మెదడుకు పరుగు
వీలైతే పరుగు తీయండి. లేకపోతే నడవండి. అడుగులు మాత్రం ముందుకేయండి. ఇవేమీ విప్లవ కవితలోని వాక్యాలు కావు. వైద్యులు ఇస్తున్న సలహాలు! అనారోగ్యం నుంచి తప్పించుకోవడానికి, ఎంతో కొంత వ్యాయామం చేయమని చెప్పడానికే ఇదంతా. వ్యాయామం వల్ల శరీరంలోని అన్ని భాగాలకూ మేలు జరుగుతుందన్న విషయం తెలిసిందే. కానీ మెదడుకు కూడా అనూహ్యమైన లాభం చేకూరుతుందని తాజా పరిశోధనలు నిరూపిస్తున్నాయి. ‘న్యూరో బయాలజీ ఆఫ్ లెర్నింగ్ అండ్ మెమరీ’లో ప్రచురించిన ఓ అధ్యయనం ప్రకారం… వ్యాయామం వల్ల మెదడులో ఉన్న వేర్వేరు భాగాల మధ్య సమన్వయం మెరుగు పడుతుందట. వయసు పెరిగే కొద్దీ, మతిమరపు లాంటి సమస్యలు రావడానికి ఓ ప్రధాన కారణం, ఈ సమన్వయం లోపించడమే! వయసు మళ్లినవారిలో కూడా వ్యాయామం వల్ల్లే ఈ సమన్వయం పెరుగుతుందట. అంతేకాదు! మెదడుకు సంబంధించి వచ్చే చాలా సమస్యలకు కారణం, అందులోని న్యూరాన్ల సంఖ్య తగ్గిపోవడం. వ్యాయామంతో న్యూరాన్ల సంఖ్య కూడా పుంజుకుంటుందని పరిశోధకులు చెబుతున్నారు.
మద్యం, సిగరెట్, కాఫీ
మందు కొడితే హాయిగా నిద్ర పట్టేస్తుంది. మనసు చిరాగ్గా ఉన్నప్పుడు దమ్మేస్తే కండ్లు మూతలు పడుతాయి. కాఫీ తాగే అలవాటు ఉంటే నిద్రలేమి సమస్య పెరిగిపోతుంది. ఇవీ మనకు వినిపించే మాటలు! ఈ విషయంలో నిజానిజాలు తేల్చుకోవాలనుకున్నారు పరిశోధకులు. ఇందుకోసం ఎనిమిది వందల మంది అభ్యర్థులను ఎంచుకుని వారి జీవనశైలినీ, నిద్రకు సంబంధించిన అలవాట్లనూ గమనించారు. ఆశ్చర్యంగా కాఫీ తాగడం వల్ల నిద్ర దూరమైన సందర్భాలు చాలా అరుదుగా కనిపించాయి. మరోవైపు నిద్రపోయే ముందు మద్యం పుచ్చుకున్నా, సిగిరెట్ తాగినా నిద్ర సరిగా పట్టకపోవడం గమనించారు. మరీ ఆశ్చర్యకరమైన విషయం ఏమిటంటే, పడుకునే ముందుకు
సిగిరెట్ తాగేవారు మాటిమాటికీ లేస్తూ కనిపించారు. మెదడు మళ్లీ మళ్లీ నికోటిన్ను కోరుకోవడం వల్ల ఏర్పడిన సమస్య అది. ఏతావాతా తేలిందేమిటంటే మద్యం వల్ల మత్తు వస్తుందే కానీ నిద్ర పట్టదు. సిగరెట్ పొగకి నిద్ర చెదిరిపోవడం ఖాయం. కాఫీ మాత్రం మోతాదులో పుచ్చుకుంటే, సమస్య కాబోదు.
బ్రెడ్తో గుండెపోటు!
