Visit:
కల్వకుర్తి, నవంబర్‌ 30 : గల్లీలో కుస్తీ, ఢిల్లీలో దోస్తి అన్నట్లు వ్యవహరిస్తున్న బీజేపీ, కాంగ్రెస్‌ పార్టీలు తోడు దొంగలని మాజీ మంత్రి హరీశ్‌రావు దుయ్యబట్టారు. స్థానిక సంస్థల ఎన్నికల ఓట్ల కోసం గ్రామాల్లోకి వచ్చే తోడుదొంగల పార్టీల నాయకులను తరిమికొట్టాలని పిలుపునిచ్చారు. కల్వకుర్తి నియోజకవర్గం కడ్తాల మండలం ముద్విన్‌కు చెందిన బీజేపీ గ్రామ అధ్యక్షుడితోపాటు 60మంది బీజేపీ కార్యకర్తలు ఆదివారం హైదరాబాద్‌లోని హరీశ్‌రావు నివాసంలో మాజీ ఎమ్మెల్యే జైపాల్‌యాదవ్‌ సమక్షంలో బీఆర్‌ఎస్‌ పార్టీలో చేరారు.
పార్టీలో చేరిన వారిలో నర్సింహ, మహేశ్‌, శ్రీను, నరేశ్‌, శ్రీశైలం, నర్సింహ, మల్లయ్య, రాకేశ్‌తోపాటు బీజేపీ కార్యకర్తలు ఉన్నారు. వీరికి హరీశ్‌రావు గులాబీ కండువాలు కప్పి పార్టీలోకి సాదరంగా ఆహ్వానించారు. ఈ సందర్భంగా ఆయన మాట్లాడుతూ కాంగ్రెస్‌, బీజేపీ ఒక్కటై దేశాన్ని, రాష్ర్టాన్ని దోచుకుంటున్నాయని ఆరోపించారు. ప్రజా సమస్యల పరిష్కారంలో విఫలమైన కాంగ్రెస్‌ మోసాలను ప్రజల్లోకి నాయకులు, కార్యకర్తలు తీసుకెళ్లాలని సూచించారు. రాష్టానికి నిధులు తీసుకురావడంలో బీజేపీ, కాంగ్రెస్‌ ఎంపీలు చతికిల పడ్డారని విమర్శించారు. కార్యక్రమంలో మాజీ జెడ్పీటీసీ దశరథ్‌ నాయక్‌, మాజీ సర్పంచ్‌ లక్ష్మీ నర్సింహరెడ్డి, బీఆర్‌ఎస్‌ నాయకులు, కార్యకర్తలు పాల్గొన్నారు.
