కల్తీకాలం.. జర భద్రం

కల్తీ సామ్రాజ్యం రోజురోజుకు విస్తరిస్తున్నది. తాగే పాల నుంచి తినే ఆహారం వరకు అంతా కల్తీ చేస్తున్నారు. కల్తీ తయారీ కేంద్రాలు పుట్టగొడుగుల్లా వెలుస్తున్నాయి. కల్తీ తయారీ కేంద్రాల పైన అధికారులు ఎన్ని దాడులు నిర్వహించినా తయారీ కేంద్రం స్థానం మారుతుంది కాని వ్యాపారం ఆగడం లేదు.

• తాగే పాల నుంచి తినే ఆహారం వరకు అంతా కల్తీనే..
• పుట్టగొడుగుల్లా వెలుస్తున్న కల్తీ తయారీ కేంద్రాలు
• పోలీసుల దాడుల్లో వెలుగు చూస్తున్న ఘటనలు
• కల్తీ ఆహారంతో అనారోగ్యాల బారిన జనం
• ధనార్జనే ధ్యేయంగా దందా సాగిస్తున్న కొందరు
• కల్తీ కేంద్రాల నివారణ కోసం నిఘా పెంచాం
• శేరిలింగంపల్లి ఎస్‌వోటీ ఇన్‌స్పెక్టర్‌ అంజిరెడ్డి

రామచంద్రాపురం, ఏప్రిల్‌ 26: కల్తీ సామ్రాజ్యం రోజురోజుకు విస్తరిస్తున్నది. తాగే పాల నుంచి తినే ఆహారం వరకు అంతా కల్తీ చేస్తున్నారు. కల్తీ తయారీ కేంద్రాలు పుట్టగొడుగుల్లా వెలుస్తున్నాయి. కల్తీ తయారీ కేంద్రాల పైన అధికారులు ఎన్ని దాడులు నిర్వహించినా తయారీ కేంద్రం స్థానం మారుతుంది కాని వ్యాపారం ఆగడం లేదు. ధనార్జనే ధ్యేయంగా అక్రమార్కులు ప్రజారోగ్యంతో చెలగాటం ఆడుతున్నారు. తాగే పాల నుంచి తినే ఆహార పదార్థాల వరకు అంతా కల్తీమయం. ఎన్ని ఆరోగ్య చిట్కాలు పాటించినా మనం తినే ఆహార పదార్థాల కల్తీ అవుతుంటే ఏవిధంగా ఆరోగ్యంగా ఉంటామనేది ఆలోచన చేయాల్సిన అవసరం ఉంది. మన తాతలు స్వచ్ఛమైన ఆహారం తీసుకొని తొంభై ఏండ్లు ఆరోగ్యవంతంగా బతికారు.

ఇప్పుడా పరిస్థితి లేదు. పాలు, పెరుగు, నెయ్యి, పన్నీర్‌, అల్లం, కారం, పసుపు, ధనియాలు, గరంమసాల పొడులతో పాటు బేకరీ ఐటమ్స్‌, ఐస్‌క్రీమ్స్‌, మాంసం, గుడ్లు ఇలా ఎన్నో ఆహార పదార్థాలను కల్తీ చేస్తూ సొమ్ము చేసుకుంటున్నారు. కల్తీ ఆహార పదార్థాల తయారీ కేంద్రాలను అరికట్టే విషయంలో రాష్ట్ర ప్రభుత్వం ప్రత్యేకమైన టాస్క్‌ఫోర్స్‌ను ఏర్పాటు చేయాల్సిన అవసరం ఎంతైనా ఉంది. కల్తీలకు పాల్పడుతూ ప్రజారోగ్యంతో ఆటలాడుతున్న అక్రమార్కులపై ప్రభుత్వం ఉక్కుపాదం మోపాల్సిన అవసరం ఉంది. కఠిన శిక్షలు పడేలా చేస్తే కల్తీని కంట్రోల్‌ చేయడానికి ఆస్కారం ఉంటుంది. ఎస్‌వోటీ పోలీసులు కల్తీ పదార్థాల తయారీ కేంద్రాలపైన దాడులు చేసి సంబంధించిన కల్తీ పదార్థాలను సీజ్‌ చేయడంతో పాటు నిర్వాహకులను అరెస్టు చేస్తున్నారు. కానీ, చట్టంలోని లొసుగులను వాడుకొని తిరిగివచ్చి మళ్లీ వేరేచోట కల్తీ వ్యాపా రం మొదలుపెడుతున్నారు. దీంతో కల్తీలకు అడ్డుకట్ట పడడం లేదు.

