చలి గాలి వణికిస్తోంది

గత నాలుగైదు రోజులుగా చల్లటి గాలులు ఉమ్మడి కరీంనగర్‌ జిల్లా వాసులను ఉక్కిరిబిక్కిరి చేస్తున్నాయి. బంగాళాఖాతంలో నెలకొన్న మాండస్‌ తుఫాన్‌ ప్రభావంతో వాతావరణం ఒక్కసారగా మారిపోయింది.

• పడిపోతున్న కనిష్ఠ ఉష్ణోగ్రతలు
• తుపాన్‌ ప్రభావంతో పొద్దంతా చలి గాలులు
• తట్టుకోలేకపోతున్న ప్రజలు

చలికితోడు ఈదర గాలులు వణికిస్తున్నాయి. ఐదారు రోజులుగా భయపెడుతున్నాయి. మొన్నటిదాకా కనిష్ఠ ఉష్ణోగ్రతలు 17 డిగ్రీలకు పైనే ఉండగా, ఒక్కసారిగా 15 డిగ్రీలకు పడిపోయాయి. ఉదయం, సాయంత్రం పొగమంచు కురుస్తుండగా, బంగాళాఖాతంలో నెలకొన్న మాండస్‌ తుఫాన్‌ ప్రభావంతో పొద్దంతా ఎముకలు కొరికేలా చలి గాలులు వీస్తున్నాయి.

సిరిసిల్ల, డిసెంబర్‌ 10 : గత నాలుగైదు రోజులుగా చల్లటి గాలులు ఉమ్మడి కరీంనగర్‌ జిల్లా వాసులను ఉక్కిరిబిక్కిరి చేస్తున్నాయి. బంగాళాఖాతంలో నెలకొన్న మాండస్‌ తుఫాన్‌ ప్రభావంతో వాతావరణం ఒక్కసారగా మారిపోయింది. రెండు మూడు రోజుల నుంచి అయితే, చలికి తోడు చల్లటి గాలులు పెరగడంతో ప్రజలు అత్యవసరమైతే తప్ప బయటకు రావడం లేదు. స్వెట్టర్లు, మప్లర్లు, శాలువాలు లేనిదే బయట అడుగు పెట్టడం లేదు. వాతావరణం మారిన పరిస్థితుల నేపథ్యంలో జాగ్రత్తలు పాటించాలని మరోవైపు వైద్యులు సూచిస్తున్నారు. చిన్నారులు, వృద్ధులు, రోగులు మరింత జాగ్రత్తగా ఉండాలని చెబుతున్నారు.

ఇవి పాటించండి..

• పనుల మీద బయటకు వెళ్లేవారు స్వెట్టర్లు, శాలువాలు, మందపు దుస్తులు ధరించాలి.
• ద్విచక్రవాహన దారులు జర్కిన్లు, గ్లౌజులు, బూట్లు వేసుకోవాలి.
• గోరువెచ్చని నీటిని తాగాలి.
• ఫ్రిజ్‌లలో నిలువ ఉంచిన ఆహారాన్ని తినొద్దు. ఐస్‌క్రీంలు, కూల్‌డ్రింక్స్‌ తీసుకోకుండా ఉండడం మరీ మంచిది.
• జామ, దానిమ్మ, సంత్ర అరటి పండ్లు ఎక్కువగా తినాలి. వీటిలో సీ విటమిన్‌ అధికంగా ఉండడం వల్ల జలుబు, ఫ్లూ వంటి అనారోగ్య సమస్యలు రావు.
• చర్మం పొడిబారకుండా వ్యాజిలెన్‌, బాడిలోషన్‌లు వాడాలి.
• వేడినీటితో స్నానం చేయాలి.
• జాగ్రత్తలు పాటిస్తూ వాకింగ్‌ చేయడం ఆరోగ్యప్రదం.
• దాహం వేయకపోయినా ద్రవ పదార్థాలు ఎక్కువగా తీసుకోవాలి.
• అల్లం, హెర్చల్‌, తులసి, దాల్చిన చెక్కతో తయారు చేసిన టీ తాగితే బరువు తక్కువ అవడమే కాకుండా ఉల్లాసంగా ఉంటుంది.
• రాత్రిపూట మితహారం తీసుకోవడం శ్రేయస్కరం.
• వేపుళ్లను దూరంగా పెట్టి ఆవిరిపట్టిన, ఉడకబెట్టన ఆహారాన్ని తీసుకుంటే మంచిది.
• రాత్రి జొన్నపిండితో చేసిన రొట్టెలను తినాలి.వీటితోపాటు డ్రైఫ్రూట్స్‌ తీసుకోవడం ఉత్తమం.