Supreme Court | ఈవీఎం డాటా తొలగించొద్దు.. ట్యాంపరింగ్‌ ఆరోపణలొస్తే ఇంజినీర్‌తో చెక్‌ చేయించాల్సిందే: సుప్రీంకోర్టు

ఎన్నికలు ముగిసిన తర్వాత ఈవీఎంలలో (ఎలక్ట్రానిక్‌ ఓటింగ్‌ మెషిన్‌) నిక్షిప్తమైన డాటాను తొలగించొద్దని ఎన్నికల సంఘానికి (ఈసీ) సుప్రీంకోర్టు ఆదేశాలు జారీ చేసింది.

• ఈసీకి సుప్రీంకోర్టు ఆదేశాలు
• ‘డాటా డిలీట్‌’ ఎందుకని ప్రశ్న

Supreme Court | హైదరాబాద్‌, ఫిబ్రవరి 11 (స్పెషల్‌ టాస్క్‌ బ్యూరో, నమస్తే తెలంగాణ): ఎన్నికలు ముగిసిన తర్వాత ఈవీఎంలలో (ఎలక్ట్రానిక్‌ ఓటింగ్‌ మెషిన్‌) నిక్షిప్తమైన డాటాను తొలగించొద్దని ఎన్నికల సంఘానికి (ఈసీ) సుప్రీంకోర్టు ఆదేశాలు జారీ చేసింది. ఈవీఎం ట్యాంపరింగ్‌ జరిగినట్టు ఓటమిపాలైన అభ్యర్థి ఎవరైనా ఆరోపిస్తే, ఇంజినీర్‌ సమక్షంలో ఆ డాటాను విశ్లేషించాల్సిందేనని పేర్కొంది. ఎన్నికలు పూర్తైన తర్వాత ఈవీఎంలకు సంబంధించి ఎలాంటి నిర్ణీత ప్రమాణాలు (స్టాండర్డ్‌ ఆపరేటింగ్‌ ప్రొసీజర్లు-ఎస్‌వోపీలు) పాటిస్తున్నారంటూ ఈసీని ఈ సందర్భంగా ధర్మాసనం ప్రశ్నించింది. అసోసియేషన్‌ ఫర్‌ డెమోక్రటిక్‌ రిఫామ్స్‌ (ఏడీఆర్‌), హర్యానాకు చెందిన రాజకీయ నేతలు దాఖలు చేసిన పిటిషన్లపై భారత ప్రధాన న్యాయమూర్తి(సీజేఐ) జస్టిస్‌ సంజీవ్‌ఖన్నా, జస్టిస్‌ దీపాంకర్‌ దత్త్తాతో కూడిన ద్విసభ్య ధర్మాసనం మంగళవారం విచారణ చేపట్టింది.

ఏమిటీ కేసు?

ఓట్ల లెక్కింపు పూర్తైన తర్వాత కూడా ఈవీఎంలలో డాటాను తొలగించకూడదని, ఈవీఎంలు ట్యాంపరింగ్‌కు గురికాలేదని నిరూపించడానికి ఈవీఎంలలోని మైక్రో కంట్రోలర్‌, బర్న్‌ మెమొరీని ఇంజినీర్ల బృందం చేత తనిఖీ చేయించాలని కోరుతూ ఏడీఆర్‌, కొందరు హర్యానా నేతలు సుప్రీంకోర్టును ఆశ్రయించారు. కోర్టు గత ఏడాది ఏప్రిల్‌లో ఇచ్చిన ఆదేశాలను ఈసీ పాటించాలని పిటిషన్‌లో కోరారు.

సుప్రీంకోర్టు కీలక వ్యాఖ్యలు

• ఓట్ల లెక్కింపు పూర్తైన తర్వాత కూడా ఈవీఎంలలో డాటాను తొలగించకూడదు. కొత్తగా ఏ సమాచారాన్ని జోడించకూడదు.
• ఈవీఎం ట్యాంపరింగ్‌ జరిగినట్టు ఎన్నికల్లో ఓటమిపాలైన అభ్యర్థి ఎవరైనా ఆరోపిస్తే ఇంజినీర్ల బృందం చెక్‌ చేయాల్సిందే.
• ట్యాంపరింగ్‌ ఆరోపణలు చేసిన అభ్యర్థి సమక్షంలో ఈవీఎంలను తయారు చేసిన సంస్థలు) చెందిన ఇంజినీర్లు ఈ తనిఖీలు చేపట్టాలి.
• ఆరోపించిన అభ్యర్థికి ఈవీఎం ట్యాంపరింగ్‌ జరుగలేదని నిరూపించాలి. అంతేగానీ, తనిఖీల పేరిట పూర్తి డాటాను డిలీట్‌ చేయడం ఎందుకు?
• అందుకనే.. తనిఖీల్లో భాగంగా ఈవీఎంలలోని అసలు డాటాను వెలికితీయడానికి ముందు ఆ డాటాను డమ్మీ ఈవీఎంలలో నిక్షిప్తం చేయాలి. ఆ తర్వాత ఇంజినీర్ల బృందం మైక్రో కంట్రోలర్‌, ఈవీఎంలలో బర్న్‌ చేసిన మెమొరీని తనిఖీ చేయాలి.
• ఈవీఎంలను వెరిఫై చేయాలనుకొనే వారు రూ. 40 వేలను ఫీజుగా చెల్లించాల్సి ఉన్నది. ఇది చాలా ఎక్కువ. ఈ ఫీజును తగ్గించాలి.