స్లో డేటింగే సో బెటరూ!

‘నెమ్మది’ అనే మాటే నచ్చని నవతరం.. అన్నిట్లోనూ వేగాన్నే కోరుకుంటున్నది. బైక్‌, ఇంటర్నెట్‌ స్పీడ్‌లోనే కాదు.. ప్రేమ, పెళ్లి విషయంలోనూ ఫాస్ట్‌గానే ఆలోచిస్తున్నది. ‘లవ్‌ ఎట్‌ ఫస్ట్‌సైట్‌' అంటూ.. తొలిచూపులోనే ప్రేమలో మునిగిపోతున్నది.

‘నెమ్మది’ అనే మాటే నచ్చని నవతరం.. అన్నిట్లోనూ వేగాన్నే కోరుకుంటున్నది. బైక్‌, ఇంటర్నెట్‌ స్పీడ్‌లోనే కాదు.. ప్రేమ, పెళ్లి విషయంలోనూ ఫాస్ట్‌గానే ఆలోచిస్తున్నది. ‘లవ్‌ ఎట్‌ ఫస్ట్‌సైట్‌’ అంటూ.. తొలిచూపులోనే ప్రేమలో మునిగిపోతున్నది. పెద్దలు కుదిర్చిన సంబంధమైనా.. ‘చూపులు కలసిన శుభవేళ’లోనే పెళ్లికి ‘ఓకే’ చెప్పేస్తున్నది. భాగస్వామి గురించి పూర్తిగా తెలుసుకోకుండానే.. వివాహ బంధంలోకి అడుగు పెడుతున్నది. ఫలితంగా, కొద్దిరోజులకే మనస్పర్ధలు తలెత్తి.. విడాకులకు దారితీస్తున్నది. అలా కాకుండా.. బంధం బలంగా ఉండాలంటే, ‘స్లో డేటింగ్‌’కు ‘జై’ కొట్టాల్సిన అవసరం ఉన్నది.

నమ్మకమే.. బంధాలకు నిజమైన పునాది. అది బలంగా ఉన్నప్పుడే వివాహ బంధం కలకాలం నిలుస్తుంది. అయితే, అలాంటి నమ్మకాన్ని రాత్రికి రాత్రే నిర్మించలేరు. ఒకరినొకరు పూర్తిగా తెలుసుకున్నప్పుడే.. అది సాధ్యమవుతుంది. ఇందుకు ‘స్లో డేటింగ్‌’ సంపూర్ణంగా సహకరిస్తుంది. ఎలాంటి తొందరపాటు లేకుండా, ఒకరినొకరు పూర్తిగా తెలుసుకుంటూ, లోతైన బంధాన్ని ఏర్పరచుకోవడమే.. ఈ స్లో డేటింగ్‌. అందుకే, కాలేజీ ప్రేమికులైనా; పెళ్లిచూపుల్లో మెచ్చినవాళ్లయినా.. ‘స్లో డేటింగ్‌’ చేయాలని నిపుణులు సలహా ఇస్తున్నారు.

కనీసం మూడు నుంచి నాలుగు నెలలైనా ఇందుకు కేటాయించాలని చెబుతున్నారు. ఈ సమయం ఇద్దరి మధ్య భావోద్వేగాల భద్రతను పెంచుతుంది. దీర్ఘకాలిక సంబంధాలకు బలమైన పునాది వేస్తుంది. తక్షణ సంతృప్తికి బదులుగా.. సహజంగా అభివృద్ధి చెందే నిజమైన అనుభూతిని పెంచుతుంది. కాస్త సమయం తీసుకున్నా.. మరింత నమ్మకమైన, సంతృప్తికరమైన ఫలితాలను అందిస్తుంది.

ఎలా చేయాలి?

• బంధంలోకి అడుగుపెట్టబోయే వాళ్లు.. ‘స్లో డేటింగ్‌’పై ముందుగానే ఒక అవగాహనకు రావాలి.
• ఫోన్‌లో కబుర్లు, మెసేజ్‌లకు బదులుగా.. ఒకరినొకరు తెలుసుకోవడానికి ప్రయత్నించాలి.
• సోషల్‌మీడియా ప్రొఫైల్‌ చూసి.. ఎదుటివారిని అంచనా వేయడం మానుకోవాలి. బదులుగా.. భాగస్వామి నిజమైన వ్యక్తిత్వాన్ని సంపూర్ణంగా తెలుసుకోవాలి.
• భాగస్వామి గురించిన ప్రశ్నలు అడుతుగూ ఉండాలి. వారు చెప్పేది శ్రద్ధగా వినాలి.
• తొందరగా ఒక నిర్ణయానికి రాకుండా.. భాగస్వామి ఆసక్తులు, విలువలు, జీవనశైలిని పూర్తిగా అర్థం చేసుకోవాలి. ఇందుకు కావాల్సిన సమయం తీసుకోవాలి.
• కాబోయే భాగస్వామి గురించిన విషయాలను వారి ద్వారా తెలుసుకోవడమే ఉత్తమమని గ్రహించాలి. మూడో వ్యక్తి ప్రమేయాన్ని తగ్గించాలి.
• స్లో డేటింగ్‌.. కొత్త వ్యక్తికి అలవాటు పడటానికి సమయం అందిస్తుంది. తొందరపాటు వల్ల కలిగే ఒత్తిడిని తగ్గిస్తుంది.

బలమైన పునాది

• స్లో డేటింగ్‌ వల్ల ఇద్దరి మధ్య నిజమైన అనుబంధం ఏర్పడుతుంది.
• సంబంధంపై ఎలాంటి ఒత్తిడి ఉండదు. ఎందుకంటే.. అది సహజంగానే అభివృద్ధి చెందుతుంది కాబట్టి.
• ఇద్దరి అనుకూలతలు, ప్రతికూలతలు స్పష్టంగా తెలుస్తాయి. ఇది సరైన నిర్ణయాలు తీసుకోవడానికి సహాయపడుతుంది.
• భాగస్వామినే కాదు.. మిమ్మల్ని మీరు పూర్తిగా అర్థం చేసుకోవడానికీ దోహదం చేస్తుంది. మీరు ఏమి కోరుకుంటున్నారో, ఎదుటివారి నుంచి ఏమి ఆశిస్తున్నారో తెలియజేస్తుంది.
• ఒకవేళ వారితో బంధం ముందుకు సాగదని భావిస్తే.. ఎలాంటి మొహమాటాలకు పోకుండా స్పష్టంగా కమ్యూనికేట్‌ చేయాలి.
• చివరగా.. ఏదేమైనా తెలివైన నిర్ణయమే తీసుకోవాలి.