Visit:
ముంబై, సెప్టెంబర్‌ 24 (నమస్తే తెలంగాణ): 19 ఏళ్ల అనురాగ్‌ అనిల్‌ బోరర్‌… మొత్తం గ్రామం గర్వించే పేరు. నీట్‌లో 99.99 పర్సంటైల్‌, ఓబీసీ క్యాటగిరీలో 1,475 ర్యాంక్‌, ఎంబీబీఎస్‌లో ప్రవేశానికి హామీ దొరికింది. అతని తల్లిదండ్రులు తన కొడుకు డాక్టర్‌ కావాలని కలలు కన్నారు. అనురాగ్‌ తమ కుటుంబానికి కీర్తి తెస్తాడని గ్రామం ఆశించింది. కానీ అనురాగ్‌ ఎప్పుడూ డాక్టర్‌ కావాలని కోరుకోలేదని ఎవరికీ తెలియదు.
గోరఖ్పూర్‌ మెడికల్‌ కాలేజీలో అడ్మిషన్‌ కోసం బయలుదేరాల్సిన రోజున, అనురాగ్‌ తన ఇంట్లో ఉరి వేసుకుని ఆత్మహత్య చేసుకున్నాడు. పుస్తకాల కుప్పలు, గోడపై ఉన్న టైమ్‌ టేబుళ్లు, నెరవేరని కలల మధ్య ఒక సూసైడ్‌ నోట్‌ దొరికింది. దానిలో ‘నేను డాక్టర్‌ అవ్వాలనుకోవడం లేదు’ అని ఉంది. ఈ ఘటన మహారాష్ట్రలోని చంద్రాపూర్‌లో జరిగింది. అనురాగ్‌ ఠాకూర్‌ తన తల్లిదండ్రులతో కలిసి సిందేవతి తాలుకాలోని నవర్గాన్‌లో నివసిస్తున్నాడు. ఇటీవల జరిగిన నీట్‌ 2025లో 99.99 పర్సంటైల్‌ సాధించాడు.
