టెల్ అవీవ్: కరోనా వ్యాధి నివారణకు ఇస్తున్న ఫైజర్ టీకా తీసుకున్నవారిలో కొందిరికి గుండెమంట (మయోకార్డిటిస్) సమస్య ఎదురవుతున్నదని ఇజ్రాయెల్ ఆరోగ్య శాఖ వెల్లడించింది. ఫైజర్ కంపెనీ దీనిపై స్పందించింది. ఈ సమస్య మరీ అంతగా లేదని పేర్కొన్నది. 50 లక్షల మంది టీకాలు వేసుకుంటే వారిలో 275 కేసుల్లో ఇలాంటి సమస్య కనిపించిందని ఇజ్రాయెల్ ఆరోగ్యశాఖ నిర్వహించిన ఒక సర్వేలో వెల్లడైంది. 95 శాతం మందిలో తేలికపాటి లక్షణాల మాత్రమే కనిపించాయని, ఎవరూ 4 రోజులకు మించి ఆస్పత్రిలో ఉండాల్సి రాలేదని సర్వే నివేదిక తెలిపింది. రెండో డోసు ఫైజర్ టీకా తీసుకున్న 16-30 సంవత్సరాల వయసువారిలో, అదీ మగవారిలో ఎక్కువగా ఈ గుండెమంట సమస్య బయటపడిందని అంటున్నారు. అయితే టీకాకు, గుండెమంట సమస్యకు లంకె ఉన్నట్టు ఇప్పటివరకైతే కచ్చితంగా రుజువు కాలేదని ఫైజర్ కంపెనీ అంటున్నది.