థర్డ్‌వేవ్‌ వచ్చేసిందా!.. దేశంలో ఒమిక్రాన్‌ బుసలు..

• ఒక్కరోజులో 122 కేసులు
• వచ్చే ఏడాది ఫిబ్రవరి 3 నాటికి గరిష్టస్థాయికి కేసులు
• అప్రమత్తంగా లేకుంటే పరిస్థితులు చేజారిపోతాయి
• ఐఐటీ, కాన్పూర్‌ పరిశోధకుల నమూనా అధ్యయనం
• పండుగల దృష్ట్యా ప్రజలకు కేంద్రం కీలక సూచనలు

న్యూఢిల్లీ, డిసెంబర్‌ 24: దేశంలో థర్డ్‌వేవ్‌ మొదలైందా? కరోనా కొత్త వేరియంట్‌ ‘ఒమిక్రాన్‌’ కేసులు రోజురోజుకీ భారీగా పెరుగుతుండటం.. శుక్రవారం ఒక్క రోజునే ఏకంగా 122 ఒమిక్రాన్‌ కేసులు నమోదవ్వడాన్ని చూస్తే ఇది నిజమేననిపిస్తున్నది. ఇండియన్‌ ఇన్‌స్టిట్యూట్‌ ఆఫ్‌ టెక్నాలజీ, కాన్పూర్‌ పరిశోధకులు తాజాగా వెల్లడించిన అధ్యయనం ఈ అనుమానాలకు మరింత బలాన్నిస్తున్నది. డిసెంబర్‌ 15 నుంచి దేశంలో ఒమిక్రాన్‌ కేసులు క్రమంగా పెరుగుతున్నాయని, ఇది థర్డ్‌వేవ్‌కు సూచనగా పరిగణించవచ్చని ఐఐటీ- కాన్పూర్‌ పరిశోధకులు అభిప్రాయపడ్డారు. వచ్చే ఏడాది ఫిబ్రవరి 3న థర్డ్‌వేవ్‌ పీక్‌ స్టేజీ (గరిష్ట స్థాయి)కి చేరుకొంటుందని అంచనా వేశారు. ఈ మేరకు నమూనా అధ్యయనంలో వెల్లడించారు. అమెరికా, బ్రిటన్‌, జర్మనీ, రష్యాలో ఇదివరకే ప్రారంభమైన థర్డ్‌వేవ్‌ డాటా, కేసుల సరళి, భారత్‌లో ఇప్పటికే విరుచుకుపడ్డ ఫస్ట్‌, సెకండ్‌వేవ్‌-కేసులు, వ్యవధి తదితర అంశాలను తీసుకొని ఈ అంచనా వేశారు. అయితే, పీక్‌స్టేజ్‌ రోజున ఎన్ని కేసులు నమోదవుతాయన్న విషయాన్ని చెప్పలేదు. అప్రమత్తంగా ఉండకుంటే పరిస్థితులు దిగజారుతాయని హెచ్చరించారు. ‘అమెరికా, బ్రిటన్‌, జర్మనీ, రష్యాలో చాలా మందికి వ్యాక్సిన్‌ వేశారు. అయినప్పటికీ, ఆ దేశాలను థర్డ్‌వేవ్‌ కుదిపేస్తున్నది. కాబట్టి, భారత్‌ సహా అన్ని దేశాలు భవిష్యత్తులో ముంచుకొచ్చే వేవ్‌ల పట్ల అప్రమత్తంగా ఉండాలి’ అని హెచ్చరించారు.

జాతీయ కమిటీ అదే చెప్పింది
కొవిడ్‌ నేషనల్‌ సూపర్‌మోడల్‌ కమిటీ కూడా వచ్చే ఏడాది మొదట్లో థర్డ్‌వేవ్‌ పీక్‌స్టేజ్‌కి చేరుకోవచ్చని అంచనా వేసింది. అయితే, దీని ప్రభావం సెకండ్‌వేవ్‌ కంటే తక్కువగా ఉంటుందని.. డెల్టా స్థానంలో ఒమిక్రాన్‌ విస్తరించడం కొనసాగితే కేసులు పెరుగుతాయని అంచనా వేసింది.

358కి చేరిన ఒమిక్రాన్‌ కేసులు
గడిచిన 24 గంటల్లో దేశంలో 122 ఒమిక్రాన్‌ కేసులు నమోదైనట్టు శుక్రవారం కేంద్ర ఆరోగ్యశాఖ ప్రకటించింది. ఇప్పటివరకూ ఒక్కరోజులో నమోదైన కేసుల్లో ఇదే అత్యధికం. దీంతో మొత్తం ఒమిక్రాన్‌ కేసుల సంఖ్య 358కి చేరింది. దేశంలో కరోనా కేసుల సంఖ్య 3,47,72,626కు చేరింది.

