పాఠశాలల్లో పేరెంట్స్‌ భాగస్వామ్యం

• ప్రభుత్వ పాఠశాలల బలోపేతమే ధ్యేయం
• ఇకపై అన్ని స్కూళ్లలో పీటీఎం కమిటీ సమావేశాలు
• ప్రతి నెలా మూడో శనివారం ఎస్‌ఎంసీతోపాటు నిర్వహణ
• మార్గదర్శకాలు విడుదల చేసిన విద్యాశాఖ
• నేడు అన్ని పాఠశాలల్లో ప్రారంభం

రామగిరి, ఆగస్టు 26 : ప్రభుత్వ పాఠశాలల అభివృద్ధిలో ఆయా పాఠశాలల్లో చదివే విద్యార్థుల తల్లిదండ్రుల భాగస్వామ్యం పెంచేలా ప్రభుత్వం యోచిస్తున్నది. ఇందుకోసం స్కూల్‌ మేనేజ్‌మెంట్‌ కమిటీ(ఎస్‌ఎంసీ)తోపాటు తల్లిదండ్రులు ఉపాధ్యాయ సమావేశాలు(పీటీఎం) నిర్వహించాలని నిర్ణయించింది. ప్రతినెలా మూడో శనివారం సమావేశం నిర్వహించి ప్రతి తరగతిలోని విద్యార్ధి తల్లిదండ్రులు హాజరయ్యేలా చర్యలు తీసుకోవాలని ఆయా పాఠశాల హెచ్‌ఎంలకు ఆదేశాలు జారీచేసింది. మొదటి సారిగా నేడు ఉమ్మడి జిల్లా వ్యాప్తంగా 3,181 పాఠశాలల్లో పీటీఎం నిర్వహించేలా విద్యాశాఖ, సమగ్రశిక్ష అధికారులు ఏర్పాట్లు చేశారు.

ప్రతి విద్యార్థి తల్లిదండ్రులు పాల్గొనేలా..
పిల్లల విద్య పాఠశాల ఉపాధ్యాయులు, తల్లిదండ్రుల సహకారంతో సజావుగా సాగుతుంది. పాఠశాల అభివృద్ధిలో ఇప్పటి వరకు ఎస్‌ఎంసీలో ప్రతి తరగతి నుంచి ఎంపికైన ముగ్గురు విద్యార్థుల తల్లిదండ్రులే పాఠశాల కార్యక్రమాల్లో పాల్గొంటున్నారు. ప్రతి విద్యార్ధి తల్లిదండ్రులను పాఠశాల అభివృద్ధిలో భాగస్వామ్యం చేసేలా ప్రభుత్వం పీటీఎంకు శ్రీకారం చుట్టింది. పాఠశాల, విద్యార్థుల సమస్యలు, లోపాలు ఉంటే సరిదిద్దుకోవడానికి ఇది ఎంతో ఉపయుక్తంగా ఉండనుంది.

పీటీఎం లక్ష్యాలు ఇవే..

• పాఠశాలను సమాజంతో, విద్యార్థుల తల్లిదండ్రులతో అనుసంధానానికి పీటీఎం దోహదం చేస్తుంది.
• ప్రధానోపాధ్యాయుడి పర్యవేక్షణలో క్లాస్‌ టీచర్‌ తరగతి పిల్లల తల్లిదండ్రులతో పీటీఎం నిర్వహించాలి.
• ప్రతి నెలా మూడో శనివారం తరగతుల వారీగా పీటీఎం సమావేశం నిర్వహించాలి. పిల్లల విద్యాపరమైన పురోగతి, హాజరు, పిల్లల ప్రవర్తన, చదువుల మూల్యాంకనం ఇతర అంశాలను తల్లిదండ్రులు నేరుగా ఉపాధ్యాయులతో చర్చిస్తారు.
• పిల్లల చదువు, పరీక్షల ఫలితాలు తెలుసుకోవడంతోపాటు మధ్యాహ్న భోజనం అమలు తీరును తల్లిదండ్రులు స్వయంగా పర్యవేక్షించవచ్చు. దాంతో నాణ్యత మెరుగుపడే అవకాశం ఉన్నది.

