Karimnagar | హెచ్‌సీయూ భూములు పరిరక్షించాలని శాతవాహన యూనివర్సిటీ బంద్

ఈ సందర్భంగా ఏబీవీపీ రాష్ట్ర సంయుక్త కార్యదర్శి మల్యాల రాకేష్ మాట్లాడుతూ ఇటీవల కాంగ్రెస్ ప్రభుత్వం ఏర్పడిన తర్వాత యూనివర్సిటీల భూములు పూర్తిగా కబ్జాలకు గురవుతున్నాయని, ప్రజా ప్రభుత్వ పాలనలో విద్యార్థులు, నిరుద్యోగులు ప్రజలు ప్రశాంతంగా జీవించలేకపోతున్నారన్నారు. విద్యార్థుల హక్కులను కాలరాసే విధంగా విద్యార్థులకు ఉపయోగపడేటటువంటి బయోడైవర్సిటీ యూనివర్సిటీని 100 ఎకరాలను హైకోర్టుకు కేటాయిస్తూ రాష్ట్ర ప్రభుత్వం నిర్ణయం తీసుకున్నప్పుడు విద్యార్థులు ఎంతోమంది నిరసన వ్యక్తం చేసిన దాన్ని పట్టించుకోలేదని మండిపడ్డారు.

ప్రస్తుతం హైదరాబాద్ సెంట్రల్ యూనివర్సిటీ భూమిని 400 ఎకరాలను ఆక్రమించి కార్పొరేటీకరణ చేసే విధంగా రాష్ట్ర ప్రభుత్వం వెంచర్లు వేసి సొమ్ము చేసుకోవాలని చూస్తున్నదని ఆరోపించారు. ఈ భూమిలో ఎన్నో రకాల పక్షులు, జంతువులు జీవిస్తున్నాయని వాటి ప్రాణం తీసే విధంగా రాష్ట్ర ప్రభుత్వం చర్యలు తీసుకుంటుందని దీనిని ఏమాత్రం సహించబోమని తెలియజేశారు.

రాష్ట్ర ప్రభుత్వం తీసుకున్న నిర్ణయాన్ని వెంటనే వెనక్కి తీసుకోవాలని డిమాండ్ చేశారు. అలాగే విద్యార్థులు యూనివర్సిటీ భూములు యూనివర్సిటీకి చెందాలని ధర్నాలు చేస్తుంటే ఈరోజు హైదరాబాద్ సెంట్రల్ యూనివర్సిటీలో రాష్ట్ర ప్రభుత్వం విద్యార్థులని చూడకుండా విచక్షణ రహితంగా దాడి చేయించడం లాఠీచార్జ్ చేయించడం సిగ్గుమాలిన చర్య అని మండిపడ్డారు. యూనివర్సిటీ భూములను విషయంలో విద్యార్థులు ప్రశ్నిస్తున్న నేపంలో విద్యార్థులపై లాటిచార్జి చేయించడాన్ని ఏబీవీపీ తీవ్రంగా ఖండించారు.

రాష్ట్ర ప్రభుత్వం అమ్మాలని చూస్తున్న భూములను తిరిగి వెంటనే వెనక్కి యూనివర్సిటీ కేటాయించి విద్యార్థులకు క్షమాపణ చెప్పాలని విద్యార్థుల పైన పెట్టిన కేసులను వెనక్కి తీసుకోవాలని లేని పక్షంలో సెక్రటేరియట్ ముట్టడిస్తామని హెచ్చరించారు. ఈ కార్యక్రమంలో రాష్ట్ర కార్యసమితి సభ్యులు కిరణ్మయి జిల్లా కన్వీనర్ పూసాల విష్ణు యూనివర్సిటీ అధ్యక్షులు బాలకృష్ణ కార్యకర్తలు సాయి, అనూష, గౌరీ, ప్రియ,మానస, తదితరులు పాల్గొన్నారు.