ఆల్‌ ది బెస్ట్‌

ఇంటర్మీడియట్‌ వార్షిక పరీక్షల్లో భాగంగా ప్రథమ సంవత్సర పరీక్షలు బుధవారం ప్రారంభం కానున్నాయి. ఉదయం 9 నుంచి మధ్యాహ్నం 12 గంటల వరకు జరుగనున్నాయి. ఖమ్మం జిల్లా వ్యాప్తంగా మొత్తం 72 కేంద్రాల్లో అధికారులు ఈ పరీక్షలు నిర్వహించనున్నారు. ఇందుకోసం అన్ని ఏర్పాట్లు పూర్తి చేశారు.

• నేటి నుంచి ఇంటర్‌ ప్రథమ సంవత్సరం పరీక్షలు ప్రారంభం
• ఖమ్మం జిల్లాలో 72 కేంద్రాలు.. 17,783 మంది విద్యార్థులు..
• ఎగ్జామ్‌ ప్రారంభమైన 5 నిమిషాల వరకు ‘కేంద్రం’లోకి అనుమతి
• అర్ధగంట ముందే పరీక్ష కేంద్రాలకు చేరుకోవాలంటున్న అధికారులు

ఖమ్మం అర్బన్‌, మార్చి 4: ఇంటర్మీడియట్‌ వార్షిక పరీక్షల్లో భాగంగా ప్రథమ సంవత్సర పరీక్షలు బుధవారం ప్రారంభం కానున్నాయి. ఉదయం 9 నుంచి మధ్యాహ్నం 12 గంటల వరకు జరుగనున్నాయి. ఖమ్మం జిల్లా వ్యాప్తంగా మొత్తం 72 కేంద్రాల్లో అధికారులు ఈ పరీక్షలు నిర్వహించనున్నారు. ఇందుకోసం అన్ని ఏర్పాట్లు పూర్తి చేశారు. విద్యార్థులు ఐదు నిమిషాలు ఆలస్యంగా చేరుకున్నా.. పరీక్ష కేంద్రంలోనికి అనుమతించనున్నారు. అయితే, విద్యార్థులు అర్ధగంట ముందుగానే పరీక్ష కేంద్రాలకు చేరుకోవాలని అధికారులు సూచిస్తున్నారు. బుధవారం 17,783 మంది విద్యార్థులు ప్రథమ సంవత్సరం పరీక్షలు రాయనున్నారు. ఈ 72 కేంద్రాల్లోని సమస్యాత్మాక కేంద్రాలను గుర్తించి అక్కడ పటిష్ట ఏర్పాట్లు చేశారు. అయితే, గురువారం నుంచి ద్వితీయ సంవత్సరం విద్యార్థులకు పరీక్షలు ప్రారంభంకానున్నాయి.

వెబ్‌సైట్‌లో హాల్‌టికెట్లు..
హాల్‌టికెట్లను పొందేందుకు చిక్కులు లేకుండా వెబ్‌సైట్‌ నుంచి డౌన్‌లోడ్‌ చేసుకునే సదుపాయాన్ని ఇంటర్‌ బోర్డు అధికారులు ఈ ఏడాది కల్పించారు. డౌన్‌లోడ్‌ చేసుకున్న హాల్‌టికెట్‌పై వివరాలు సరిపోతే నేరుగా పరీక్ష కేంద్రంలోకి వెళ్లి పరీక్షలు రాయొచ్చని అధికారులు స్పష్టం చేశారు. కాగా, ఇన్విజిలేటర్లు ఫోన్లు వినియోగించే అవకాశం లేకుండా నిబంధనలు అమలు చేస్తున్నారు. సీఎస్‌లు, డీవోలు పరీక్ష కేంద్రాల్లోని గదులన్నింటినీ నిశితంగా పరిశీలించాలని అధికారులు స్పష్టమైన ఆదేశాలు ఇచ్చారు.

