కొలనూరులో వీధి కుక్కల స్వైరవిహారం.. దూడ మృతి

పెద్దపల్లి జిల్లా ఓదెల మండలం కొలనూరు గ్రామంలో వీధి కుక్కల బెడద రోజురోజుకూ పెరుగుతున్నది. తాజాగా కుక్కలు దాడి చేయడంతో ఓ రైతుకు చెందిన దూడ  మృతి చెందింది. ఈ ఘటనతో గ్రామంలోని రైతులు, పశువుల పెంపకందారులు ఆందోళన చెందుతున్నారు

ఓదెల, అక్టోబర్‌ 11: పెద్దపల్లి జిల్లా ఓదెల మండలం కొలనూరు గ్రామంలో వీధి కుక్కల బెడద రోజురోజుకూ పెరుగుతున్నది. తాజాగా కుక్కలు దాడి చేయడంతో ఓ రైతుకు చెందిన దూడ  మృతి చెందింది. ఈ ఘటనతో గ్రామంలోని రైతులు, పశువుల పెంపకందారులు ఆందోళన చెందుతున్నారు.

గ్రామంలో వీధి కుక్కల సంఖ్య పెరగడంతో ప్రజలకు ప్రమాదం పొంచి ఉందని స్థానికులు ఆవేదన వ్యక్తం చేస్తున్నారు. ముఖ్యంగా చిన్నపిల్లలు, వృద్ధులు బయటకు వెళ్లాలంటే భయపడాల్సిన పరిస్థితి ఏర్పడిందని చెబుతున్నారు. కుక్కల దాడిలో దూడ మృతి చెందడంతో రైతుకు ఆర్థిక నష్టం వాటిల్లింది.

కొలనూరులో వీధి కుక్కల బెడదను నివారించాలని కోరుతూ ఇటీవల మండల పరిషత్‌ కార్యాలయంలో నిర్వహించిన ప్రజావాణిలో గ్రామానికి చెందిన దొడ్డె శంకర్‌ ఫిర్యాదు కూడా చేశారు. అయినప్పటికీ సమస్య పరిష్కారం కాలేదని స్థానికులు పేర్కొంటున్నారు. గ్రామపంచాయతీ అధికారులు వెంటనే స్పందించి వీధి కుక్కల నియంత్రణకు తగిన చర్యలు తీసుకోవాలని, భవిష్యత్తులో ఇలాంటి ఘటనలు పునరావృతం కాకుండా చూడాలని గ్రామస్తులు కోరుతున్నారు.