పొద్దున్నే టిఫిన్ ఆలస్యం అయిందా! ఓ బ్రెడ్ ప్యాకెట్ ఉంటే సరి. బ్రేక్ఫాస్ట్ పూర్తవుతుంది. సాయంత్రం ఆకలేస్తుందా? ఓ శాండ్విచ్ లాగిస్తే పోలా! పాలూ బ్రెడ్, బ్రెడ్ ఆమ్లెట్, బ్రెడ్ జామ్… బ్రెడ్తో ఎన్ని రకాలుగా కడుపు నింపుకోవచ్చో. అందుకే, బ్రెడ్ నిత్యావసర వస్తువుగా మారిపోయింది. కానీ ఈ అలవాటు శృతి మించితే, గుండెకి చేటని అంటున్నారు పరిశోధకులు. ఏకంగా 1,37,000 మంది జీవితాలను పరిశోధించి మరీ తేల్చిన విషయమిది. బ్రెడ్లో ఎలాంటి పీచుపదార్థాలూ ఉండవు. దాంతో తిన్న వెంటనే, శరీరంలో చక్కెర నిల్వలు ఒక్కసారిగా పెరిగిపోతాయి. ఇలా మాటిమాటికీ జరిగితే, హెచ్డీఎల్ అనే ప్రమాదకరమైన కొవ్వు పెరిగి గుండెపోటుకు దారితీస్తుంది. బ్రెడ్ లాంటి ఆహారపదార్థాలు ప్రాసెస్డ్ ఫుడ్ కిందకి వస్తాయి. అంటే… అతిగా శుద్ధి చేయడం వల్ల అందులోని పోషకాలు, యాంటీ ఆక్సిడెంట్స్, పీచుపదార్థాలు నశిస్తాయి. ఇవేవీ లేకపోవడం వల్ల, ఎన్ని బ్రెడ్ ముక్కలు తిన్నా తృప్తి కలగదు. దాంతో, అవసరానికి మించి లాగించేస్తుంటాం. బ్రెడ్లోని గులెటిన్ అనే పదార్థం వల్ల… జీర్ణాశయ సమస్యలు కూడా తలెత్తుతాయి. అలాగని బ్రెడ్ను పూర్తిగా పక్కన పెట్టమని కాదు కానీ, దాని వాడకం పరిమితంగా ఉండాలని చెబుతున్నారు నిపుణులు. వైట్ బ్రెడ్కు బదులు బ్రౌన్బ్రెడ్ వల్ల కాస్త నష్ట నివారణ సాధ్యమే!
చిన్నారుల మెదడు చిన్నబోతున్నది
పిల్లలపట్ల కఠినంగా వ్యవహ రించడం చాలా ఇండ్లలో కనిపించేదే. ఆ వైఖరి పిల్లల వ్యక్తిత్వం మీద తీవ్ర ప్రభావం చూపుతుందని వివిధ పరిశోధనలు నిరూపించాయి. తాజాగా మాంట్రియల్ విశ్వవిద్యాలయ పరిశోధకులు మరింత ఆశ్చర్యకరమైన ఫలితాన్ని వెల్లడించారు. చిన్నతనంలో పిల్లల విషయంలో కఠినంగా ఉండటం అనేది, వాళ్ల మెదడు ఆకృతిపై కూడా ప్రభావం చూపుతుందని తేల్చారు. ఇందుకోసం 2 నుంచి 9 సంవత్సరాల వయసు కలిగిన చిన్నారులను ఎంచు కున్నారు. వాళ్లు పెద్దయ్యాక.. కఠినమైన పెంపకంలో పెరిగిన పిల్లలలో మెదడులోని అమగ్డెలా, ప్రీ ఫ్రంటల్ కార్టెక్స్ అనే ముఖ్య భాగాలు సరిగా ఎదగకపోవడాన్ని గమనించారు. భావోద్వేగాల నియంత్రణలో ఈ రెండు భాగాలూ చాలా కీలకమైన పాత్రను పోషిస్తాయి.
ఇవీ కూడా చదవండి…
ఆ మాజీ సైనికుడు.. ఓ పక్షి ప్రేమికుడు