స్కాడ్స్‌తో సమావేశం..
పరీక్షలు బుధవారం నుంచి ప్రారంభం కానున్న నేపథ్యంలో డీఐఈవో కార్యాలయంలో డీఐఈవో కే.రవిబాబు.. ఫ్లయింగ్‌ స్కాడ్స్‌, సిట్టింగ్‌ స్కాడ్స్‌తో మంగళవారం సమావేశం నిర్వహించారు. ఫ్లయింగ్‌ స్కాడ్స్‌ విధులను పకడ్బందీగా నిర్వహించాలని ఆదేశించారు. మాస్‌ కాపీయింగ్‌ జరుగకుండా చర్యలు తీసుకోవడంలో స్కాడ్స్‌దే కీలకపాత్ర అని అన్నారు. తనిఖీలు నిరంతరం జరగాలని ఆదేశించారు.

విద్యార్థులకు సూచనలు..

• విద్యార్థులు నిర్ణీత సమయానికి ముందుగానే ఎగ్జామ్‌ సెంటర్‌కు చేరుకోవాలి.
• ఎక్కువ బ్రాంచీలున్న కార్పొరేట్‌ కళాశాలల్లో పరీక్ష కేంద్రం పడితే హాల్‌టికెట్‌లోని క్యూ ఆర్‌ కోడ్‌ ద్వారా పరీక్ష కేంద్రాన్ని గుర్తించాలి.
• హాల్‌టికెట్‌, పెన్నులు, పెన్సిళ్లు కచ్చితంగా వెంట తెచ్చుకోవాలి.
• పరీక్ష హాల్లోకి వెళ్లగానే ఓఎంఆర్‌ షీట్‌పై పొందుపర్చిన వివరాలు సక్రమంగా ఉన్నాయో లేవో సరిచూసుకోవాలి.
• ప్రశ్నపత్రం ఇవ్వగానే ఆందోళన చెందొద్దు. మొదటి ఐదు నిమిషాలపాటు ప్రశ్నపత్రాన్ని ప్రశాంతంగా చదవాలి. మొదటగా తెలిసిన ప్రశ్నలకు సమాధానాలు రాయాలి.
• పరీక్ష కేంద్రాల్లోకి సెల్‌ఫోన్లు, క్యాలిక్యులేటర్‌, ఇతర ఎలక్ట్రానిక్‌ పరికరాల వంటివి తీసుకెళ్ల కూడదు.
• పరీక్ష కేంద్రాల్లో ఏవైనా సమస్యలుంటే 9948904023 నంబర్‌కు ఫిర్యాదు చేయవచ్చు.

‘భద్రాద్రి’లో 19,258 మంది
కొత్తగూడెం గణేశ్‌ టెంపుల్‌, మార్చి 4: బుధవారం నుంచి ప్రారంభమవుతున్న ఇంటర్‌ పరీక్షలను భద్రాద్రి జిల్లాలో 19,258 మంది విద్యార్థులు రాయనున్నారు. ఇందుకోసం అధికారులు 36 పరీక్షా కేంద్రాలను ఏర్పాటు చేశారు. వాటిల్లో అన్ని సౌకర్యాలూ కల్పించారు. మొదటి సంవత్సర పరీక్షలకు 9,255 మంది, ద్వితీయ సంవత్సర పరీక్షలకు 10,003 మంది హాజరుకానున్నారు. 36 మంది సూపరింటెండెంట్లు, 13 మంది అడిషనల్‌ చీఫ్‌ సూపరింటెండెంట్లు, 36 మంది డిపార్ట్‌మెంటల్‌ అధికారులను నియమించారు. అలాగే, మూడు సిట్టింగ్‌ స్కాడ్‌ బృందాలను, ఐదుగురు కస్టోడియన్‌ అధికారులను, 550 మంది ఇన్విజిలేటర్లను, ఇద్దరు ఫ్లయింగ్‌ స్కాడ్‌లను నియమించారు. వైద్య సహాయం కోసం 72 మంది ఏఎన్‌ఎంలను నియమించినట్లు కలెక్టర్‌ తెలిపారు.