ఫొటోలు, నివేదికను పంపించాలి
విద్యార్థుల చదువు, ప్రభుత్వ పాఠశాలల బలోపేతానికి తల్లిదండ్రుల భాగస్వామ్యం పెంచేలా ప్రభుత్వం పీటీఎం నిర్వహణకు ఆదేశాలు జారీ చేసింది. నేడు ఈ కార్యక్రమాన్ని అన్ని పాఠశాలల్లో ప్రారంభిస్తున్నాం. పేరెంట్స్‌ టీచర్స్‌ మీటింగ్‌లో చర్చించిన అంశాల నివేదికను మండల విద్యా వనరుల కేంద్రంలో సమర్పించాలి. మీటింగ్‌ ఫొటోలు విధిగా ఉన్నతాధికారులకు పంపించాలి. పీటీఎంను అమలు చేసి విద్యార్థులకు నాణ్యమైన విద్య అందేలా చూడాల్సి బాధ్యత ప్రతి ఉపాధ్యాయుడిపై ఉంది.
– బి.భిక్షపతి, డీఈఓ, నల్లగొండ

పీటీఎంలో చర్చించే అంశాలు..

• పీటీఎంలో విద్యార్థుల చదువుతోపాటు ఆటపాటల్లో ప్రతిభను తెలుసుకోవచ్చు.
• మన ఊరు-మనబడి, ఆంగ్ల మాధ్యమం అమలుపై తల్లిదండ్రులు తెలుసుకొని ఉపాధ్యాయులకు తగిన సూచనలు చేయొచ్చు.
• విద్యార్థుల ప్రగతి ఆధారంగా వివిధ పోటీ పరీక్షల్లో విద్యార్థులు పాల్గొనేలా ఉపాధ్యాయులు తయారు చేయడం
• సమావేశంలో చర్చించిన అంశాలను ప్రధానోపాధ్యాయులు, ఉపాధ్యాయులు(తరగతి టీచర్‌) రికార్డ్‌ చేసి మినిట్స్‌ తయారు చేయాలి.
• తయారు చేసిన అంశాలను ఉన్నతాధికారులకు (ఎంఈఓ, డీఈఓ)కు పంపించాలి. దాంతో పాఠశాలల్లో సమస్యలకు సత్వరం పరిష్కారం లభిస్తుంది.
  అధికారుల బాధ్యతలుఅధికారులు నిరంతరం పాఠశాలలను పర్యవేక్షిస్తూ తల్లిదండ్రుల సమావేశాలకు కొన్నింటికి ప్రత్యక్షంగా హాజరుకావాల్సి ఉంటుంది. ప్రభుత్వం అమలు చేసే విద్యా క్యాలెండర్‌లోని అంశాలను పీటీఎం సమావేశంలో తల్లిదండ్రులకు తెలియచేయాల్సి ఉంటుంది. ప్రభుత్వ లక్ష్యం అమలు చేసేలా చూడాలి.

3,181 పాఠశాలల్లో సమావేశాలు
ఉమ్మడి నల్లగొండ జిల్లా వ్యాప్తంగా 3,181 ప్రభుత్వ పాఠశాలల్లో పీటీఎం సమావేశాలు నిర్వహిస్తారు. నల్లగొండ జిల్లాలో 1482, సూర్యాపేట జిల్లాలో 918, యాదాద్రి భువనగిరి జిల్లాలో 781 పాశాలలున్నాయి. వీటన్నింటిలో ఎస్‌ఎంసీతోపాటు పీటీఎం సమావేశాలు నిర్వహించి విద్యార్థుల చదువు, ప్రభుత్వ పాఠశాలల అభివృద్ధికి చర్యలు తీసుకుంటారు.