నామినేషన్‌ దాఖలులో ఏమరుపాటు వద్దు

అసెంబ్లీ ఎన్నికల్లో తొలి అంకమైన నామినేషన్ల ప్రక్రియ కొనసాగుతున్నది. పోటీ చేస్తున్న అభ్యర్థులు నామినేషన్లు వేసేందుకు ఏర్పాట్లు చేసుకుంటున్నారు. అయితే.. ఎన్నికల నియమావళిని తప్పనిసరిగా పాటించాలని,

• అభ్యర్థులు ఎన్నికల నియమావళిని పాటించాలి
• అఫిడవిట్‌లో ఆస్తులు, నేర చరిత్ర చెప్పాల్సిందే
• పొరపాటు చేస్తే పదవికే ఎసరు

నేరేడుచర్ల, నవంబర్‌ 5 : అసెంబ్లీ ఎన్నికల్లో తొలి అంకమైన నామినేషన్ల ప్రక్రియ కొనసాగుతున్నది. పోటీ చేస్తున్న అభ్యర్థులు నామినేషన్లు వేసేందుకు ఏర్పాట్లు చేసుకుంటున్నారు. అయితే.. ఎన్నికల నియమావళిని తప్పనిసరిగా పాటించాలని, పొరపాటు చేస్తే ఇబ్బందులు పడాల్సి వస్తుందని న్యాయ నిపుణులు సూచిస్తున్నారు. నామినేషన్‌ పత్రాన్ని సరిగా నింపి ఎన్నికల రిటర్నింగ్‌ అధికారికి అప్పగించడం, విధి విధానాలను అనుసరించి వ్యవహరించడం, పలు అంశాలను తూచ.

తప్పకుండా పాటించాల్సిన అవసరం ఉన్నది. ముఖ్యంగా ఎన్నికల అఫిడవిట్‌లో తమ ఆస్తులు, నేర చరిత్ర, కులం వంటి వివరాలను పక్కాగా నమోదు చేయాలి. ఇందులో ఏ మాత్రం పొరపాటు జరిగినా నామినేషన్‌ తిరస్కరణకు గురయ్యే అవకాశం ఉన్నది. అఫిడవిట్‌లో వివరాలు తప్పుగా నమోదు చేస్తే.. ఎన్నికల్లో విజయం సాధించినా ప్రత్యర్థులు కోర్టును ఆశ్రయిస్తే పదవిని కోల్పోయే ప్రమాదం ఉంటుంది. అందువల్ల నామినేషన్‌ పత్రాల్లో పూర్తి వివరాలను జాగ్రత్తగా నమోదు చేయాలని, నామినేషన్‌ వేసే సమయంలో నిర్ధేశించిన నిబంధనలను తప్పనిసరిగా పాటించాలని ఎన్నికల అధికారులు సూచిస్తున్నారు.

ఆస్తుల వివరాలు చెప్పాల్సిందే..

ఎన్నికల్లో పోటీ చేసే ఎమ్మెల్యే అభ్యర్థులు నామినేషన్‌ పత్రాల్లో తమకున్న ఆస్తుల వివరాలను విధిగా నమోదు చేయాలి. స్థిర, చర ఆస్తులతోపాటు ఆభరణాలు, వాహనాల వివరాలను నిర్ధిష్ట ప్రొ ఫార్మాలో పేర్కొన్నాలి. వారికున్న రుణాలు, అప్పులు, ఈ ఐదేండ్లలో జరిగిన ఆర్థిక లావాదేవీల వివరాలను అందించాలి.

కులం, ఇతర వివరాలు తప్పనిసరి

రిజర్వ్‌డ్‌ నియోజకవర్గాల్లో పోటీ చేసే అభ్యర్థులు తప్పనిసరిగా తమ కులం వివరాలను అఫిడవిట్‌లో నమోదు చేయాలి. ఈసీ ప్రకటించిన రిజర్వేషన్‌ ప్రకారంగానే అభ్యర్థులు పోటీ చేయాల్సి ఉండడంతో ఆ కులం వివరాలతో పాటు రెవెన్యూ అధికారి జారీ చేసిన ధ్రువపత్రం జత చేయాలి. జనరల్‌ స్థ్ధానాల్లో పోటీ చేసే వారికి ఈ నిబంధన వర్తించదు.

