Health Tips | పొట్ట ఆరోగ్యానికి ఈ ఆహారం తప్పనిసరి

మనం ఎంత ఆరోగ్యంగా ఉన్నాం అన్నది ఏం తింటున్నాం అన్నదాని మీద ఆధారపడి ఉంటుంది. ఒక రకంగా చెప్పాలంటే మనిషి ఆరోగ్యానికి జీర్ణవ్యవస్థ మూలాధారం. మనం తినే ఆహారంలోని పోషకాలను శోషించుకొని శరీరం అంతటికీ సరఫరా చేయటంలో దీనిది ముఖ్యపాత్ర.

మనం ఎంత ఆరోగ్యంగా ఉన్నాం అన్నది ఏం తింటున్నాం అన్నదాని మీద ఆధారపడి ఉంటుంది. ఒక రకంగా చెప్పాలంటే మనిషి ఆరోగ్యానికి జీర్ణవ్యవస్థ మూలాధారం. మనం తినే ఆహారంలోని పోషకాలను శోషించుకొని శరీరం అంతటికీ సరఫరా చేయటంలో దీనిది ముఖ్యపాత్ర. శరీరం ఇనుమును శోషించుకోవాలంటే పొట్టలో ఆమ్లాలు కీలకంగా వ్యవహరిస్తాయి. అలాగే శరీరానికి విటమిన్‌ బి-12 అందాలన్నా జీర్ణాశయం, పేగుల్లోని గ్రాహకాలు ప్రధానం.

• మన ఆహారంతోపాటు పొరపాటున బ్యాక్టీరియా, వైరస్‌లు పొట్టలోకి ప్రవేశిస్తే అక్కడి యాసిడ్‌లు వాటిని చంపేస్తాయి. అందుకే పొట్టను మన ప్రాథమిక రక్షణ వ్యవస్థగా చెబుతాం.
• జీర్ణాశయం ఆరోగ్యం సరిగ్గా లేకపోతే నరాల వ్యవస్థ బలహీనమవుతుందని చెబుతున్నాయి ఇటీవలి అధ్యయనాలు. పార్కిన్‌సన్స్‌, అల్జీమర్స్‌, ఆటిజం, కుంగుబాటులాంటి అనేక రుగ్మతలకు ఇది దారితీస్తుందట.

బాగుండాలంటే…

• జీర్ణవ్యవస్థకు బాగా పనికొచ్చే ఆహారాల జాబితాలో పండ్లు, కూరగాయలు, చిక్కుడు జాతి గింజలతోపాటు పప్పులు, గింజలు, తృణధాన్యాలు ముందు వరుసలో ఉంటాయి. ఇందులోనూ పీచు పదార్థాలు అధికంగా ఉండేవాటిని ఆహారంలో భాగం చేసుకోవాలి.
• మహిళలకు రోజుకు సగటున 25గ్రాముల ఫైబర్‌ అవసరం అవుతుంది. మగవాళ్లలో ఇది 38 గ్రాములుగా ఉంది.
• నూనెలు, కొవ్వులు, ఉప్పులాంటివి పొట్ట ఆరోగ్యాన్ని దెబ్బతీస్తాయి.
• పెరుగు, కలిలాంటి ప్రొ బయాటిక్‌ ఆహారాలు జీర్ణక్రియకు ఎంతగానో తోడ్పడతాయి.
• వాల్‌నట్‌, బెర్రీ, అరటి, వెల్లుల్లి, ఉల్లి, అవిసెలు, తృణధాన్యాలు కడుపులో మంచి బ్యాక్టీరియా పెరుగుదలకు సాయపడతాయి.
• దీర్ఘకాలిక ఒత్తిళ్లు మెదడును మాత్రమే కాదు, పొట్ట ఆరోగ్యాన్నీ దెబ్బతీస్తాయని వివిధ పరిశోధనలు చెబుతున్నాయి. నిద్రలేమి కూడా జీర్ణవ్యవస్థ పనితీరుకు విఘాతం కలిగిస్తుందట. కాబట్టి మానసిక ప్రశాంతత కూడా కడుపును చల్లగా ఉంచే ఓ పోషకం అన్నమాట.