Visit:
అనంతగిరి, జూలై 28 : ఎల్ నినో ప్రభావంతో రాష్ట్రంలో వర్షాభావ పరిస్థితులు ఉన్నందున రైతులు ఆరుతడి పంటల సాగుకు ప్రాధాన్యత ఇవ్వాలని సూర్యాపేట జడ్పీ సీఈఓ శిరీష సూచించారు. అనంతగిరి మండల పరిషత్ అభివృద్ధి కార్యాలయంలో మండల ప్రత్యేక అధికారి శ్రీనివాసరావు అధ్యక్షతన మంగళవారం నిర్వహించిన సర్వసభ్య సమావేశానికి జడ్పీ సీఈఓ శిరీష ముఖ్య అతిథిగా హాజరయ్యారు. ఈ సందర్భంగా ఆమె మాట్లాడుతూ.. ఎల్ నినో ప్రభావాన్ని దృష్టిలో ఉంచుకుని ముందస్తు చర్యలు చేపట్టాలని, తాగునీటి సమస్య తలెత్తకుండా అధికారులు అప్రమత్తంగా ఉండాలని సూచించారు. జలసిరి పనులను వేగవంతంగా పూర్తి చేయడంతో పాటు గ్రామాభివృద్ధి కార్యక్రమాలను నిర్ణీత గడువులోగా పూర్తి చేయాలని ఆదేశించారు.
అంతేకాకుండా మండలంలోని పలు అభివృద్ధి పనుల పురోగతిపై అధికారులతో సమీక్ష నిర్వహించారు. పలు గ్రామాల సర్పంచులు తమ గ్రామాల్లో నెలకొన్న తాగునీరు, రహదారులు, పారిశుద్ధ్యం, ఇతర మౌలిక వసతుల సమస్యలను అధికారుల దృష్టికి తీసుకువచ్చారు. సమస్యల పరిష్కారానికి సంబంధిత శాఖల అధికారులు సమన్వయంతో పనిచేసి త్వరితగతిన చర్యలు చేపట్టాలని జడ్పీ సీఈఓ ఆదేశించారు. ఈ సమావేశంలో ఇన్చార్జి ఎంపీడీఓ సుష్మ, ఏఓ అందె సతీష్, వైద్యాధికారి డాక్టర్ ఫిరోజ్, సర్పంచులు, మండల స్థాయి అధికారులు పాల్గొన్నారు.
