Baby jain monk | జైన సన్యాసిగా వజ్రాల వ్యాపారి ముద్దుల కూతురు.. 9 ఏండ్లకే సన్యాసినిగా కోటీశ్వరురాలు దీక్ష

Baby jain monk | సూరత్‌కు చెందిన వజ్రాల వ్యాపారి మనవరాలు దేవాన్షీ జైన సన్యాస దీక్ష చేపట్టింది. వేల మంది సమక్షంలో ఈ 9 ఏండ్ల చిన్నారి జైన సన్యానిగా మారింది. చిన్నారి తల్లిదండ్రులు అదృష్టంగా భావిస్తున్నారు.

Baby jain monk | నిన్నటి వరకు ఆ చిన్నారి కోటీశ్వరురాలు ముద్దుల తనయ. తెల్లవారగానే సన్యాసినిగా మారిపోయింది. జైనాచార్య చేతుల మీదుగా సన్యాసం తీసుకున్నది. దాదాపు 35 వేల మంది సమక్షంలో దీక్ష స్వీకరించింది. ఈ 9 ఏండ్ల చిన్నారి సూరత్‌కు చెందిన వజ్రాల వ్యాపారి సంఘ్వీ మోహన్‌భాయ్ మనవరాలు దేవాన్షీ.

సూరత్‌కు చెందిన వజ్రాల వ్యాపారి ధనేష్‌-అమీబెన్‌ దంపతులు కుమార్తె దేవాన్సీ.. బుధవారం ఉదయం 6 గంటలకు జైన సన్యాసం దీక్ష స్వీకరించింది. నిజానికి దీక్షా మహోత్సవం నాలుగు రోజుల క్రితమై ప్రారంభమైంది. ఇవాళ జైనాచార్య కీర్తియాశ్సూరీశ్వర్‌ మహరాజ్‌ సమక్షంలో దీక్ష చేపట్టింది. ఈ చిన్నారి దీక్షా కార్యక్రమాన్ని వీక్షించేందుకు సూరత్‌, పరిసర గ్రామాల నుంచి దాదాపు 35 వేల మంది తరలివచ్చారు. దేవాన్షీ వర్షిదన్‌ యాత్ర సూరత్‌లోనే జరిగింది. ఈ యాత్రలో 4 ఏనుగులు, 20 గుర్రాలు, 11 ఒంటెలు పాల్గొన్నాయి. అంతకుముందు దేవాన్షీ వర్షిదన్‌ యాత్ర ముంబై, ఆంట్‌వెర్ప్‌లో కూడా జరిగింది.

ఈ చిన్నారికి 5 భాషల్లో పరిజ్ఞానం ఉన్నది. సంగీతంతోపాటు స్కేటింగ్‌, మెంటల్‌ ఎబిలిటీ మ్యాథ్స్‌, భరతనాట్యంలో ప్రావీణ్యురాలు. వైరాగ్య శతకం, తత్వార్థ అధ్యాయ్‌ వంటి గ్రంథాలను కంఠస్థం చేశారు. తమ కుమార్తె జైన మతంలో నిషేధించిన వాటిని ఏనాడూ ఉపయోగించలేదని, కనీసం టీవీ కూడా చూడలేదని తల్లి అమీ బెన్‌ చెప్పారు. మత సంబంధ పరిజ్ఞానంతో పాటు క్విజ్‌లో ఎప్పుడూ దేవాన్షీదే పైచేయి అని తెలిపారు. చిన్ననాటి నుంచే జైన మతం ఆచారాలు, వ్యవహారాలు, పద్ధతులపై అవగాహన పెంచుకున్నదని, సన్యాస దీక్ష తీసుకోవడం తమ కుటుంబం అదృష్టమని అమీబెన్‌, ధనేష్‌ చెప్తున్నారు.