పోలీసుల దాడుల్లో వెలుగు చూసిన ఘటనలు..

హైదరాబాద్‌ పరిధిలో ఇటీవల టాస్క్‌ఫోర్స్‌ పోలీసులు నిర్వహించిన దాడుల్లో లభ్యమైన కల్తీ పదార్థాలను చూసి ప్రతి ఒక్కరూ విస్తుపోయారు.

• ఇటీవల హైదరాబాద్‌లోని మంగళ్‌హాట్‌ పోలీస్‌స్టేషన్‌ పరిధిలో ఓ మటన్‌ దుకాణంలో 3టన్నుల కుల్లిపోయిన మేక మాంసం లభ్యమైంది. రూ.18లక్షలు విలువ చేసే కల్తీ నెయ్యి, గోషామహల్‌లో కుళ్లిన మేక తలలు, కాళ్లు, పచ్చళ్ల కోసం తయారు చేసిన రసాయనాలను అధికారులు పట్టుకున్నారు. వీటికి తోడు
• సంగారెడ్డి జిల్లా పటాన్‌చెరులో శేరిలింగంపల్లి ఎస్‌వోటీ పోలీసులు చిన్నకంజర్లలోని మాతేశ్వరి ఎంటర్‌ప్రైజెస్‌పై దాడులు నిర్వహించి, అక్కడ తయారు చేస్తున్న 3,279కేజీల కల్తీ అల్లం, వెల్లుల్లి పేస్ట్‌తో పాటు మిషనరీ, తయారీ పదార్థాలను స్వాధీనం చేసుకున్నారు.
• పటాన్‌చెరు శ్రీనగర్‌కాలనీలో కల్తీ అల్లం, వెల్లుల్లి పేస్ట్‌ తయారీ కేంద్రంపై దాడులు నిర్వహించి 530 కేజీల కల్తీ అల్లం, వెల్లుల్లి పేస్ట్‌, తయారీ పదార్థాలు, మిషనరీని స్వాధీనం చేసుకున్నారు.
• అమీన్‌పూర్‌ పోలీస్‌ స్టేషన్‌ పరిధిలోని వెంకటరమణ బేకర్స్‌పైన దాడులు నిర్వహించి ఏమాత్రం క్వాలిటీ లేకుండా తయారు చేసిన బేకరీ ఐటమ్స్‌, స్వీట్స్‌ మొత్తం రూ.2.77లక్షలు విలువ చేసే తినే పదార్థాలు, ముడిసరుకుని సీజ్‌ చేశారు.
• గచ్చిబౌలి, చందానగర్‌లో ఐస్‌క్రీమ్‌ కేంద్రం, రసూల్‌ రెస్టారెంట్‌, కుకింగ్‌ ఆయిల్‌ తయారీ కేంద్రాలపైన ఎస్‌వోటీ పోలీసులు దాడులు నిర్వహించి, ఆయా ఘటనలో నిర్వాహకులను అరెస్టు చేశారు. సీజ్‌ చేసిన

