‘ఉపాధ్యాయుల నిరాహార దీక్షకు తరలిరావాలి’

కేంద్ర, రాష్ట్ర ప్రభుత్వాలు అనుసరిస్తున్న విద్యా వ్యతిరేక విధానాలను నిరసిస్తూ ఈ నెల‌ 17న హైదరాబాద్‌లోని ఇందిరాపార్కు ధర్నాచౌక్‌ వద్ద టీఎస్‌యూటీఎఫ్‌ ఆధ్వర్యంలో నిర్వహించనున్న సామూహిక నిరాహార దీక్షలో ఉపాధ్యాయులు అధిక సంఖ్యలో పాల్గొనాలని ఆ సంఘం ఖమ్మం జిల్లా కార్యదర్శి అనుమోలు కోటేశ్వరరావు...

– అధిక సంఖ్యలో పాల్గొనాలని టీఎస్‌యూటీఎఫ్‌ పిలుపు

ఎర్రుపాలెం, అక్టోబర్ 16 : కేంద్ర, రాష్ట్ర ప్రభుత్వాలు అనుసరిస్తున్న విద్యా వ్యతిరేక విధానాలను నిరసిస్తూ ఈ నెల‌ 17న హైదరాబాద్‌లోని ఇందిరాపార్కు ధర్నాచౌక్‌ వద్ద టీఎస్‌యూటీఎఫ్‌ ఆధ్వర్యంలో నిర్వహించనున్న సామూహిక నిరాహార దీక్షలో ఉపాధ్యాయులు అధిక సంఖ్యలో పాల్గొనాలని ఆ సంఘం ఖమ్మం జిల్లా కార్యదర్శి అనుమోలు కోటేశ్వరరావు పిలుపునిచ్చారు. శుక్రవారం ఖమ్మం జిల్లా ఎర్రుపాలెం మండలం మీనవోలు జిల్లా పరిషత్‌ ఉన్నత పాఠశాలలో నిర్వహించిన ఎర్రుపాలెం మండల కమిటీ సమావేశంలో ఆయన మాట్లాడారు.
ఆర్‌టీఈ చట్టానికి ముందు నియమితులైన ఉపాధ్యాయులకు టెట్‌ నుంచి మినహాయింపు ఇవ్వాలని, సీపీఎస్‌ను రద్దు చేసి పాత పెన్షన్‌ విధానాన్ని పునరుద్ధరించాలని, ఎన్‌ఈపీ-2020ను రద్దు చేయాలని డిమాండ్‌ చేశారు. తెలంగాణలో జీవో నంబర్‌ 25ను రద్దు చేయడంతోపాటు పాఠశాలల విలీనం, మూసివేతను నిలిపివేయాలని కోరారు. ఉపాధ్యాయులకు బోధనేతర పనుల భారం తగ్గించాలని, రెండో పీఆర్సీ అమలు చేయాలని, పెండింగ్‌ బిల్లులను వెంటనే చెల్లించాలని పేర్కొన్నారు.

మోడల్‌ స్కూల్స్‌, గురుకుల ఉపాధ్యాయులకు 010 పద్దు ద్వారా వేతనాలు చెల్లించాలని, ఆరోగ్య పథకాన్ని పటిష్ఠంగా అమలు చేయాలని, కేజీబీవీ, యూఆర్‌ఎస్‌లలో కాంట్రాక్టు, ఔట్‌సోర్సింగ్‌ విధానాన్ని రద్దు చేసి ఉద్యోగ భద్రత కల్పించాలని డిమాండ్‌ చేశారు. మధ్యతరగతి ఉద్యోగులపై పన్ను భారం తగ్గించాలని, ప్రాథమిక పాఠశాలల ఉపాధ్యాయులకు ఎమ్మెల్సీ ఎన్నికల్లో ఓటుహక్కు కల్పించాలని కోరారు.
మండల అధ్యక్ష, ప్రధాన కార్యదర్శులు కంచర్ల శ్రీనివాసరావు, నండ్రు వెంకటేశ్వరరావు మాట్లాడుతూ ఉపాధ్యాయుల సమస్యల పరిష్కారం కోసం చేపడుతున్న నిరాహార దీక్షను విజయవంతం చేయాలని కోరారు. ఈ సమావేశంలో సంఘం మండల ఉపాధ్యక్షులు టి.రత్నమ్మ, నీలం సైదారావు, కోశాధికారి టి.వెంకటకృష్ణతోపాటు సుధాకర్‌, సతీష్‌, ఎన్‌.సాంబశివరెడ్డి, సీహెచ్‌.శివపార్వతి, కాజా మొహిద్దిన్‌, జీవన్‌, భరత్‌, రాజేశ్వరి పాల్గొన్నారు.