సంతకం

మాట పందిరి గుంజలా నిలబడడానికి హద్దులు గీసేది పిచ్చికూతలు కాగితం పైకెక్కకుండా జాగ్రత్తలు నేర్పేది మిఠాయి నాలుక కాకరకాయలా మారకుండా చేసేది రాసిన రాతల వలలో బందీని చేసేది ఒక్క సంతకం

మాట పందిరి గుంజలా నిలబడడానికి హద్దులు గీసేది
పిచ్చికూతలు కాగితం పైకెక్కకుండా జాగ్రత్తలు నేర్పేది
మిఠాయి నాలుక కాకరకాయలా మారకుండా చేసేది
రాసిన రాతల వలలో బందీని చేసేది ఒక్క సంతకం

హామీలను కాగితపు పడవలు చేసి నీటిలో వేయకుండా
ఇచ్చిన అప్పును కోర్టు దాకా లాగగలిగేది
శాసనాన్ని శిలాశాసనంగా మార్చేది
నిండుసభలో మాటలకు నిండుతనం చేకూర్చేది
రాతకోతలన్నింటి చివర చేసే ఒకే ఒక సంతకం

సంతకం లేని చెక్కులెన్ని ఇచ్చినా నాలుక గీసుకోలేం
బాండ్‌ పేపరైతేనేం బంగారు అక్షరాల రాతలైతేనేం
సున్నాల పక్కన ఎన్ని సున్నాలు పెట్టినా మారని విలువ
వాటి ముందు వేసిన ఒకే ఒక్క అంకెలా సంతకం

పూర్వకాలంలో మాట కోట్ల విలువ చేసేది
అవకాశవాదం జెండా ఎత్తాక బూడిదయ్యాయి నమ్మకాలు
ఇప్పుడైనా ఎప్పుడైనా చెరిగిపోదు సంతకానికి విలువ

ఒక్కసారి అనుభవమైతే, దెబ్బ తగిలితే
ఎన్ని జాగ్రత్తలు చెప్తుందో, ఎన్ని హెచ్చరికలు చేస్తుందో
ఆలోచించుకొని ఆలోచించుకొని ఆచరించమని చెప్పేది
మనుషులుగా చేసే ఒకే ఒక్క సంతకం

– కొమురవెల్లి అంజయ్య 9848005676