Safetipin App | నిర్మానుష్య ప్రాంతాల్లో, రాత్రి సమయాల్లో ఒంటరి ప్రయాణం ప్రమాదమే! అందులోనూ మహిళల విషయంలో మరీ ప్రమాదకరం. ఆకతాయిల అటకాయింపులు, ఆగంతకుల దాడులు మహిళల రక్షణను ప్రశ్నార్థకం చేస్తున్నాయి. ఇలాంటి ఇబ్బందికర పరిస్థితుల్లో మహిళలకు భరోసా ఇచ్చేందుకు రూపొందించిన యాప్ మై సేఫ్టీపిన్. పని ప్రదేశాల్లో తోటి ఉద్యోగులు లైంగికంగా వేధించినా,ప్రయాణాల్లో ఎవరైనా అనుచితంగా ప్రవర్తించినా మహిళలకు తక్షణ రక్షణ కల్పించేందుకు సేఫ్టీపిన్ ఉపయోగపడుతుంది.
ఈ యాప్ ద్వారా మహిళల స్థితిగతులు ఎప్పటికప్పుడు వారి సన్నిహితులకు మెసేజ్ల రూపంలో వెళ్తాయి. 2013లో మహిళా హక్కుల కార్యకర్త కల్పనా విశ్వనాథ్, ఆశిష్ బసు సంయుక్తంగా ఈ యాప్ తయారుచేశారు. దీన్ని గూగుల్ ప్లే స్టోర్ నుంచి డౌన్లోడ్ చేసుకోవాలి. ఫోన్నంబర్తో లాగిన్ అవ్వాలి. తర్వాత పేరు, ఇతర వివరాలు నమోదు చేస్తే మొబైల్కి ఓటీపీ వస్తుంది. దాన్ని నమోదు చేస్తే పరిశీలన పూర్తవుతుంది. మెయిల్ ఐడీ, పుట్టిన తేదీ నమోదు చేయాలి. మనం ప్రయాణిస్తున్న ప్రాంతం వివరాలు నమోదు చేసేందుకు లొకేషన్ పర్మిషన్ ఇవ్వడంతో ఆయా వివరాలన్నీ పోలీసుల నిఘాలోకి వెళ్లిపోతాయి.
మై సేఫ్టీపిన్ యాప్లో నమోదు చేసుకోవడం ద్వారా మన చుట్టుపక్కల ప్రాంతాల సేఫ్టీస్కోర్ తెలుసుకోవచ్చు. తద్వారా మనం ఎంత సురక్షిత ప్రాంతంలో ఉంటున్నామో కూడా అంచనా వేసే అవకాశం ఉంటుంది. అంతేకాదు కొత్త ప్రదేశాలకు వెళ్లినప్పుడు సురక్షితమైన వసతి సౌకర్యాలను కూడా ఈ యాప్ సూచిస్తుంది. ఈ యాప్ ద్వారా మనం ప్రయాణించే మార్గంలో జనసాంద్రత, సెక్యూరిటీ, ప్రజారవాణా, బస్స్టాప్, రైల్వే స్టేషన్, మెట్రో స్టేషన్ వంటి వాటిని కూడా తెలియజేస్తుంది.
ఈ యాప్ వాడుతున్న వ్యక్తులు తప్పిపోతే.. వారి సమాచారాన్ని సులువుగా తెలుసుకోవచ్చు. మనం సురక్షితం కాని ప్రాంతంలో ఉండటాన్ని కనుగొంటే ఈ యాప్లో నమోదు చేసిన నెంబర్లకు ఆటోమెటిక్గా లొకేషన్తో కూడిన నోటిఫికేషన్లు పంపిస్తుంది. ఇంకా చెప్పాలంటే అడుగడుగునా గండాలున్న ఈ సమాజంలో మహిళల భద్రతకు ఈ యాప్ సాయపడుతుంది.