ఆ భారం కేంద్రానిదే

విద్యుత్తు రంగానికి కొత్త జవసత్వాలు తెస్తామంటూ గప్పాలు కొట్టిన కేంద్రంలోని బీజేపీ సర్కారు.. ఆ రంగాన్ని దొంగదెబ్బతీస్తున్నది. విద్యుత్తు పంపిణీ సంస్థలపై కత్తిగట్టిన కేంద్రం.. డిస్కంలకు వస్తున్న నష్టాలను పూడ్చకుండా ఆ భారాన్ని ప్రజలమీద మోపడానికి కుట్రకు తెరతీసింది. ఈ మేరకు ప్రతిపాదనలు కూడా సిద్ధం చేసింది. దీనిపై సర్వత్రా విమర్శలు వ్యక్తమవుతున్నాయి.

• నష్టాలను ప్రజలపై రుద్దుతారా?
• కేంద్రం ఏకపక్ష నిబంధనలతోనే విద్యుత్తు డిస్కంలకు కష్టాలు
• సీఎంలకు కేంద్రప్రభుత్వ మాజీ కార్యదర్శి శర్మ లేఖ
• కేంద్రం డ్రాఫ్ట్‌ ఎలక్ట్రిసిటీ సవరణ నిబంధనలపై ధ్వజం

(స్పెషల్‌ టాస్క్‌ బ్యూరో)
హైదరాబాద్‌, ఏప్రిల్‌ 24 (నమస్తే తెలంగాణ): విద్యుత్తు రంగానికి కొత్త జవసత్వాలు తెస్తామంటూ గప్పాలు కొట్టిన కేంద్రంలోని బీజేపీ సర్కారు.. ఆ రంగాన్ని దొంగదెబ్బతీస్తున్నది. విద్యుత్తు పంపిణీ సంస్థలపై కత్తిగట్టిన కేంద్రం.. డిస్కంలకు వస్తున్న నష్టాలను పూడ్చకుండా ఆ భారాన్ని ప్రజలమీద మోపడానికి కుట్రకు తెరతీసింది. ఈ మేరకు ప్రతిపాదనలు కూడా సిద్ధం చేసింది. దీనిపై సర్వత్రా విమర్శలు వ్యక్తమవుతున్నాయి. డిస్కంల నష్టాల్లో సగం మొత్తాన్ని ప్రజల నుంచి వసూలు చేయాలన్న కేంద్రం నిర్ణయాన్ని కేంద్రప్రభుత్వ మాజీ కార్యదర్శి ఈఏఎస్‌ శర్మ తీవ్రంగా వ్యతిరేకించారు. డిస్కంల నష్టాలను భరించాల్సింది కేంద్రమే గానీ, వినియోగదారులు కాదని ఆయన తేల్చిచెప్పారు. కేంద్రప్రభుత్వం పెడుతున్న నిబంధనలే డిస్కంల నష్టాలకు కారణమని ధ్వజమెత్తారు. కేంద్రం చర్యను ఏకపక్షపూరితమైనదిగా అభివర్ణించారు. ఈ మేరకు పలు రాష్ర్టాల ముఖ్యమంత్రులకు లేఖ రాశాలు.

