ప్రాణమై నిలిచావు!

ఏనాడు బాలశిక్షతో బంధించావో గానీ... నీ భావ బాహువులు నా మనో తనువును వదిలి వెళ్లడం లేదు

ఏనాడు బాలశిక్షతో బంధించావో గానీ…
నీ భావ బాహువులు నా మనో
తనువును వదిలి వెళ్లడం లేదు!

ఏనాడు చందమామతో గోరు ముద్దలు పెట్టావో గానీ
ఆ తీపితనపు అక్షరాలను నా మది ఇంకా మరువనే లేదు!

ఏనాడు పాఠ్య పుస్తక పరిమళాలు గుబాళించావో గానీ..
ఆ విషయ సుగంధం ఇంకా తాజాదనాన్ని కోల్పోనే లేదు!

ఏనాడు జ్ఞాన జగములో ఓలలాడించావో గానీ..
ఆ పరిజ్ఞాన సంపదంతా
నా మది ఖజానాను దాటి వెళ్లనే లేదు!

ఏనాడు సుగ్రంథాల గరిమను అంకితమిచ్చావో గానీ..
మెదడుకు మేతై నాలో లీనమయ్యావో గానీ..
నా జీవన గూటిలో ప్రాణమై నిలిచావు!
నా వ్యక్తిత్వ దేహానికి గుండెకాయగా మారావు!!

-అయిత అనిత