సోమవారం 25 జనవరి 2021
National - Jan 08, 2021 , 17:47:58

ఛత్తీస్‌గఢ్‌ కాకుల మృతి.. బర్డ్‌ఫ్లూగా అనుమానాలు!

ఛత్తీస్‌గఢ్‌ కాకుల మృతి.. బర్డ్‌ఫ్లూగా అనుమానాలు!

రాయ్‌పూర్‌ : ఛత్తీస్‌గఢ్‌ బలోద్‌ జిల్లాలో నాలుగు కాకులు చనిపోయాయని అధికారులు తెలిపారు. వాటి మరణానికి గల కారణాలు తెలుసుకునేందుకు మూడింటి నమూనాలను పరీక్షల కోసం ప్రయోగశాలకు పంపినట్లు పేర్కొన్నారు. ఇప్పటికే హర్యానా, మధ్యప్రదేశ్‌, రాజస్థాన్‌, హిమాచల్‌ప్రదేశ్‌, కేరళ రాష్ట్రాల్లో పెద్ద ఎత్తున పక్షులు మృత్యువాతపడ్డాయి. వాటికి పరీక్షలు నిర్వహించగా.. బర్డ్‌ఫ్లూ ఆనవాళ్లు కనిపించిన విషయం తెలిసిందే. ఈ క్రమంలో ఛత్తీస్‌గఢ్‌ అధికారులు అప్రమత్తమయ్యారు. గత రెండు రోజుల్లో బలోద్ పట్టణానికి 13 కిలోమీటర్ల దూరంలో ఉన్న పాండి గ్రామంలో నాలుగు కాకుల చనిపోయాయని కలెక్టర్ జాన్మేజయ్ మహోబే తెలిపారు. అవి ఫ్లూ కారణంగానే చనిపోయాయా?లేదా? తెలుసుకునేందుకు భోపాల్‌లోని నేషనల్‌ ఇనిస్టిట్యూట్‌ ఆఫ్‌ హై సెక్యూరిటీ యానిమన్‌ డిసీజెన్‌ (ఎన్‌ఐహెచ్‌ఎస్‌ఏడీ)కి నమూనాలు పంపినట్లు చెప్పారు.

బుధవారం గ్రామంలో ఓ కాకి చనిపోతే గుర్తించి స్థానికులు దహనం చేశారని మరో అధికారి తెలిపారు. ఆ తర్వాత మరో మూడు కాకులు చనిపోయాయని చెప్పారు. దీంతో స్థానికులు ఆందోళనకు గురవుతున్నారు. బర్డ్‌ఫ్లూ నేపథ్యంలో అధికారులు ఇతర రాష్ట్రాల నుంచి వచ్చే కోళ్లు తదితర పక్షుల రవాణాపై దృష్టి సారించారు. బర్డ్‌ఫ్లూపై ఫౌల్ట్రీ వ్యాపారులకు అవగాహన కల్పిస్తున్నారు. ముందు జాగ్రత్త చర్యగా ఏడు జిల్లాలోని ఫౌల్ట్రీల నుంచి నమూనాలను సేకరించి పరీక్షలకు పంపగా నెగెటివ్‌ వచ్చినట్లు అధికారులు చెప్పారు. ఇదిలా ఉండగా.. దేశరాజధాని ఢిల్లీలోనూ కాకులు మృతువ్యాతపడ్డాయి. మయూర్‌ విహార్‌ ప్రాంతంలోని పార్క్‌లో సుమారు వంద కాకులు మరణించాయి. అధికారులు వాటి నమూనాలను పరీక్షల నిమిత్తం ల్యాబ్‌కు తరలించారు. 


logo