కాళేశ్వరం ప్రాజెక్టుపై రేవంత్ రెడ్డి ప్రభుత్వం కుట్రలు : జీడిపల్లి రాంరెడ్డి

కాళేశ్వరం ప్రాజెక్టుపై రేవంత్ రెడ్డి ప్రభుత్వం కుట్రలు చేస్తుంద‌ని జీడిపల్లి రాంరెడ్డి ఆరోపించారు.

తొగుట , నవంబర్ 3: కాళేశ్వరం ప్రాజెక్టును పూర్తిస్థాయిలో పునరుద్ధరించి రైతులకు సాగునీరు అందించాలని, మేడిగడ్డ బ్యారేజీ మరమ్మతులు పూర్తి చేసి కన్నెపల్లి పంపులను వెంటనే ప్రారంభించాలని డిమాండ్ చేస్తూ మేడిగడ్డ నుంచి కొండపోచమ్మ సాగర్ వరకు బీఆర్ఎస్ పెద్దపల్లి పట్టణ అధ్యక్షుడు ఉప్పు రాజ్‌కుమార్, గోదావరిఖని పట్టణ అధ్యక్షుడు బొడ్డు రవీందర్‌ల‌ ఆధ్వర్యంలో 400 కిలోమీటర్ల మహా సైకిల్ యాత్రకు ఏడవ రోజు తొగుట మండలం వెంకట్రావుపేటలో ఘన స్వాగతం లభించింది. సోమవారం రాత్రి గ్రామానికి చేరుకున్న యాత్ర బృందానికి బీఆర్ఎస్ మండల అధ్యక్షుడు జీడిపల్లి రాంరెడ్డి రాత్రి బస, భోజన వసతులు కల్పించి ఆత్మీయ స్వాగతం పలికారు.

మంగళవారం ఉదయం గ్రామంలోని డాక్టర్ బీఆర్ అంబేద్కర్, తెలంగాణ తల్లి విగ్రహాలకు పూలమాలలు వేసి నివాళులర్పించారు. అనంతరం యాత్రికులకు వీరతిలకం దిద్ది, పూలమాలలు, శాలువాలతో ఘనంగా సన్మానించారు. బీఆర్ఎస్ మండల అధ్యక్షుడు జీడిపల్లి రాంరెడ్డి, నాయకులు తదితరులు స్వయంగా సైకిల్ తొక్కుతూ యాత్ర బృందంతో కొంతదూరం ప్రయాణించి సంఘీభావం తెలిపారు. అనంతరం పార్టీ జెండా ఊపి ఏడవ రోజు మహా సైకిల్ యాత్రను ప్రారంభించారు.

ఈ సందర్భంగా జీడిపల్లి రాంరెడ్డి మాట్లాడుతూ.. కాళేశ్వరం ప్రాజెక్టుపై ముఖ్యమంత్రి రేవంత్ రెడ్డి ప్రభుత్వం రాజకీయ కక్షతో వ్యవహరిస్తూ కుట్రలు చేస్తోందని విమర్శించారు. బ్యారేజీల పునరుద్ధరణ పనులు చేపట్టకుండా కాలయాపన చేస్తుండటంతో గోదావరి జలాలు వృథాగా సముద్రం పాలవుతున్నాయని, ఆంధ్రప్రదేశ్‌కు తరలిపోతున్నాయని ఆవేదన వ్యక్తం చేశారు.. కాళేశ్వరం ప్రాజెక్టును పూర్తిస్థాయిలో పునరుద్ధరించి రైతులకు సాగునీరు అందించాల్సిన బాధ్యత ప్రభుత్వంపై ఉందన్నారు.

కార్యక్రమంలో సర్పంచ్లు బండారు కవిత స్వామిగౌడ్, బక్క కనకయ్య, నాయకులు చిలువేరి మల్లారెడ్డి, వేల్పుల స్వామి, మంగ నర్సింలు, చంద స్వామి, తగరం అశోక్, కర్ణాకర్, శివయ్య, రాములు, చంద్రం, బాలయ్య, పర్శయ్య, లక్ష్మణ్ లతో పాటు యాత్ర బృంద సభ్యులు ఉప్పు రాజ్‌కుమార్, బొడ్డు రవీందర్, కాశిపాక వాసు, ఆరెపల్లి సురేష్, ముత్యం లక్ష్మణ్ గౌడ్, పరుపల్లి అనిల్, మేకల నవీన్, గుండబోయిన శ్రీనివాస్ తదితరులు పాల్గొన్నారు.