నాలుగు రాష్ర్టాలు, ఒక కేంద్రపాలిత ప్రాంతంలో జరుగనున్న ఎన్నికలతో రాజకీయ వాతావరణం వేడెక్కింది. ఈ సందర్భంగా స్థానిక ప్రాంతీయ పార్టీలతోపాటు ప్రధాన జాతీయ పార్టీలు గాడి తప్పుతుండటం ఒక అవాంఛనీయ పరిణామం. రాజకీయపక్షాలు మునుపెన్నడూ లేని స్థాయిలో వాగ్దానాల వర్షాన్ని కురిపిస్తున్నాయి. అధికారం కోసం పరుగులో అమలుచేయగలిగే, ఆచరణయోగ్య హామీలే ఇవ్వాలనే ఔచిత్యం లోపిస్తున్నది. తమిళనాడులో ఓ ఇండిపెండెంట్ అభ్యర్థి ఏకంగా చంద్రమండలం మీదికే తీసుకెళ్తానని ప్రకటించటం ఈ వాగ్దానాల పోకడకు పరాకాష్ఠ. ఏం చేసైనా అధికారం చేజిక్కించుకోవాలనే తాపత్రయంతో ఇస్తున్న ఎన్నికల హామీలు ప్రజాస్వామ్యాన్ని అపహాస్యం చేసే విధంగా ఉంటున్నాయి.
అసోం, పశ్చిమబెంగాల్, కేరళ, తమిళనాడు రాష్ర్టాలతోపాటు కేంద్రపాలిత ప్రాంతం పుదుచ్చేరిలో ఎన్నికలు జరుగుతుండగా, తమిళనాట ఎన్నికల హామీలకు హద్దులేకుండా పోయింది. స్టాలిన్ నేతృత్వంలోని డీఎంకే ఏకంగా ఐదు వందల వాగ్దానాలు చేసింది. విద్యార్థులకు ఉచిత డేటా, ఉచిత ట్యాబ్లు; పెట్రోల్, డీజిల్, గ్యాస్ సిలిండర్ల ధరల తగ్గింపు; రేషన్కార్డున్న ప్రతి మహిళ ఖాతాలో వేయి రూపాయలు జమ చేయడం వంటి హామీలున్నాయి. దీంతో తామేం తక్కువ తిన్నామా అన్నట్లు ఏఐడీఎంకే- ఉచిత వాషింగ్ మిషన్లు, ఉచిత కేబుల్ కనెక్షన్లు, విద్యార్థులకు రాయితీతో ద్విచక్రవాహనాలు, రేషన్కార్డున్న మహిళకు 15వందల రూపాయలు ఇస్తామని ప్రకటించింది. ఎన్నికల సందర్భంగా హామీలు ఇవ్వడం, ప్రజలను ఆదుకోవడానికి సంక్షేమ పథకాలు ప్రవేశపెట్టడం తప్పు కాదు. కానీ అవి దీర్ఘకాలిక అభివృద్ధి కార్యక్రమాలతో కూడుకుని ఉండాలి.
తాము అధికారంలోకి వస్తే చేయబోయే అభివృద్ధి, సంక్షేమ కార్యక్రమాలను ఎన్నికల మ్యానిఫెస్టోలలో చెప్పటం ఆనవాయితీ. కానీ ఈ ఎన్నికల్లో ఇదేమీ కనిపించటం లేదు. ఎలాగైనా ఓట్లు రాబట్టేందుకు ప్రజలను మభ్యపెట్టడమే ప్రధానమని భావిస్తున్నాయి. మహిళలకు ఆలయానికి వెళ్లే హక్కు ఉన్నదంటూ గతంలో శబరిమల వివాదం సందర్భంగా ప్రకటించిన సీపీఎం ఆ వైఖరి మూలంగా ఇప్పుడు హిందువుల ఓట్లు రావని కలవరపడుతున్నది. ఏ పరిస్థితుల్లో తాము ఆ నిర్ణయం తీసుకోవాల్సి వచ్చిందో ఇంటింటికీ వెళ్ళి చెప్తున్నది. రాజకీయ పక్షాలు ఎన్నికల ప్రయోజనాల కోసం తమ వైఖరులను మార్చుకుంటున్న తీరుకు ఇదొక ఉదాహరణ. రాజకీయ పక్షాలు ఎన్నికల రాజకీయాలకు అతీతంగా సమాజ సంక్షేమం కోసం దీర్ఘకాలిక దృష్టితో వ్యవహరించాలి. వాగ్దానాలకు ప్రలోభపడకుండా మంచి చెడులను ప్రజలు గుర్తించగలిగినప్పుడే రాజకీయ పక్షాలలో ఈ రకమైన మార్పు వస్తుంది.