Visit:
Judge obscene video | ఓ జడ్జికి సంబంధించిన అభ్యంతరకర వీడియో సోషల్ మీడియాలో వైరల్‌ కాకుండా చూడాలని ఢిల్లీ హైకోర్ట్‌ ఆదేశాలు జారీ చేసింది. బుధవారం అర్ధరాత్రి ఈ ఉత్తర్వులను కేంద్ర ప్రభుత్వ అధికారులకు అందజేసింది. ఈ ఉత్తర్వులు వెలువడటాని కంటే ముందే సదరు న్యాయమూర్తిని ఉన్నతాధికారులు సస్పెండ్ చేసినట్లు సమాచారం.
రూస్‌ అవెన్యూ కోర్టు క్యాబిన్‌లో మహిళా ఉద్యోగితో ఓ జడ్జి అభ్యంతరకరంగా ఆ వీడియోలో ఉన్నట్లు తెలుస్తున్నది. ఈ వీడియో వల్ల వ్యక్తుల గోప్యత హక్కుకు కోలుకోలేని నష్టం వాటిల్లే అవకాశం ఉన్నదని జస్టిస్ యశ్వంత్ వర్మ ఉత్తర్వులు జారీ చేశారు. ఈ వీడియోను సామాజిక మాధ్యమాల్లో వ్యాప్తి చెందకుండా ఆపాలని ఉత్తర్వుల్లో ఆదేశించారు.
వీడియో వైరల్‌గా కాకుండా నిలుపుదల చేయాలని వీడియోలో కనిపిస్తున్న మహిళ తరపున పిటిషన్ దాఖలైంది. ఆ వీడియో కల్పితమని సదరు మహిళ తన పిటిషన్‌లో పేర్కొన్నది. సోషల్ మీడియాలో వీడియో సర్క్యులేట్‌ అవ్వకుండా నిరోధించేందుకు సోషల్ మీడియా సంస్థలు తక్షణ చర్యలు తీసుకోవాలని హైకోర్టు సూచించింది. కోర్టులోని సీసీటీవీ కెమెరాలో వీడియో రికార్డ్ అయినట్లు నివేదికలు వెల్లడిస్తున్నాయి. జిల్లా సెషన్స్ కోర్టు కూడా సదరు మహిళపై చర్యలు తీసుకోవాలని ఆదేశించింది. దీనిపై విచారణకు కమిటీని ఏర్పాటు చేస్తున్నట్లు తెలిసింది.
