నైట్‌షిఫ్ట్‌.. టెర్రర్‌!

కార్పొరేట్‌ ప్రపంచంలో నైట్‌షిఫ్ట్‌ కామన్‌ అయిపోయింది. రాత్రంతా విధులు నిర్వహించడం వల్ల ఉద్యోగుల ఆరోగ్యంపై ప్రతికూల ప్రభావం పడుతున్నది. నిద్రలేమితోపాటు మానసిక ఒత్తిడి కూడా పెరుగుతున్నది. ఇక వారంవారం షిఫ్ట్‌లు మారడం వల్ల.. శరీరం అనేక మార్పులకు లోనవుతున్నది.

కార్పొరేట్‌ ప్రపంచంలో నైట్‌షిఫ్ట్‌ కామన్‌ అయిపోయింది. రాత్రంతా విధులు నిర్వహించడం వల్ల ఉద్యోగుల ఆరోగ్యంపై ప్రతికూల ప్రభావం పడుతున్నది. నిద్రలేమితోపాటు మానసిక ఒత్తిడి కూడా పెరుగుతున్నది. ఇక వారంవారం షిఫ్ట్‌లు మారడం వల్ల.. శరీరం అనేక మార్పులకు లోనవుతున్నది. ఇలాగే కొనసాగితే.. దీర్ఘకాలంలో తీవ్రమైన ఆరోగ్య సమస్యలు చుట్టుముట్టే అవకాశం ఉన్నది.

• నైట్‌ షిఫ్ట్‌లలో ఉండే ప్రధాన సమస్య.. నిద్రలేమి. పగటిపూట ఎంతసేపు పడుకున్నా రాత్రినిద్రకు సాటిరాదు. నిద్రలేమితో బీపీ, షుగర్‌, గుండెపోటు, బ్రెయిన్‌ స్ట్రోక్‌ లాంటి ఆరోగ్య సమస్యలు వచ్చే ప్రమాదం ఉన్నదని పలు అధ్యయనాలు హెచ్చరిస్తున్నాయి. ఇక స్లీప్‌ ఆప్నియాతో శరీరంలో ఆక్సిజన్‌ స్థాయులు తగ్గుతాయి కూడా!
• రాత్రిపూట విధులు నిర్వహించే క్రమంలో భోజన సమయం క్రమం తప్పుతుంది. దాంతో జీర్ణవ్యవస్థ ఆరోగ్యంపై ప్రభావం పడుతుంది. నైట్‌షిఫ్ట్‌ల్లో ఉండేవారు జంక్‌ ఫుడ్‌కు అలవాటు పడతారు. రెగ్యులర్‌గా తింటే.. ఊబకాయం, ఇతర ఆరోగ్య సమస్యలూ
  పలకరిస్తాయి.
• రాత్రి షిఫ్ట్‌లు చేసే మహిళల్లో నెలసరి సమస్యలు, ఎండోమెట్రియోసిస్‌ వంటి సమస్యలు ఎక్కువగా ఉంటాయని ఇటీవలి అధ్యయనాలు చెబుతున్నాయి. ప్రపంచవ్యాప్తంగా 10% మంది మహిళలు ఇలాంటి సమస్యతో బాధపడుతున్నారట. జీవక్రియలో మార్పులు వచ్చి.. హార్మోన్ల అసమతౌల్యతకు
  దారితీస్తుంది.
• నైట్‌షిఫ్ట్‌ల వల్ల సూర్యోదయంతోపాటు పగటిపూట వెలుగుకీ దూరంగా ఉండాల్సి వస్తుంది. దీనివల్ల శరీరానికి సహజంగా అందాల్సిన విటమిన్‌ డి అందకుండా పోతుంది. ఫలితంగా, మరిన్ని అనారోగ్య సమస్యలు చుట్టుముట్టే అవకాశం ఉన్నది.

జాగ్రత్తలు

• నైట్‌ డ్యూటీలతో శరీరం నిస్తేజంగా మారుతుంది. కాబట్టి, రోజంతా ఉత్సాహంగా ఉండాలంటే.. వ్యాయామం, సూర్య నమస్కారాలు చేయడం మంచిది. ధ్యానం, యోగా వల్ల ఒత్తిడి కూడా తగ్గుతుంది.
• నిద్ర రాకుండా ఉండేందుకు చాలామంది కాఫీలు, టీలు లాగించేస్తుంటారు. దీనివల్ల అసిడిటీ, వికారం, చిరాకు కలుగుతాయి. కాఫీ, టీలకు బదులుగా.. మజ్జిగ, షర్బత్‌ వంటివి తాగడం అలవాటు చేసుకోవాలి.
• రాత్రిపూట విధులు నిర్వహించేవారు మితాహారం తీసుకోవడం మంచిది. కూల్‌డ్రింక్స్‌, జంక్‌ఫుడ్‌కు దూరంగా ఉండాలి.