Visit:
జిల్లాలో రోజురోజుకూ కనిష్ఠ ఉష్ణోగ్రతలు పడిపోతున్నాయి. చలిపోటు ఎక్కువవుతున్నది. ఇంట్లో నుంచి బయటికి వెళ్లాలంటేనే వణుకు పుడుతున్నది. ఉమ్మడి నల్లగొండ జిల్లాలో వారం రోజుల్లో కనిష్ఠ ఉష్ణోగ్రతలు 19 నుంచి 16 డిగ్రీలకు చేరుకున్నాయి. 32 నుంచి 29 వరకు గరిష్ఠ ఉష్ణోగ్రతలు నమోదవుతున్నాయి.తెల్లవారుజామున, అర్ధరాత్రిల్లో 14 డిగ్రీలకు చేరుకుంటున్నాయి. ఈ సారి చలి ప్రభావం సీజన్‌ ప్రారంభంలోనే చూపగా ఆ తర్వాత తగ్గుముఖం పట్టింది. ఆంధ్రప్రదేశ్‌, తమిళనాడు రాష్ర్టాల్లో అల్పపీడన ప్రభావంతో వర్షాలు కురుస్తుండడంతో చలిగాలుల తీవ్రత పెరిగింది. దీనికి తోడు మంచు దుప్పటి కమ్మేస్తున్నది. సూర్యుడు కూడా 8 గంటల వరకు కనపడడం లేదు. దాంతో చలిమంటలు వేస్తూ జనం ఉపశమనం పొందుతున్నారు. చలిగాలుల నుంచి రక్షణకు ప్రజలు దుప్పట్లు, స్వెటర్ల కొనుగోళ్లు చేస్తున్నారు.
నల్లగొండ, నవంబర్‌ 17: జిల్లాలో చలి వాతావరణం క్రమంగా పెరుగుతున్నది. గరిష్ఠ ఉష్ణోగ్రతలో పెద్దగా మార్పు కనిపించకపోయినప్పటికీ కనిష్ఠ ఉష్ణోగ్రతలో క్షీణ దశ కనిపిస్తుండడంతో చలి వణికిస్తున్నది. ప్రధానంగా రాత్రి పూట, తెల్లవారు జామున చలి తీవ్రత గణనీయంగా ఉంది.
శీతాకాలం ప్రారంభం కావడంతో ఉమ్మడి జిల్లా వ్యాప్తంగా చలి ప్రభావం కనిపిస్తున్నది. సాధారణంగా శీతాకాలం అక్టోబర్‌లో ప్రారంభమై జనవరితో ముగుస్తున్నది. చలి ప్రభావం మాత్రం డిసెంబర్‌లో ప్రారంభమై జనవరిలో తీవ్రంగా కనిపిస్తున్నది. అయితే ఈ సారి కాస్త ముందుగానే చూపిస్తున్నది. ఆంధ్రప్రదేశ్‌, తమిళనాడు పొరుగు రాష్ర్టాల్లో వర్షాల ప్రభావంతో అక్కడి నుంచి చలి గాలులు వీయడం కూడా ఒక కారణంగా కనిపిస్తున్నది. గడిచిన వారం రోజులుగా కనిష్ఠ ఉష్ణోగ్రతలు 16 నుంచి 19 డిగ్రీల మధ్యలో నమోదవుతుండగా తెల్లవారుజామున మూడు నుంచి ఐదు గంటల వరకు 14 నుంచి 16డిగ్రీల మధ్యలో నమోదు అవుతుండడంతో తెల్లవారు జామున దుప్పటి లేనిదే పడుకోలేని పరిస్థితి. అయితే నల్లగొండ, సూర్యాపేట కంటే యాదాద్రి భువనగిరి జిల్లాలో కనిష్ఠ ఉష్ణోగ్రతలు గణనీయంగా తగ్గుతున్నాయి.
చలి ప్రభావం ఎక్కువవుతుండడంతో పిల్లలు స్వెట్టర్లు వేసుకోని బడి బాట పడుతుండగా వృద్ధులు అవి లేకుండా పొద్దున పూట బయట కూర్చోలేక పోతున్న పరిస్థితి కనిపిస్తున్నాయి. చలి తీవ్రత పెరుగుతున్న కారణంగా జలుబు, జ్వరం ప్రభావం సైతం షురూ అయింది.
