నేనే 80 మృతదేహాలు పాతిపెట్టా!.. సంచలన విషయాలను వెల్లడించిన ధర్మస్థల సాక్షి

ధర్మస్థల ఆలయ పాలకుల ఆదేశం మేరకే ఒకే ప్రదేశంలో 70-80 మృతదేహాలను తానే స్వయంగా పాతిపెట్టానని ధర్మస్థల సామూహిక ఖననాల కేసులో ప్రధాన సాక్షి, హక్కుల కార్యకర్త వెల్లడించారు.

• ఆలయ పాలకుల ఆదేశాల మేరకే ఆ పనులు చేశాను
• అడవుల్లో, కొండల్లో, పాత రోడ్లపైనఖననం చేసేవాళ్లం
• 100 మృతదేహాల్లో 90 మహిళలవే

న్యూఢిల్లీ, ఆగస్టు 14: ధర్మస్థల ఆలయ పాలకుల ఆదేశం మేరకే ఒకే ప్రదేశంలో 70-80 మృతదేహాలను తానే స్వయంగా పాతిపెట్టానని ధర్మస్థల సామూహిక ఖననాల కేసులో ప్రధాన సాక్షి, హక్కుల కార్యకర్త వెల్లడించారు. ధర్మస్థల ఆలయ పాలనా యంత్రాంగం కింద పారిశుద్ధ్య కార్మికుడిగా గతంలో పనిచేసిన హక్కుల కార్యకర్త ఇండియా టుడేకి ఇచ్చిన తాజా ఇంటర్వ్యూలో అనేక సంచలన విషయాలు బయటపెట్టారు. ఎటువంటి మరణ ధ్రువీకరణ పత్రాలు లేకుండా అటవీ ప్రాంతంలో తానే అనేక మృతదేహాలను గొయ్యితీసి పాతిపెట్టినట్లు తెలిపారు.

గడచిన రెండు దశాబ్దాలలో ఆలయ పర్యవేక్షకుల ఒత్తిడిపైన పిల్లలు, మహిళలతోసహా పదుల సంఖ్యలో మృతదేహాలను తానే ఖననం చేసినట్లు ఆయన పోలీసులకు వెల్లడించిన తర్వాత ఈ కేసు వెలుగుచూసింది. దీనిపై ప్రజల నుంచి పెద్ద ఎత్తున ఆందోళన వ్యక్తం కావడంతో కర్ణాటకలోని ధర్మస్థల పట్టణం పతాక శీర్షికలకు ఎక్కింది. ఈ వ్యవహారాన్ని దర్యాప్తు చేసేందుకు రాష్ట్ర ప్రభుత్వం ప్రత్యేక దర్యాప్తు బృందాన్ని(సిట్‌) ఏర్పాటు చేసింది. ఇప్పటివరకు 15 ప్రదేశాలలో తవ్వకాలు జరపగా సైట్‌ నంబర్‌ 6లో మాత్రం ఓ మానవ అస్థిపంజరం కనిపించింది. సైట్‌ నంబర్‌ 13లో తాను 70-80 మృతదేహాలను పాతిపెట్టినట్లు సాక్షి వెల్లడించారు. తాము చాలా లోతుగా తవ్వి మృతదేహాలను పాతిపెట్టామని ఆయన చెప్పారు.

సాక్షి వెల్లడించిన సంచలన విషయాలు

• స్థానిక ప్రభుత్వం, లేదా గ్రామ పంచాయతీకి చెప్పకుండా నేరుగా ఆలయ పాలకులే ఆదేశాలు జారీచేసేవారు.
• అటవీ ప్రాంతాలు లేదా పాత రోడ్లపైన మాత్రమే మృతదేహాలను పాతిపెట్టేవాళ్లం. శ్మశాన వాటికల్లో ఎప్పుడూ పాతిపెట్టలేదు. వాళ్లు ఎక్కడ తవ్వమంటే అక్కడ తవ్వేవాళ్లం.
• చాలా మృతదేహాలపై లైంగిక దాడి జరిగినట్లు స్పష్టమైన ఆనవాళ్లు ఉన్నాయి. దాదాపు 100 మృతదేహాలను మా బృందం పాతిపెట్టింది. అందులో 90 మృతదేహాలు మహిళలవే ఉన్నాయి.
• ఆలయ మేనేజర్‌ నన్ను ఎప్పుడూ నేరుగా పిలవలేదు. రూమ్‌ బాయ్‌తో కబురు పంపేవారు.
• వర్షాల కారణంగా భూమి కోతకు గురికావడం, అడవులు పెరగడం, నిర్మాణ పనుల కారణంగా పాతిపెట్టిన కొన్ని స్థలాలు కనిపించకుండా పోయాయి.
• పగటివేళల్లో మేము మృతదేహాలను పాతిపెట్టేటప్పుడు స్థానికులు కొందరు చూశారు. ఎవరూ మమ్మల్ని ఆపడం కాని ప్రశ్నించడం కాని చేయలేదు.
• మృతదేహాల నగలను దోచుకుని ఆలయాన్ని అప్రతిష్ట పాల్జేయడానికి ప్రయత్నిస్తున్నానని కొందరు చేస్తున్న ఆరోపణలు తప్పు. ఆలయ ప్రతిష్టను నాశనం చేస్తే నాకేమొస్తుంది? నేను షెడ్యూల్డు కులాలకు చెందిన హిందువును.
• పదేళ్ల తర్వాత ఎందుకు ఈ విషయాలు చెబుతున్నావని నన్ను అడుగుతున్నారు. గతంలో నేను చేసిన పనులతో అపరాధభావం నన్ను వెంటాడుతోంది. నాకు కలలో అస్థిపంజరాలు కనిపిస్తున్నాయి.
• మృతదేహాలకు చెందిన అవశేషాలను వెలికితీసేందుకు మరింత విస్తృతంగా తవ్వకాలను సిట్‌ చేపడుతుందని నమ్ముతున్నాను. వారు నన్ను నమ్ముతున్నట్లు అనిపించకపోయినా నేను మాత్రం వారిని నమ్ముతున్నాను. అప్పటి పరిసరాలు ఇప్పుడు లేవు. అయినప్పటికీ నా జ్ఞాపకశక్తినే నమ్ముకుంటున్నాను.