బెంగళూరు : విజయేంద్ర అనే ఏడు నెలల బాలుడికి ‘బెంటా’ అనే అత్యంత అరుదైన డిసీజ్ నిర్ధారణ అయ్యింది. ఈ ఇమ్యునో డెఫిషియన్సీ సమస్య కేసులు ఇప్పటి వరకు ప్రపంచవ్యాప్తంగా కేవలం 13 కేసులే రికార్డయ్యాయి. ఇది 14వ కేసు కాగా.. చికిత్స అందించేందుకు రక్త మూలకణ దాత (Blood Stem Sell Donor) అవసరం. బాలుడిని కాపాడేందుకు ఆన్లైన్ క్యాంపెయిన్ను ప్రారంభించారు. తమ కొడుకును రక్షించేందుకు దాతలు ముందుకు రావాలని తల్లిదండ్రులు కోరుతున్నారు. స్వాబ్ నమూనాలను పంపాలని వేడుకుంటున్నారు. నమూనాలను పంపేందుకు కేవలం ఐదు నిమిషాల మాత్రమే పడుతుందని, తద్వారా తన కొడుకు ప్రాణం దక్కుతుందని బాలుడి తల్లి రేఖ దాతలను అభ్యర్థిస్తున్నది.
జన్యు పరివర్తన ద్వారా ఈ వ్యాధి వస్తుండగా.. బాలుడికి కాపాడేందుకు ఉన్న ఏకైక మార్గం సెల్ ట్రాన్స్ప్లాంటేషన్. ఇందుకు సరిపోలే రక్త మూలకణ దాత అవసరం. బెంగుళూరుకు చెందిన డీకేఎంఎస్-బీఎంఎస్టీ (DKMS-BMST) ఫౌండేషన్ ప్రకారం.. చిన్నారికి ట్రాన్స్ప్లాంటేషన్ చేసేందుకు దాతల కోసం వెతుకుతున్నది. దాతల కోసం వెతికినా దొరక్క పోవడంతో తల్లిదండ్రులు ఆందోళనకు గురవుతున్నారు. తమ కొడుకు బాధను చూసి కన్నీరు మున్నీరవుతున్నారు. బెంటా అరుదైన వ్యాధి కాగా.. చికిత్స కూడా ప్రయోగాత్మకంగానే అందిస్తున్నారు. ప్రత్యేకంగా మందులు ఏమీ ఉపయోగించడం లేదు. బాలుడిపై డిసీజ్ ప్రభావాన్ని దృష్టిలో ఉంచుకొని చికిత్సను ముందుకు తీసుకెళ్తున్నారు.
బెంగళూరులోని ప్రముఖ ఆసుపత్రికి చెందిన డాక్టర్ స్టాలిన్ రాంప్రకాశ్.. విజయేంద్రకు చికిత్స అందిస్తున్నట్లు ఫౌండేషన్ తెలిపింది. ప్రపంచంలోనే అతి పిన్న వయస్కుడైన బెంటా పేషెంట్ విజయేంద్ర అని తెలిపింది. తొలిదశలోనే వ్యాధి బయటపడిందని చెప్పింది. స్టెమ్ బ్లడ్ సెల్ డోనర్ కోసం ప్రారంభించిన ఆన్లైన్ క్యాంపెయిన్లో 0.04శాతం మంది మాత్రమే దాతలుగా పేర్లు నమోదు చేసుకున్నారని డీకేఎంఎస్-బీఎంఎస్టీ సీఈవో పాట్రిక్ పాల్ పేర్కొన్నారు. ‘కార్డు11’ అనే జన్యు ఉత్పరివర్తనం ఉన్న వ్యక్తులకు బెంథిక్ బిడ్డ పుట్టడానికి 50 శాతం అవకాశం ఉందని, పొట్ట దగ్గర ప్లీహం వాపు, చెవులు, సైనస్, ఊపిరితిత్తుల్లో తరుచుగా ఇన్ఫెక్షన్లు సోకుతాయని, తద్వారా ‘బెంటా’ను గుర్తించవచ్చని తెలిపారు.