ్రాయెల్‌ చర్యల్ని విమర్శించినా.. విదేశీయులపై బహిష్కరణ వేటు వేసేందుకు ట్రంప్‌ యంత్రాంగం సిద్ధమైందని వార్తా కథనం తెలిపింది.