తప్పుడు సమాచారంతో తంటాలు

ఎన్నికల్లో పోటీ చేసే అభ్యర్థులు ఈసీ నిబంధనల మేరకు నామినేషన్‌ పత్రాల అఫిడవిట్‌లో ఆస్తులు, కేసుల వివరాలను తప్పనిసరిగా నమోదు చేయాలి. ఈ వివరాలను ఎన్నికల సంఘం వెబ్‌సైట్‌లో ప్రజల ముందు ఉంచుతుంది. తప్పుడు సమాచారం నమోదు చేస్తే భవిష్యత్‌లో న్యాయపరంగా ఇబ్బంది పడాల్సి ఉంటుంది. ఎన్నికల అఫిడవిట్‌ను పూర్తిగా నమోదు చేయాలి. లేకుంటే తిరస్కరణకు గురయ్యే అవకాశం ఉన్నది. కాబట్టి అభ్యర్థులు జాగ్రత్తగా వ్యవహరించడం శ్రేయస్కరం.

ఈ నిబంధనలు పాటించాలి..

• ఎన్నికల్లో పోటీ చేస్తున్న అభ్యర్థి తప్పనిసరిగా నామినేషన్‌ దాఖలుకు కనీసం ఒక రోజు ముందు ప్రభుత్వ రంగ బ్యాంకు నుంచి కొత్తగా ఖాతా తెరిచి ఉంచుకోవాలి.
• అభ్యర్థి నాన్‌లోకల్‌ అయితే అతనికి ఎక్కడ ఓటు హక్కు ఉందో ఆ నియోజకవర్గ ఎన్నికల రిటర్నింగ్‌ అధికారి సదరు అభ్యర్థికి ఓటు ఉన్నట్లు ధ్రువీకరించి అటెస్టెడ్‌ చేయాల్సి ఉంటుంది.
• నాన్‌ లోకల్‌ అభ్యర్థిని ప్రతిపాదించే పౌరుడు మాత్రం పోటీ చేస్తున్న నియోజకవర్గానికి చెందిన వాడై ఉండాలి.
• అభ్యర్థి నామినేషన్‌ పత్రంతోపాటు పాస్‌పోర్టు సైజ్‌ ఫొటోలు 10 అందజేయాలి. నల్లద్దాలు, కూలింగ్‌ అద్దాలు ధరించి దిగిన ఫొటోలు చెల్లుబాటు కావు.
• అభ్యర్థి నామినేషన్‌ పత్రంతోపాటు ఫామ్‌-26ను రిటర్నింగ్‌ అధికారికి అంజేయాలి. నామినేషన్‌ దాఖలు చేసే రోజు ఫామ్‌ – 26 అందజేయకపోయినా ఆఖరు రోజు ఈ నెల 10న మధ్యాహ్నం 3 గంటల్లోపు తప్పనిసరిగా అందజేయాల్సి ఉంటుంది.
• అభ్యర్థిపై ఏదైనా పోలీస్‌ స్టేషన్‌లో క్రిమినల్‌, ఇతర కేసులు నమోదై ఉంటే వాటి వివరాలను తప్పనిసరిగా దిన పత్రికల్లో ప్రముఖంగా ప్రకటించాలి.
• గుర్తింపు పొందిన రాజకీయ పార్టీ తరఫున పోటీ చేస్తున్న అభ్యర్థి నామినేషన్‌ దాఖలు చివరి రోజు వరకు ఏ, బీ ఫామ్స్‌ అందించడం అనివార్యం.
• అభ్యర్థి ఎలక్షన్‌ ఏజెంట్‌, అడిషనల్‌ ఎలక్షన్‌ ఏజెంట్‌ను నియమించుకోవచ్చు.