‘దేశ పురోగతిలో యువత భాగస్వామ్యం కావాలి’

స్వాతంత్య్ర పోరాటంలో ప్రాణాలర్పించిన అమరవీరులు, సమరయోధుల ఆదర్శాలను భావితరాలకు అందించడం ప్రతి ఒక్కరి బాధ్యత అని, యువత దేశ అభివృద్ధిలో చురుగ్గా పాలుపంచుకోవాలని ప‌లువురు వక్తలు పిలుపునిచ్చారు. కేంద్ర సమాచార, ప్రసార మంత్రిత్వ శాఖ ఆధ్వర్యంలోని..

రామగిరి, ఆగస్టు 13 : స్వాతంత్య్ర పోరాటంలో ప్రాణాలర్పించిన అమరవీరులు, సమరయోధుల ఆదర్శాలను భావితరాలకు అందించడం ప్రతి ఒక్కరి బాధ్యత అని, యువత దేశ అభివృద్ధిలో చురుగ్గా పాలుపంచుకోవాలని ప‌లువురు వక్తలు పిలుపునిచ్చారు. కేంద్ర సమాచార, ప్రసార మంత్రిత్వ శాఖ ఆధ్వర్యంలోని సెంట్రల్ బ్యూరో ఆఫ్ కమ్యూనికేషన్ (CBC) నల్లగొండ క్షేత్ర కార్యాలయం సౌజన్యంతో విశ్వవిద్యాల‌య ప్రాంగణంలో ‘హర్ ఘర్ తిరంగా’ ప్రచార కార్యక్రమంలో భాగంగా స్వాతంత్య్ర సమరయోధుల జీవిత చరిత్రలపై ప్రత్యేక డిజిటల్, ఫొటో ఎగ్జిబిషన్ గురువారం ఘనంగా ప్రారంభమైంది. ఈ సందర్భంగా సిబిసి నల్లగొండ ఇన్‌చార్జి టి.వెంకటేశ్వర్లు అధ్యక్షతన జరిగిన సమావేశంలో విద్యాసంస్థల ప‌లువురు అధికారులు పాల్గొన్నారు. అమరవీరుల త్యాగఫలమే నేటి స్వేచ్ఛా భారత్ అని, ఉన్నత విద్యాసంస్థల్లో చదువుకునే యువత సమాజ పురోగతికి, సాంకేతిక ఆవిష్కరణలకు మార్గం సుగమం చేస్తూ దేశ ప్రగతికి వెన్నెముకగా నిలవాలని పేర్కొన్నారు.

30 మంది సమరయోధుల పోరాట పటిమ ప్రదర్శన

నల్లగొండ జిల్లాతో పాటు తెలంగాణ స్వాతంత్య్ర ఉద్యమంలో కీలక భూమిక పోషించిన స్వామి రామానంద తీర్థ, బద్దం ఎల్లారెడ్డి, బూర్గుల రామకృష్ణారావు, ఆరుట్ల రామచంద్రారెడ్డి, షోయబుల్లా ఖాన్, కొండ లక్ష్మణ్ బాపూజీ, దేవులపల్లి వేంకటేశ్వరరావు తదితర 30 మంది ప్రముఖ సమరయోధుల జీవిత విశేషాలు, వారు చేసిన పోరాట ఘట్టాలను ఈ ఎగ్జిబిషన్లో తైలవర్ణ చిత్రాలు, ప్రదర్శనల రూపంలో ఏర్పాటు చేశారు.

కళాశాల విద్యార్థులకు పోటీలు – పురస్కారాలు

ఈ సందర్భంగా విశ్వవిశ్వాని కళాశాల విద్యార్థులకు నిర్వహించిన వ్యాసరూప పోటీలలో గెలుపొందిన విజేతలకు సిబిసి అధికారులు జ్ఞాపికలు, ప్రశంసా పత్రాలను పంపిణీ చేశారు. ఎన్సీసీ, ఎన్ఎస్ఎస్ కేడెట్లు నిర్వహించిన దేశభక్తి ప్రదర్శనలు విశేషంగా ఆకట్టుకున్నాయి. కార్యక్రమంలో కళాశాల అధ్యాపకులు, ఎన్ఎస్ఎస్ ప్రోగ్రామ్ అధికారులు, విద్యార్థినులు, సిబ్బంది పెద్ద సంఖ్యలో పాల్గొని ప్రదర్శనను సందర్శించారు.