మాజీ కార్యదర్శి లేఖలోని ముఖ్యాంశాలు

• డిస్కంల నష్టాల్లో సగం వినియోగదారుల మీద వేయాలన్న కేంద్రంలోని బీజేపీ సర్కారు నిర్ణయం ఏకపక్షమైనది. లోపభూయిష్టంగా డిస్కంలపై తాము పెడుతున్న కొర్రీల వల్లే అవి నష్టాల్లో మునిగిపోయాయన్న సత్యాన్ని కేంద్రం విస్మరిస్తున్నది.
• సెంట్రలైజ్డ్‌ సోలార్‌ పవర్‌ జనరేషన్‌ ప్లాంట్ల నుంచి విద్యుత్తును కొనుగోలు చేయాలని మినిస్ట్రీ ఆఫ్‌ పవర్‌.. డిస్కంలకు పలు నిబంధనలు పెడుతున్నది. ఒకవిధంగా అలా చేస్తే, వినియోగదారులకు సరఫరా చేసే యూనిట్‌ విద్యుత్తు ధర ఎక్కువగా ఉంటుంది. దీంతో డిస్కంలకు ఏ నిర్ణయం తీసుకోలేని పరిస్థితి ఎదురవుతున్నది.
• విద్యుదుత్పత్తి ప్లాంట్లకు సకాలంలో తగినంత బొగ్గు సరఫరా చేయకపోవడంతో దేశంలోని పలు పవర్‌ ప్లాంట్లు ఇటీవల తాత్కాలికంగా విద్యుదుత్పత్తిని నిలిపేశాయి. రైళ్ల ద్వారా బొగ్గు సరఫరా, ఇతర కార్యాచరణపై కేంద్రం ముందుచూపుతో వ్యవహరించకపోవడమే దీనికి కారణం. అయితే దీన్ని పక్కనబెట్టిన కేంద్రం.. దేశంలోని విద్యుత్తు సంక్షోభానికి తాము కారణం కాదని చేతులు దులుపుకున్నది.
• విద్యుత్తు సంక్షోభ నివారణకు విదేశాల నుంచి బొగ్గు దిగుమతి చేసుకోవాలంటూ రాష్ర్టాలకు కేంద్రం మరో ఉచిత సలహా కూడా ఇచ్చింది. అయితే, విదేశాల్లో ఉన్న కొన్ని థర్మల్‌ ప్లాంట్లు కేంద్రంలోని పెద్దల ఆప్తమిత్రులకు చెందినవే ఉండటం గమనార్హం.
• దేశంలో కృత్రిమంగా సృష్టించిన విద్యుత్తు సంక్షోభాన్ని ఆసరాగా తీసుకొన్న కొందరు కార్పొరేట్లు బొగ్గు ధరలను పెంచి ఇష్టంవచ్చిన రీతిన దోచుకొన్నారు. ఇది డిస్కంలపై పెను భారాన్ని మోపింది.
• ఒకవేళ కేంద్రం ముందుచూపుతో వ్యవహరించి ఉంటే, దేశీయంగా తక్కువ ధరకే దొరికే బొగ్గుతో విద్యుదుత్పత్తి జరిగేది. డిస్కంలకు నష్టాలు తప్పేవి.
• వినియోగదారులకు డిస్కంలు సరఫరా చేసే విద్యుత్తులో 80 శాతం ఖర్చు.. విద్యుదుత్పత్తికే అవుతున్నది. విద్యుదుత్పత్తి ప్లాంట్లను ప్రైవేటుపరం చేస్తూ కేంద్రంతీసుకొన్న మతిలేని నిర్ణయంతో రాష్ర్టాలు ఆయా ప్రైవేట్‌ కంపెనీలతో విద్యుత్తు కొనుగోలు ఒప్పందాలు (పీపీఏ) చేసుకోవాల్సి వచ్చింది. దీని కోసం బ్యాంకుల్లో రుణాలు కూడా తీసుకోవాల్సిన దుస్థితి దాపురించింది.
• ప్రైవేట్‌ కంపెనీలు సామాజిక కోణంలో కాకుండా లాభార్జనే ధ్యేయంగా పనిచేస్తాయన్న విషయం తెలిసిందే. అలాంటి కంపెనీలు సరఫరా చేసే విద్యుత్తు ధర కచ్చితంగా ఎక్కువగానే ఉంటుంది. దీంతో విద్యుత్తు ధరలను తగ్గించడానికి పీపీఏల్లో సవరణలకు రాష్ర్టాలు సంప్రదింపులు జరిపితే, దాన్ని కూడా కేంద్రం అడ్డుకొన్నది.
• కేంద్రం, రాష్ర్టాల మధ్య విద్యుత్తు అనేది ఉమ్మడి అంశం. సమాఖ్య స్ఫూర్తిని అనుసరిస్తూ విద్యుత్తు సరఫరాకు సంబంధించి లాభ, నష్టాల బాధ్యత రాష్ర్టాలతో పాటు కేంద్రానిది కూడా. అయితే, దీన్ని మరిచిపోతున్న కేంద్రం.. నష్టాల నెపాన్ని రాష్ర్టాలు, డిస్కంలు, వినియోగదారులకు అంటగట్టాలని చూస్తున్నది.
• కేంద్రం ఏకపక్ష నిర్ణయాలను ఎప్పటికప్పుడూ రాష్ర్టాలు ఎండగట్టాలి. తద్వారా వినియోగదారులపై భారం పడకుండా చూడాలి.