Election Commission | ఎన్నికల సంఘానికి మాజీ ఐఏఎస్, ఐఎఫ్‌ఎస్ అధికారుల మద్దతు.. 124 మంది బహిరంగ లేఖ

Election Commission : 124 మంది మాజీ ఐఏఎస్, ఐఎఫ్‌ఎస్‌లు ఎన్నికల సంఘానికి (ఈసీ) మద్దతు తెలిపారు. ఈ మేరకు వారంతా శనివారం బహిరంగ లేఖ రాశారు. ఈ లేఖలో ఎన్నికల సంఘం పనితీరు, వ్యవస్తలో వచ్చిన మార్పులపై ప్రస్తావించారు.

Election Commission : ఎన్నికల సంఘం పనితీరు, సర్ పేరిట అవకతవకలు, సీఈసీ రాజీనామా అంశంపై దేశవ్యాప్తంగా చర్చ జరుగుతున్న సంగతి తెలిసిందే. సీఈసీని, సర్‌ను ప్రతిపక్షాలు వ్యతిరేకిస్తుంటే.. పలువురు మద్దతు ప్రకటిస్తున్నారు. ఇప్పటికే సుప్రీంకోర్టు, హైకోర్టులకు చెందిన మాజీ జడ్జీలు సీఈసీకి మద్దతు తెలిపారు. ఇప్పుడు 124 మంది మాజీ ఐఏఎస్, ఐఎఫ్‌ఎస్‌లు ఎన్నికల సంఘానికి (ఈసీ) మద్దతు తెలిపారు. ఈ మేరకు వారంతా శనివారం బహిరంగ లేఖ రాశారు.

ఈ లేఖలో ఎన్నికల సంఘం పనితీరు, వ్యవస్తలో వచ్చిన మార్పులపై కీలక అంశాల్ని ప్రస్తావించారు. సరైన ఆధారాలు లేకుండా ఓట్ల చోరీ అంటూ ఆరోపణలు చేస్తున్నారని విమర్శించారు. వారి లేఖ ప్రకారం.. గతంలో ఎన్నికల సమయంలో బూత్‌లను ఆక్రమించడం, బ్యాలెట్ బాక్సులు ఎత్తుకెళ్లడం, హింసకు పాల్పడటం వంటివి నిత్యం జరిగేవి. ఇప్పటి ఎన్నికల విధానంలో ఇలాంటివి లేకుండా అనేక దశల్లో తనిఖీలు, రక్షణ చర్యలు ఉన్నాయి. పోలింగ్ ఏజెంట్లను నియమించడం, ఈవీఎంలకు సీలింగ్ వేయడం, స్ట్రాంగ్ రూంలలకు సెక్యూరిటీ ఏర్పాటు చేయడం, వీవీప్యాట్‌ల తనిఖీ వంటివి జరుగుతున్నాయి.

తాము గెలిచినప్పుడు ఎన్నికల వ్యవస్థ సరిగ్గానే ఉన్నట్లు, ఓడినప్పుడు వ్యవస్థలో అక్రమాలు జరిగాయనడం సరికాదు. కేంద్రంలో అధికారంలో ఉన్న పార్టీ, కూటమి.. అనేక రాష్ట్రాల్లో ఓడిపోయిన సంగతిని గుర్తించాలి. బలమైన ఆధారాలు లేకుండా వోట్ల చోరీ అంటూ ఎన్నికల సంఘం పనితీరుపై ఆరోపణలు చేయడం సరికాదు అంటూ లేఖలో ప్రస్తావించారు. సర్ ప్రక్రియకు మద్దతు తెలిపారు. లేఖ రాసిన వారిలో కేంద్ర విదేశాంగ శాఖ మాజీ సెక్రెటరీ కన్వల్ సిబల్, మాజీ ఐఏఎస్‌లు ఆర్డీ కపూర్, సమిరేంద్ర చటర్జీ, గోపాల క్రిష్ణ, వివేక్ భరద్వాజ్, నవ్నీత్ సెహగల్ వంటి ప్రముఖులున్నారు.