డాగ్స్‌.. డాండ్రఫ్‌!

‘చుండ్రు’ అనేది మనుషుల్లోనే కాదు.. పెంపుడు జంతువుల్లోనూ కనిపిస్తుంది! అయితే, ఇది మామూలు సమస్య అనుకుంటే పొరపాటే! పొడి చర్మం, అలర్జీలు, పౌష్టికాహారలోపం, ఇన్ఫెక్షన్లు వంటి అంతర్గత ఆరోగ్య సమస్యలకు సంకేతం కూడా కావచ్చు.

‘చుండ్రు’ అనేది మనుషుల్లోనే కాదు.. పెంపుడు జంతువుల్లోనూ కనిపిస్తుంది! అయితే, ఇది మామూలు సమస్య అనుకుంటే పొరపాటే! పొడి చర్మం, అలర్జీలు, పౌష్టికాహారలోపం, ఇన్ఫెక్షన్లు వంటి అంతర్గత ఆరోగ్య సమస్యలకు సంకేతం కూడా కావచ్చు. సమస్యకు మూలాన్ని గుర్తించి సరైన చికిత్స అందించినప్పుడే.. పెంపుడు జంతువులు ఆరోగ్యంగా ఉండగలుగుతాయి.

• పెంపుడు కుక్కలకు చీటికీ మాటికీ స్నానం చేయిస్తే.. పొడి చర్మానికి దారితీస్తుంది. దీర్ఘకాలంలో చుండ్రు వ్యాప్తి చెందడానికి అవకాశం ఉంటుంది.
• కుక్కల ఆహారంలో కొవ్వు ఆమ్లాలు, విటమిన్లు, ప్రొటీన్‌, ఖనిజాలు ఉండేలా చూడాలి. పోషకాహార లోపం వల్ల వాటి చర్మం బలహీనపడుతుంది. అది చుండ్రుకు దారితీస్తుంది.
• కొన్ని రకాల కుక్కలు చాలా సున్నితంగా ఉంటాయి. సులభంగానే దుమ్ము, పుప్పొడి ఇతర వాతావరణ అలర్జీలకు గురవుతాయి. మరికొన్నిటికి ఆహారంతోనూ అలర్జీలు వస్తాయి.
• ఈగలు, పేలు, పురుగులు లాంటి పరాన్న జీవులతోనూ కుక్కలకు ఇబ్బంది కలుగుతుంది. దురద, చికాకుతోపాటు చుండ్రు సమస్యా వేధిస్తుంది.
• ఫంగల్‌, బ్యాక్టీరియల్‌ ఇన్ఫెక్షన్లు సరేసరి! అనారోగ్యంతోపాటు చుండ్రును కూడా కలిగిస్తాయి.
• నివారణ చర్యలు
  ఏ జీవికైనా హైడ్రేషన్‌ చాలా అవసరం. కుక్కల్లో పొడి చర్మాన్ని నివారించడానికి అవి తగినంత నీరు తాగేలా చూసుకోవాలి.
• కుక్కల వెంట్రుకలను ఎప్పటికప్పుడు కత్తిరిస్తూ ఉండాలి. దీనివల్ల చుండ్రు వ్యాప్తి చెందకుండా ఉంటుంది.
• పెంపుడు జంతువులకు చాలామంది సాధారణ షాంపూలే వాడుతుంటారు. దీనివల్ల వాటి చర్మం పొడిబారడంతోపాటు చికాకు కలుగుతుంది. కుక్క చర్మ రకాన్ని బట్టి షాంపూ ఎంచుకోవాలి.
• వాటి చర్మం ఆరోగ్యంగా ఉండాలంటే.. ఆహారంలో ఒమేగా-3, ఒమేగా-6 ఫ్యాటీ ఆమ్లాలను చేర్చాలి.