Visit:
న్యూఢిల్లీ: అసోసియేటెడ్‌ జర్నల్స్‌ లిమిటెడ్‌ (ఏజేఎల్‌)ను కాంగ్రెస్‌ మాజీ అధ్యక్షులు సోనియా గాంధీ, రాహుల్‌ గాంధీ అక్రమంగా స్వాధీనం చేసుకున్నారని ఢిల్లీ పోలీసు శాఖలోని ఆర్థిక నేరాల విభాగం (ఈఓడబ్ల్యూ) ఆరోపించింది. ఈ మేరకు ఎఫ్‌ఐఆర్‌ను దాఖలు చేసింది. ఈ కేసులో వీరిద్దరితోపాటు మరో ఆరుగురిని నిందితులుగా పేర్కొంది. ఈ కంపెనీ అంతకుముందు కాంగ్రెస్‌ పార్టీకి సంబంధించినదని, దానికి రూ.2,000 కోట్ల మేరకు ఆస్తులు ఉన్నాయని, ఆ కంపెనీని తప్పుడు విధానంలో తమ నియంత్రణలోకి తీసుకోవడం కోసం సోనియా, రాహుల్‌తోపాటు వారి సహచరులు కలిసికట్టుగా పని చేశారని గతంలో నమోదైన కేసు ఆధారంగా ఈ ఛార్జిషీటును దాఖలు చేసింది.
అక్టోబర్‌ 3న నమోదైన ఎఫ్‌ఐఆర్‌ ప్రకారం, సోనియా, రాహుల్‌లకు కలిపి 76 శాతం వాటాలున్న యంగ్‌ ఇండియన్‌ కంపెనీ ద్వారా ఈ స్వాధీనం జరిగింది. ఎన్‌ఫోర్స్‌మెంట్‌ డైరెక్టరేట్‌ (ఈడీ)కి చెందిన హెడ్‌క్వార్టర్స్‌ ఇన్వెస్టిగేటివ్‌ యూనిట్‌ (హెచ్‌ఐయూ) సమర్పించిన ఫిర్యాదు నేపథ్యంలో ఢిల్లీ పోలీసులు చర్యలు ప్రారంభించారు.
