Tea History | మేలు జాతి గుర్రాల కోసం టిబెటన్లకు చాయ్‌పత్తాను ఎరగా వేసిన చైనా

Tea History | ఇరుగుపొరుగు ఇచ్చిపుచ్చుకునే వాటిలో టీ పొడి తప్పకుండా ఉంటుంది. అరకప్పు తేయాకు పొడికి, మూడు కప్పుల చక్కెర సాధించగలగడాన్ని ప్రజ్ఞగా భావించేవాళ్లు ఒకప్పుడు. కొన్ని శతాబ్దాల కిందట ఇదే చాయ్‌పత్తా ఎర చూపి జాతి గుర్రాలను వస్తు మార్పిడి కింద తెచ్చుకున్న వైనం ఒకటి ఉందంటే ఆశ్చర్యం కలగకమానదు.

April 16, 2023 / 04:33 PM IST

Tea History | మేలు జాతి గుర్రాల కోసం టిబెటన్లకు చాయ్‌పత్తాను ఎరగా వేసిన చైనా

Tea History | ఇరుగుపొరుగు ఇచ్చిపుచ్చుకునే వాటిలో టీ పొడి తప్పకుండా ఉంటుంది. అరకప్పు తేయాకు పొడికి, మూడు కప్పుల చక్కెర సాధించగలగడాన్ని ప్రజ్ఞగా భావించేవాళ్లు ఒకప్పుడు. కొన్ని శతాబ్దాల కిందట ఇదే చాయ్‌పత్తా ఎర చూపి జాతి గుర్రాలను వస్తు మార్పిడి కింద తెచ్చుకున్న వైనం ఒకటి ఉందంటే ఆశ్చర్యం కలగకమానదు. టిబెట్‌ తమ దేశంలో అంతర్భాగమే అని చెప్పుకొనే చైనా శతాబ్దాల కిందట అక్కడివారితో వాణిజ్య సంబంధాలు పతాకస్థాయిలో నెరపడం విశేషం!

టీ పొడితోపాటు పట్టు, పింగాణీ పాత్రలు, ఇతర వస్తువుల ఎగుమతి కోసం ఒక వాణిజ్య మార్గాన్ని ఏర్పాటుచేసింది. నైరుతి చైనాలోని యునాన్‌ నుంచి టిబెట్‌లోని లాసా వరకూ ఉన్న ఈ దారి గుండా టిబెట్‌తో ఎగుమతి దిగుమతి వ్యవహారాలు నెరిపారు చైనీయులు. మంగోలియన్లను సమర్థంగా ఎదుర్కోవడానికి చైనాకు మేలుజాతి గుర్రాలు అవసరం ఏర్పడింది. అలాంటి అశ్వాలు టిబెట్‌ పీఠభూమిలోనే ఉండేవి. ఇంకేముంది వాటికోసం తమ దేశంలో విరివిగా పండే తేయాకును ఎగుమతి చేస్తామని టిబెటన్ల ముందు ప్రతిపాదన ఉంచింది చైనా. నాణ్యమైన తేయాకు కోసం అశ్వాలను ఇవ్వడానికి టిబెటన్లూ సిద్ధపడ్డారు. ఈ ఒప్పందంలో భాగంగా 7,500 టన్నుల చాయ్‌పత్తకు గానూ 10వేల గుర్రాలు సమర్పించుకున్నారట. ఆ తర్వాత కూడా కొన్ని శతాబ్దాలపాటు వేర్వేరు రూపాల్లో ఈ వస్తుమార్పిడి దిగ్విజయంగా కొనసాగింది. కాలక్రమంలో ఈ మార్గం టీ-హార్స్‌ రోడ్డుగా చరిత్రలో నిలిచిపోయింది. ఇదే దారి నేపాల్‌, భారత్‌, మధ్య ఆసియా మీదుగా యూరప్‌ వరకూ కొనసాగింది. ‘ద సిల్క్‌ రోడ్‌’గా పిలిచే ఈ మార్గాన్ని తూర్పు, పశ్చిమాలను కలిపే వారధిగా భావిస్తారు.

బటర్‌ చాయ్‌

కావాల్సినవి: పాలు: ఒక కప్పు, నీళ్లు: పావు కప్పు, టీ పొడి: ఒక టీ స్పూన్‌, చక్కెర: ఒక టేబుల్‌ స్పూన్‌, వెన్న: ఒక టీ స్పూన్‌, వంట సోడా: పావు టీస్పూన్‌.

తయారీ: ముందుగా గిన్నెలో పాలు, నీళ్లు పోసి మరిగించాలి. పాలు కాస్త వేడెక్కాక వంట సోడా వేయాలి (పాలు లేత గులాబి రంగులోకి వస్తాయి). తర్వాత టీ పొడి వేసి రెండు నిమిషాలు మరిగించాలి. టీని గ్లాస్‌లోకి వడగట్టుకొని, చివరగా వెన్న వేసుకోవాలి. టిబెట్‌వాసులు ఇష్టంగా తీసుకునే బటర్‌ చాయ్‌ సిద్ధం!