Visit:
నల్లగొండ ప్రతినిధి, నవంబర్‌ 29(నమస్తే తెలంగాణ) : సర్పంచ్‌ ఎన్నికలకు సంబంధించి తొలి విడత నామినేషన్ల గడువు ముగిసింది. ఈ నెల 27 నుంచి మొదలైన నామినేషన్ల ప్రక్రి య శనివారం సాయంత్రం 5 గంటలకు ముగిసింది. అయితే తొలి రోజు ఓ మాదిరిగా, రెండో రోజు అష్టమి కావడంతో మందకొడిగా, చివరి రోజు భారీగా నామినేషన్లు దాఖలయ్యాయి. ఉదయం 10 గంటల నుంచే నామినేషన్ల స్వీకరణ కేంద్రాల వద్ద సందడి మొదలైంది. సర్పంచ్‌, వార్డు సభ్యుల కోసం వేర్వేరుగా నామినేషన్‌ కౌంటర్లు ఏర్పాటు చేయడంతో నామినేషన్‌ పత్రాలు సమర్పించేందుకు క్యూలైన్లు కనిపించాయి. అయితే సాయంత్రం 5 గంటల వరకూ పెద్ద సంఖ్యలో అభ్యర్థులు నామినేషన్‌ కేంద్రాల వద్ద వేచి ఉన్నారు. 5 గంటల వరకు వచ్చిన వారిని లోపలికి పంపించి గేట్లు మూసివేశారు. ఆ తర్వాత కొన్నిచోట్ల రాత్రి 8 గంటల వరకు కూడా నామినేషన్లు దాఖలు చేయడం కనిపించింది. చివరి రోజు పెద్ద సంఖ్యలో నామినేషన్లు వేసేందుకు అభ్యర్థులు పోటీ పడటంతో రాత్రి వరకూ నామినేషన్ల సంఖ్యపై స్పష్టత రాలేదని అధికారులు తెలిపారు. అభ్యర్థుల సంఖ్యపై పూర్తి స్పష్టత వచ్చాకే వివరాలు వెల్లడిస్తామన్నారు. అయితే ఆదివారం నామినేషన్ల పరిశీలన, సోమవారం అభ్యంతరాల స్వీకరణ, వాటి పరిష్కారం, 3వ తేదీ మధ్యాహ్నం 3 గంటల వరకు ఉపసంహరణ గడువు ఉంటుంది. అయితే శనివారం నాటికి నామినేషన్‌ పత్రాలతో పాటు ప్రత్యేక బ్యాంకు ఖాతాలు, కుల ధ్రువీకరణ పత్రాలు సమర్పించని అభ్యర్థులు ఆదివారం నామినేషన్ల పరిశీలన సమయానికి వాటిని అందజేయవచ్చని నల్లగొండ కలెక్టర్‌ ఇలా త్రిపాఠి పేర్కొన్నారు.
ఆదివారం నుంచి రెండో విడత నామినేషన్ల స్వీకరణ మొదలు కానుంది. మిర్యాలగూడ, కోదాడ రెవెన్యూ డివిజన్లతోపాటు సూర్యాపేట పరిధిలోని మోతె, చివ్వెంల, పెన్‌పహాడ్‌ మండలాలు, చౌటుప్పల్‌ డివిజన్‌ పరిధిలోని రామన్నపేట, అడ్డగూడురు మోత్కూరు, గుండాల, మోటకొండూరు మండలాల్లోని గ్రామ పంచాయతీల్లో ఆదివారం నుంచి మూడు రోజుల పాటు నామినేషన్లు స్వీకరిస్తారు.
యాదాద్రి భువనగిరి, నవంబర్‌ 29 (నమస్తే తెలంగాణ): సర్పంచ్‌ ఎన్నికల్లో భాగంగా చివరి రోజు నామినేషన్ల ప్రక్రియ జాతరను తలపించింది. శుక్రవారం అష్టమి కావడం, శనివారం మంచి రోజు కావడంతో కేంద్రాల వద్ద సందడి నెలకొంది. ఆఖరి రోజు భారీ సంఖ్యలో నామినేషన్లు దాఖలయ్యాయి. ఉదయం 10గంటల నుంచి సాయంత్రం వరకు క్యూలో నిల్చున్న అభ్యర్థుల నామినేషన్లను స్వీకరించారు. జిల్లాలో తొలి విడతలో ఆరు మండలాల్లో 46 నామినేషన్‌ సెంటర్లను ఏర్పాటు చేశారు. సర్పంచ్‌ పదవి కోసం శనివారం ఒక్క రోజే 440 నామినేషన్లు వచ్చాయి. మూడురోజులు కలిపి 153 గ్రామ పంచాయతీలకు మొత్తంగా 844 నామినేషన్లు దాఖలయ్యాయి. అత్యధికంగా తుర్కపల్లి మండలంలో 198, బొమ్మల రామారంలో 171, ఆత్మకూరు (ఎం)లో 156, యాదగిరిగుట్టలో 129, ఆలేరులో 101, రాజాపేటలో 89 నామినేషన్లు స్వీకరించారు. వార్డులకు సంబంధించి శనివారం ఒక్కరోజే 1776 నామినేషన్లు వచ్చాయి. 1286 వార్డులకు మూడు రోజులు కలిపి 2450 రాగా..అత్యధికంగా తుర్కపల్లిలో 564, బొమ్మలరామారంలో 524, ఆత్మకూరులో 433, యాదగిరిగుట్టలో 416, రాజాపేటలో 237, ఆలేరులో 278 నామినేషన్లు స్వీకరించారు.
రెండో విడత సర్పంచ్‌ ఎన్నికల్లో భాగంగా ఆదివారం నుంచి నామినేషన్ల ప్రక్రియ ప్రారంభం కానుంది. రెండో విడతలో భువనగిరి, బీబీనగర్‌, భూదాన్‌ పోచంపల్లి, వలిగొండ, రామన్నపేట మండలాల్లోని 150 పంచాయతీలు, 1332 వార్డుల్లో ఎన్నికలు జరగనున్నాయి. రెండో విడతలో దాఖలైన 3న పరిశీలించి చెల్లుబాటైన నామినేషన్ల వివరాలను ప్రకటిస్తారు. తిరస్కరించిన నామినేషన్లపై డిసెంబర్‌ 4వ తేదీ వరకు అప్పీళ్లు స్వీకరిస్తారు. డిసెంబర్‌ 6వ తేదీన మధ్యాహ్నం 3గంటల వరకు నామినేషన్ల ఉపసంహరణకు గడువు ఉంటుంది. ఆ తర్వాత పోటీలో ఉన్న అభ్యర్థుల వివరాలను ప్రకటిస్తారు. డిసెంబర్‌ 14న పోలింగ్‌ జరుగుతుంది.
