ఢిల్లీలో మరో నిర్భయ!.. బస్సులో వివాహితపై గ్యాంగ్‌రేప్‌

బీజేపీ పాలిత ఢిల్లీలో నిర్భయ తరహా అత్యాచార ఘటన మరొకటి చోటు చేసుకొన్నది! ఒక స్లీపర్‌ బస్‌ డ్రైవర్‌, కండక్టర్‌ కదులుతున్న బస్‌లో తనపై అత్యాచారానికి పాల్పడ్డారని ఒక మహిళ గురువారం పోలీసులకు ఫిర్యాదు చేసింది.

• నిందితులైన డ్రైవర్‌, కండక్టర్‌ అరెస్ట్‌

న్యూఢిల్లీ: బీజేపీ పాలిత ఢిల్లీలో నిర్భయ తరహా అత్యాచార ఘటన మరొకటి చోటు చేసుకొన్నది! ఒక స్లీపర్‌ బస్‌ డ్రైవర్‌, కండక్టర్‌ కదులుతున్న బస్‌లో తనపై అత్యాచారానికి పాల్పడ్డారని ఒక మహిళ గురువారం పోలీసులకు ఫిర్యాదు చేసింది. ఈ నెల 11న అర్ధరాత్రి ఈ ఘటన జరిగిందని.. నిందితులిద్దరినీ కోర్టులో హాజరు పరిచి కస్టడీకి తరలించినట్టు పోలీసులు తెలిపారు. పోలీసుల కథనం ప్రకారం.. ఘటన జరిగిన బస్‌కు ఎలాంటి కిటికీలు, అత్యవసర నిష్క్రమణ ఏర్పాట్లు లేవు. వివాహిత అయిన బాధితురాలు ఓ ఫ్యాక్టరీలో డ్యూటీ ముగిశాక వసంత విహార్‌ బి-బ్లాక్‌ బస్టాండ్‌ దగ్గర ఆగి ఉన్న ఓ బస్‌ వద్దకు వచ్చింది.

అక్కడ నిలబడిన ఓ వ్యక్తిని సమయం ఎంతైందని అడిగింది. అయితే అతడు సమాధానం చెప్పకుండా ఆమెను బస్‌ లోపలకు లాక్కెళ్లాడు. ఆ తర్వాత డ్రైవర్‌ వెంటనే ఆ బస్‌ను నాంగ్‌లోయి దిశగా మళ్లించాడు. ఏడు కిలోమీట్ల దూరం బస్‌ ప్రయాణించింది. ఆ సమయంలో డ్రైవర్‌, హెల్పర్‌ మహిళపై అత్యాచారం చేశారు. అర్ధరాత్రి 2 గంటలకు నిర్మానుష్యంగా ఉన్న ప్రదేశంలో ఆమెను కిందకు తోసేసి వెళ్లిపోయారు.