పీఎం శ్రీ ప్రధానోపాధ్యాయులకు బెంగళూరులో శిక్షణ

పీఎం శ్రీ పాఠశాలల ప్రధానోపాధ్యాయుల వృత్తి నైపుణ్యాలు, సామర్థ్యాభివృద్ధిని పెంపొందించేందుకు ప్రభుత్వం ప్రత్యేక శిక్షణ కార్యక్రమాన్ని ఏర్పాటు చేసింది. ఇందులో భాగంగా బెంగళూరులోని ఇండియన్ సైన్స్ సెంటర్, మైసూరులోని ప్రాంతీయ విద్యా సంస్థలను...

– సైన్స్, సాంకేతిక పరిజ్ఞానం, ఆంగ్ల భాషా బోధనపై అధ్యయనం
– 43 మంది ప్రధానోపాధ్యాయులతో అధ్యయన యాత్ర ప్రారంభం

రామగిరి, అక్టోబర్ 29 : పీఎం శ్రీ పాఠశాలల ప్రధానోపాధ్యాయుల వృత్తి నైపుణ్యాలు, సామర్థ్యాభివృద్ధిని పెంపొందించేందుకు ప్రభుత్వం ప్రత్యేక శిక్షణ కార్యక్రమాన్ని ఏర్పాటు చేసింది. ఇందులో భాగంగా బెంగళూరులోని ఇండియన్ సైన్స్ సెంటర్, మైసూరులోని ప్రాంతీయ విద్యా సంస్థలను సందర్శించేందుకు 43 మంది ప్రధానోపాధ్యాయులు బయల్దేరారు. జిల్లా విద్యాధికారి కార్యాలయ అసిస్టెంట్ డైరెక్టర్ రామాచారి, ఎఫ్‌ఏఓ బాలాజీ నాయక్ జెండా ఊపి బస్సు ప్రయాణాన్ని ప్రారంభించారు. ఈ సందర్భంగా రామాచారి మాట్లాడుతూ, నాలుగు రోజుల పాటు నిర్వహించే ఈ శిక్షణలో భాగంగా సైన్స్ అండ్ టెక్నాలజీ, ఆంగ్ల భాషా బోధన, ఆధునిక విద్యా విధానాలు తదితర అంశాలపై ప్రధానోపాధ్యాయులు అధ్యయనం చేస్తారని తెలిపారు.

శిక్షణ ద్వారా పొందిన విజ్ఞానాన్ని పాఠశాలల్లో ఉపాధ్యాయులకు వివరించి, విద్యార్థుల అభ్యసన సామర్థ్యాలను మెరుగుపరిచేందుకు కృషి చేయాలని సూచించారు. పీఎం శ్రీ పాఠశాలల్లో విద్యార్థుల సమగ్ర వ్యక్తిత్వ వికాసానికి దోహదపడే అనేక వినూత్న కార్యక్రమాలను అమలు చేయనున్నట్లు పేర్కొన్నారు. నూతన బోధనా పద్ధతులు, శాస్త్రీయ దృక్పథం, నైపుణ్యాధారిత విద్య ద్వారా విద్యార్థులకు నాణ్యమైన విద్య అందించడమే ఈ శిక్షణ ప్రధాన లక్ష్యమని వివరించారు. ఈ కార్యక్రమంలో కోఆర్డినేటర్లు శ్రీనివాస్ గౌడ్, శ్రీనయ్య పాల్గొన్నారు.