కల్తీ ఆహార పదార్థాలు…

హైదరాబాద్‌ పరిధిలో ఫిబ్రవరి నుంచి ఏప్రిల్‌ వరకు టాస్క్‌ఫోర్స్‌ పోలీసుల దాడుల్లో లభ్యమైన కల్తీ ఆహార పదార్థాల వివరాలు ఇలా ఉన్నాయి..అల్లం, వెల్లుల్లి పేస్ట్‌ 18టన్నులు, ఛాయ్‌పత్తి 2టన్నులు, చికెన్‌, మటన్‌ 17టన్నులు, పెరుగు 2.5 టన్నులు, పన్నీర్‌ 4.5 టన్నులు, చిప్స్‌,చాక్లెట్స్‌ 100 కేజీలు, పచ్చళ్లు 9టన్నులు, నెయ్యి, నూనె, క్రీమ్‌ 4 టన్నులు, కోవా 5 టన్నులు పోలీసులు స్వాధీనం చేసుకున్నారు.

మనం మారాలి..

ప్రస్తుతం కల్తీ సామ్రాజ్యం విస్తరిస్తున్న నేపథ్యంలో మనం కూడా మారాల్సిన అవసరం ఎంతైనా ఉంది. గతంలో వంటకు సంబంధించిన అల్లం, వెల్లుల్లి పేస్ట్‌, మసాలాలు, కారం, పసుపు, ధనియాలు, మిరియాలు ఇలా అన్ని ఇంట్లోనే తయారు చేసుకునేవాళ్లం. ఇప్పుడు ఉరుకుల పరుగుల జీవితంలో అన్నీ ఇన్‌స్ట్టెంట్‌గా మార్కెట్‌ నుంచి తెచ్చుకొని వాడుకుంటున్నాము. దీనికి తోడు ఈమధ్య కాలంలో చాలా మంది వంట చేసుకోవడానికి బద్దకిస్తు బయటి ఫుడ్‌కు ఎక్కువగా అలవాటు పడుతున్నారు. దీంతో మనకు తెలియకుండానే రోగాలను కొని తెచ్చుకుంటున్నాము. మార్కెట్‌లో కొత్త కొత్త పేర్లతో లభించే ఆహార పదార్థాలు మంచివో, కల్తీవో మనకు తెలియవు. వాటినే కొనుగోలు చేస్తు ఆరోగ్యం పాడు చేసుకుంటున్నాం.

కల్తీని అరికట్టేందుకు నిఘా పెంచాం..

కల్తీ ఆహార పదార్థాలు తయారు చేస్తున్న కేంద్రాలపైన ఎస్‌వోటీ దాడులు నిర్వహిస్తున్నది. కల్తీ కేంద్రాలను అరికట్టేందుకు నిఘా పెంచాం.సమాచారం వచ్చిన వెంటనే చర్యలు చేపడుతున్నాం. కల్తీ కేంద్రాలపైన దాడులు నిర్వహించి కల్తీ ఆహార పదార్థాలు, వాటిని తయారు చేసేందుకు వాడే ముడి సరుకులను సీజ్‌ చేస్తున్నాం. ఇటీవల గచ్చిబౌలి, చందానగర్‌, పటాన్‌చెరు, అమీన్‌పూర్‌ ఏరియాలో కల్తీ అల్లం, వెల్లుల్లి, ఐస్‌క్రీమ్స్‌, వంట నూనె, స్వీట్స్‌, బేకరి ఐటమ్స్‌ తయారీ కేంద్రాలపైన దాడులు నిర్వహించి సీజ్‌ చేశాం. ఎక్కడైనా కల్తీ ఆహార పదార్థాల తయారీ కేంద్రాలు నడుస్తున్నట్లు తెలిస్తే వెంటనే ప్రజలు ఎస్‌వోటీ ఇన్‌స్పెక్టర్‌ 9490617275 నంబర్‌కు సమాచారం అందించాలి.

– అంజిరెడ్డి, ఎస్‌వోటీ ఇన్‌స్పెక్టర్‌