జాగ్రత్తలు మరువొద్దు
ప్రపంచ దేశాల్లో నాలుగోవేవ్‌ ఉద్ధృతి కొనసాగుతున్న నేపథ్యంలో కేంద్రం శుక్రవారం ప్రజలకు కీలక సూచనలు చేసింది. క్రిస్మస్‌, న్యూఇయర్‌ వేడుకల్లో ముఖానికి మాస్కు, భౌతిక దూరం వంటి కొవిడ్‌ నిబంధనలు పాటించాలన్నది. అనవసరమైన ప్రయాణాలు వాయిదా వేసుకోవాలని సూచించింది. అర్హలైనవారందరూ వ్యాక్సిన్‌ వేసుకోవాలని కోరింది. 1.5-3 రోజుల్లో ఒమిక్రాన్‌ కేసులు రెట్టింపవుతున్నాయని ప్రపంచ ఆరోగ్య సంస్థ పేర్కొనడాన్ని ఉటంకించింది. దేశ సగటుతో పోలిస్తే కేరళ, మిజోరంలో కొవిడ్‌ పాజిటివిటీ రేటు ఎక్కువగా ఉన్నట్టు ఆందోళన వ్యక్తం చేసింది. ఒమిక్రాన్‌ను నిరోధించేందుకు ప్రైవేటు వైద్య రంగం కూడా సిద్ధంగా ఉండాలని విజ్ఞప్తి చేసింది.

ప్రపంచవ్యాప్తంగా 1.5 లక్షలు దాటిన ఒమిక్రాన్‌ కేసులు

• ప్రపంచంలోని 108 దేశాల్లోకి ఒమిక్రాన్‌ ప్రవేశించింది. ఇప్పటివరకూ 1.5 లక్షలకు పైగా కేసులు నమోదయ్యాయి. కొత్త వేరియంట్‌తో 26 మంది మరణించారు.
• దేశంలో శుక్రవారం నాటికి 358 మందికి ఒమిక్రాన్‌ సోకింది. ఇందులో 183 మంది గత రికార్డులను విశ్లేషించినట్టు కేంద్రప్రభుత్వం తెలిపింది. ‘ఒమిక్రాన్‌ సోకిన వారిలో 87 మంది రెండు డోసుల వ్యాక్సిన్‌ వేసుకోగా, ముగ్గురు బూస్టర్‌ డోసు వేసుకొన్నారు. ఇద్దరు ఒక డోసు టీకా వేసుకొన్నారు. ఏడుగురు టీకా వేసుకోలేదు’ అని కేంద్రం వెల్లడించింది.
• ఒమిక్రాన్‌ కేసుల నేపథ్యంలో శనివారం నుంచి రాత్రికర్ఫ్యూ (రాత్రి 11-5 గంటల మధ్య) అమలు చేయనున్నట్టు యూపీ సీఎం ఆదిత్యనాథ్‌ వెల్లడించారు.
• శనివారం నుంచి జనవరి 2 వరకు కఠిన ఆంక్షలు తీసుకొస్తున్నట్టు ఒడిశా సర్కారు ప్రకటించింది. డిసెంబర్‌ 31 రాత్రి, జనవరి 1న హోటల్స్‌, క్లబ్స్‌, రెస్టారెంట్లు, పార్కులు, గార్డెన్లు, ఫంక్షన్‌ హాల్స్‌లో ‘జీరో నైట్‌’ వేడుకల పేరిట న్యూఇయర్‌ వేడుకలను రద్దు చేసింది.
• అహ్మదాబాద్‌, వడోదరా, సూరత్‌, రాజ్‌కోట్‌, జామ్‌నగర్‌, గాంధీనగర్‌లో శనివారం నుంచి రాత్రి కర్ఫ్యూ విధిస్తున్నట్టు గుజరాత్‌.. రాత్రి 9- ఉదయం 6 గంటల వరకు కర్ఫ్యూ విధిస్తున్నట్టు మహారాష్ట్ర ప్రభుత్వం ప్రకటించింది.
• యాంటిబాడీ థెరపీ, కొవిడ్‌ టీకాలు, వైరస్‌ సోకడం ద్వారా వచ్చిన రోగనిరోధకశక్తి నుంచి ఒమిక్రాన్‌ తప్పించుకోగలదని పరిశోధకులు తెలిపారు.
• వచ్చే జనవరి-మార్చి మధ్యలో అమెరికాలోని 60 శాతం మంది ప్రజలు (14 కోట్ల మంది) ఒమిక్రాన్‌ బారిన పడొచ్చని యూనివర్సిటీ ఆఫ్‌ వాషింగ్టన్‌ తెలిపింది.
• బూస్టర్‌ డోసు ఇవ్వడంపై కేంద్రప్రభుత్వం అధ్యయనం ప్రారంభించింది. రెండు డోసుల టీకా వేసుకొన్న 3 వేల మందిపై ఈ అధ్యయనం చేపట్టనున్నారు.
• డెల్టాతో పోలిస్తే ఒమిక్రాన్‌ వల్ల బూస్టర్‌ డోస్‌ రక్షణ వేగంగా తగ్గిపోతున్నదని, 10 వారాల అనంతరం రక్షణ కనుమరుగవుతున్నట్టు బ్రిటన్‌ అధ్యయనం వెల్లడించింది.
• ఐదేండ్లు పైబడిన వారందరికీ వ్యాక్సిన్‌ను ఈక్వెడార్‌ తప్పనిసరి చేసింది.
• కరోనా కట్టడికి మెర్క్‌ తీసుకొచ్చిన గోలీకి జపాన్‌ ప్రభుత్వం అనుమతిచ్చింది. వచ్చేవారం నుంచి ఈ గోలీని అందుబాటులోకి తీసుకురానున్నట్టు వెల్లడించింది.
• డెల్టాను అధిగమించి ఒమిక్రాన్‌ వేరియంట్‌ 2022లో ప్రపంచవ్యాప్తంగా విస్తరిస్తుందని సింగపూర్‌ పరిశోధకులు అంచనా వేశారు.