బరువులు ఎత్తాల్సిందే!

వ్యాయామం అనగానే.. చాలామంది మహిళలు నడక, యోగా, జుంబా, ఎరోబిక్స్‌ వైపే చూస్తుంటారు. అతికొద్ది మంది మాత్రమే కఠినమైన ఎక్సర్‌సైజ్‌లు చేస్తుంటారు. శరీరాన్ని ఫిట్‌గా ఉంచుకోవడానికి.. యువతులే ఎక్కువ ఆసక్తి చూపుతుంటారు. అయితే, 40-50 ఏళ్లలోపు మహిళలు కూడా.. బరువులు ఎత్తే వ్యాయామాలు చేయాలని నిపుణులు సూచిస్తున్నారు.

వ్యాయామం అనగానే.. చాలామంది మహిళలు నడక, యోగా, జుంబా, ఎరోబిక్స్‌ వైపే చూస్తుంటారు. అతికొద్ది మంది మాత్రమే కఠినమైన ఎక్సర్‌సైజ్‌లు చేస్తుంటారు. శరీరాన్ని ఫిట్‌గా ఉంచుకోవడానికి.. యువతులే ఎక్కువ ఆసక్తి చూపుతుంటారు. అయితే, 40-50 ఏళ్లలోపు మహిళలు కూడా.. బరువులు ఎత్తే వ్యాయామాలు చేయాలని నిపుణులు సూచిస్తున్నారు. ముఖ్యంగా ఎముకల ఆరోగ్యం, కండరాల శక్తి కోసం ‘రెసిస్టెన్స్‌ ట్రైనింగ్‌’ తీసుకోవాలని సలహా ఇస్తున్నారు.

వయసు పెరిగేకొద్దీ మహిళల శరీరంలో అనేక మార్పులు సంభవిస్తాయి. కండరాల ద్రవ్యరాశి తగ్గుతుంది. ఎముకలు బలహీనం అవుతాయి. జీవక్రియ మందగిస్తుంది. శక్తి స్థాయులూ తగ్గుతాయి. ఈ అనూహ్యమైన మార్పులతో అలసట, బరువు పెరగడం, కీళ్ల నొప్పులు వంటి సమస్యలు ఎదురవుతాయి. వీటన్నిటికీ చెక్‌ పెట్టడానికి.. మహిళలు ‘రెసిస్టెన్స్‌ ట్రైనింగ్‌’ తీసుకోవాలని వ్యాయామ నిపుణులు చెబుతున్నారు.

డంబెల్స్‌ ఎత్తడం, పుష్‌ అప్స్‌ చేయడం, స్క్వాట్స్‌, ప్లాంక్స్‌ లాంటి వ్యాయామాలు.. మహిళల ఆరోగ్యానికి భరోసా ఇస్తాయని అంటున్నారు. కండలు పెంచడానికీ, బాడీబిల్డింగ్‌ కోసమే ఇలాంటి కఠినమైన వ్యాయామాలు చేస్తారని చాలామంది భావిస్తారు. అయితే, 40-50 ఏండ్ల మహిళల్లో వయసురీత్యా వచ్చే శారీరక సమస్యలను.. ‘రెసిస్టెన్స్‌ ట్రైనింగ్‌’ ద్వారా తగ్గించుకోవచ్చని పేర్కొంటున్నారు. అయితే, ఫిట్‌నెస్‌ ట్రైనర్‌ మార్గదర్శకత్వంలోనే ఎక్సర్‌సైజ్‌లు చేయాలని సూచిస్తున్నారు.

ఎన్నో ప్రయోజనాలు

• ‘రెసిస్టెన్స్‌ ట్రైనింగ్‌’ వల్ల మహిళల్లో కండరాలు బలోపేతం అవుతాయి. క్రమం తప్పకుండా చేసే ఇలాంటి వ్యాయామాలతో ఎముక సాంద్రత మెరుగుపడుతుంది. బోలు ఎముకల వ్యాధి ప్రమాదం తగ్గుతుంది.
• ఫిజికల్‌ ఎక్సర్‌సైజ్‌లను ఆశ్రయిస్తే.. శరీరంలో చురుకుదనంతోపాటు జీవక్రియ మెరుగుపడుతుంది.
• నిత్య వ్యాయామం వల్ల శరీరంలో సెరోటోనిన్‌, డోపమైన్‌, ఆక్సిటోసిన్‌ లాంటి హార్మోన్లు విడుదలవుతాయి. ఇవి అలసట, ఒత్తిడిని తగ్గిస్తాయి. కీళ్లూ దృఢత్వాన్ని సంతరించు కుంటాయి.

ఇలా మొదలవ్వాలి

• వ్యాయామం మొదలుపెట్టడానికి ఫిట్‌నెస్‌ ట్రైనర్ల మార్గదర్శకత్వం తప్పకుండా ఉండాలి.
• తేలికైన బరువులతోనే వ్యాయామాలను ప్రారంభించాలి. మొదట్లో బరువులు ఎత్తడంపై కన్నా.. సరైన పొజిషనింగ్‌పైనే దృష్టిపెట్టాలి. అప్పుడే గాయాలు కాకుండా ఉంటాయి.
• రోజుకు 45 నిమిషాల చొప్పున.. వారానికి కనీసం మూడు నాలుగు రోజులు వ్యాయామం చేయడాన్ని లక్ష్యంగా పెట్టుకోవాలి.
• సైక్లింగ్‌, జాగింగ్‌, స్విమ్మింగ్‌, స్ట్రెచింగ్‌ లాంటివీ ప్రయత్నించొచ్చు. ఇలాంటి వ్యాయామాలు గుండె ఆరోగ్యాన్ని కాపాడుతాయి. కండరాలు, కీళ్లు బలంగా తయారవుతాయి.
• మొదట్లో తేలికపాటి నొప్పి సాధారణమే. కానీ, తీవ్రమైన నొప్పి అనిపిస్తే మాత్రం.. వైద్యులను సంప్రదించాలి. అవసరమైతే వ్యాయామాలను మార్చుకోవాలి.
• వ్యాయామంతోపాటు మెట్లు ఎక్కడం, బయటి పనుల కోసం నడిచి వెళ్లడం అలవాటు చేసుకోవాలి.