కురులకు యోగం!

ఆధునిక సమాజం ఎదుర్కొంటున్న సమస్యల్లో.. జుట్టు రాలడం ఒకటి. ఇందుకు కారణాలు అనేకం. ముఖ్యంగా, ఒత్తిడి, హార్మోన్ల అసమతుల్యతతోపాటు మాడుకు రక్త ప్రసరణ తగ్గడమేనని నిపుణులు చెబుతున్నారు.

ఆధునిక సమాజం ఎదుర్కొంటున్న సమస్యల్లో.. జుట్టు రాలడం ఒకటి. ఇందుకు కారణాలు అనేకం. ముఖ్యంగా, ఒత్తిడి, హార్మోన్ల అసమతుల్యతతోపాటు మాడుకు రక్త ప్రసరణ తగ్గడమేనని నిపుణులు చెబుతున్నారు. అయితే, కొన్ని యోగాసనాలతో ఈ సమస్యకు చెక్‌ పెట్టవచ్చని అంటున్నారు. తల భాగానికి రక్త ప్రసరణను పెంచి, వెంట్రుకల కుదుళ్లను బలోపేతం చేసే యోగాసనాలను వివరిస్తున్నారు.

• ‘ఆసనాల రాణి’గా పిలుచుకునే సర్వాంగాసనం.. థైరాయిడ్‌ గ్రంథి పనితీరును మెరుగుపరుస్తుంది. హార్మోన్ల అసమతుల్యతతో జుట్టు రాలుతున్న వారు.. ఈ ఆసనాన్ని ప్రయత్నించవచ్చు.
• అధో ముఖ శ్వానాసనం వేసినప్పుడు తల కింది వైపునకు వస్తుంది. దీనివల్ల రక్త ప్రసరణ నేరుగా తల వైపు మళ్లుతుంది. ఫలితంగా మాడును ఉత్తేజపరుస్తుంది. ఒత్తిడిని తగ్గిస్తుంది.
• మోకాళ్లపై కూర్చుని, ముందుకు వంగి.. నుదురును నేలకు ఆన్చడమే బాలాసనం. ఈ ఆసనం వల్ల మనసుకు ప్రశాంతత చేకూరుతుంది. జీర్ణక్రియ మెరుగుపడుతుంది. ఒత్తిడితోపాటు జుట్టు రాలడం కూడా తగ్గుతుంది.
• కొంచెం కష్టమైనా.. శీర్షాసనం వేస్తే జుట్టు ఆరోగ్యం మెరుగుపడుతుంది. ఈ ఆసనం వల్ల మెదడుకు, జుట్టు కుదుళ్లకు గరిష్ట స్థాయిలో రక్తం, ఆక్సిజన్‌ అందుతాయి. దీనివల్ల జుట్టు రాలడం తగ్గుతుంది. కొత్త జుట్టు పెరగడానికి అవకాశం ఉంటుంది.
• వెన్నెముకను సాగదీస్తూ చేసే పశ్చిమోత్తాసనం కూడా జుట్టు సమస్యలను నివారించడంలో ముందుంటుంది. ఈ ఆసనంలో కాళ్లు చాపి కూర్చుని, చేతులతో పాదాలను పట్టుకుని నుదురును మోకాళ్లకు ఆన్చాలి. దీనివల్ల వెన్నెముక సాగుతుంది. రక్త ప్రసరణ క్రమబద్ధమవుతుంది. జుట్టు బలంగా తయారవుతుంది.