గృహిణులకూ క్రెడిట్‌ కార్డు..

ఇప్పుడు ఎవరి చేతిలో చూసినా క్రెడిట్‌ కార్డు కనిపిస్తున్నది. ఒకప్పుడు పెద్దపెద్ద వ్యాపారులు, ఉన్నత స్థాయి ఉద్యోగులకే పరిమితమైనా.. నేడు చిరుద్యోగులకూ చేరువైంది. కానీ, సాధారణ గృహిణులకు మాత్రం అందని ద్రాక్షగానే మిగులుతున్నది.

ఇప్పుడు ఎవరి చేతిలో చూసినా క్రెడిట్‌ కార్డు కనిపిస్తున్నది. ఒకప్పుడు పెద్దపెద్ద వ్యాపారులు, ఉన్నత స్థాయి ఉద్యోగులకే పరిమితమైనా.. నేడు చిరుద్యోగులకూ చేరువైంది. కానీ, సాధారణ గృహిణులకు మాత్రం అందని ద్రాక్షగానే మిగులుతున్నది. ఉద్యోగం లేదనో.. ఇంకేదో కారణంతోనో.. సంపాదన లేని మహిళలకు క్రెడిట్‌ కార్డులు ఇవ్వడానికి పలు సంస్థలు నిరాకరిస్తుంటాయి. కానీ, ఇలా చేస్తే.. గృహిణులు కూడా క్రెడిట్‌ కార్డు పొందవచ్చని నిపుణులు సూచిస్తున్నారు.

• క్యుములేటివ్‌, రీఇన్వెస్ట్‌మెంట్‌, ఆటో రెన్యూవల్‌ మోడ్‌లో ఫిక్స్‌డ్‌ డిపాజిట్‌ అకౌంట్‌ (ఎఫ్‌డీ ఖాతా) ఉన్న మహిళలు సులభంగా క్రెడిట్‌ కార్డు పొందవచ్చు. సదరు క్రెడిట్‌ కార్డ్‌ లిమిట్‌.. ఫిక్స్‌డ్‌ డిపాజిట్‌లో వేసిన మొత్తంపై ఆధారపడి ఉంటుంది. ఎఫ్‌డీ విలువలో 100% కనీస క్రెడిట్‌ లిమిట్‌ కూడా పొందవచ్చు. కొన్ని సంస్థలు ఎఫ్‌డీ వాల్యూలో 200% వరకూ క్రెడిట్‌ లిమిట్‌ అందిస్తున్నాయి.
• యాడ్‌ ఆన్‌ కార్డ్‌, సేఫ్‌ కార్డ్‌ ద్వారా కూడా గృహిణులు క్రెడిట్‌ కార్డును పొందవచ్చు. భర్తకు క్రెడిట్‌ కార్డ్‌ ఉన్నట్టయితే.. ఆ కార్డుకు లింక్‌ చేసి యాడ్‌ ఆన్‌ కార్డ్‌ కోసం దరఖాస్తు చేసుకోవచ్చు. అయితే, ఇక్కడ భర్త ఆదాయమే యాడ్‌ ఆన్‌ కార్డ్‌ క్రెడిట్‌ లిమిట్‌ను నిర్ణయిస్తుంది.
• ఫిక్స్‌డ్‌ డిపాజిట్ల (ఎఫ్‌డీ) ద్వారా కూడా సేఫ్‌ కార్డ్స్‌ పొందవచ్చు. ఇక్కడ కూడా ఫిక్స్‌డ్‌ డిపాజిట్లే.. క్రెడిట్‌ లిమిట్‌కు సెక్యూరిటీగా పనిచేస్తాయి.
• కొన్ని బ్యాంకులు మహిళల కోసమే ప్రత్యేకంగా క్రెడిట్‌ కార్డులను అందిస్తాయి. వారి కోసమే ప్రత్యేకమైన ఫీచర్లు, ప్రయోజనాలతో తీసుకొస్తున్నాయి. ముఖ్యంగా షాపింగ్‌, ఇతర అవసరాలు తీర్చేలా రూపొందిస్తున్నాయి.

జాగ్రత్తలు

• క్రెడిట్‌ కార్డు తీసుకోవడమే కాదు.. దాన్ని సమర్థంగా నిర్వహించాలి. అప్పుడే అప్పుల పాలవ్వకుండా ఉంటారని నిపుణుల అభిప్రాయం. అందుకోసం ఈ సూత్రాలను పాటించాలని చెబుతున్నారు.
• క్రెడిట్‌ స్కోర్‌ను మెరుగుపరుచుకుంటే.. క్రెడిట్‌ కార్డు పొందడం సులభం అవుతుంది.
• చిన్న క్రెడిట్‌ పరిమితితోనే లావాదేవీలను ప్రారంభించాలి. ఆ తర్వాత క్రమంగా క్రెడిట్‌ లిమిట్‌ను పెంచుకోవచ్చు.
• క్రెడిట్‌ కార్డును క్రమం తప్పకుండా ఉపయోగించాలి.
• బిల్లులను సకాలంలో చెల్లించడం ద్వారా క్రెడిట్‌ స్కోర్‌ను మెరుగుపరుచుకోవచ్చు.